ბსუ-ს ახალ კორპუსს ჩინური კომპანია 2,6 მილიონ ლარად ააშენებს

ბათუმის შოთა რუსთაველის სახელმწიფო უნივერსიტეტსა და ჩინური კომპანიის საქართველოს ფილიალს შორის, უნივერსიტეტის ახალი სასწავლო კორპუსის მშენებლობაზე ხელშეკრულება გუშინ, 21 თებერვალს გაფორმდა. ხელშეკრულების თანხა 2 660 543 ლარი და 18 თეთრია. კომპანიამ ბათუმში, ლეონიძის ქუჩა #15-ში ახალი სასწავლო კორპუსი 2018 წლის 21 დეკემბრამდე უნდა ააშენოს.

სამშენებლო სამუშაოებზე ბსუ-ს 2 მილიონ 957 ათასი ლარი ჰქონდა გათვალისწინებული. ტენდერში 8 კომპანია მონაწილეობდა. სატენდერო კომპანიამ გამარჯვებულად ჩინური კომპანია [შპს ჩაინა ენერჯი ენჯინერინგ გრუპ ნორთვესტ პოვერ კონსტრაქშენ ენჯინერინგ კო-ს საქართველოს ფილიალი] გამოავლინა, რომელმაც თავისი ფილიალი საქართველოში ტენდერამდე 6 თვით ადრე, გასული წლის ივლისში დაარეგისტრირა.

არსებული პროექტის მიხედვით, ახალი სასწავლო კორპუსი სამსართულიანი იქნება; შენობის ძირითადი სტრუქტურული სისტემა წარმოადგენს რკინა-ბეტონის კარკასულ შენობას; მასში 27 აუდიტორია, კაბინეტები და საკონფერენციო დარბაზი განთავსდება. შენობა ადაპტირებული იქნება შშმ პირებზე, რომელშიც გათვალისწინებულია პანდუსი, სველი წერტილები, ლიფტი.

ბსუ ბათუმში, ლეონიძის 15-ში, სტუდენტთა საერთო საცხოვრებელსაც აშენებს, რისთვისაც ხელშკრულება შპს „ვექტორთან“ 2 359 000 ლარზეა გაფორმებული; ბსუ-ს ინფორმაციით, ამ დროისთვის არ არის გადაწყვეტილი კონკრეტულად რომელი ფაკულტეტები განთავსდება ახალ კორპუსში. ლეონიძის 15-ში საუნივერსიტეტო კომპლექსი იქნება.

ქობულეთში კი, კაიკაციშვილის ქუჩის №1-ის მიმდებარედ, ბსუ-ს კვლევითი ინსტიტუტის შენობა აშენდება.

ბსუ-ს ახალი კორპუსის ესკიზი / ბათუმი, ლეონიძის 15 / ფოტო პროექტიდან

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com