„გვირაბთან გზას ბიუჯეტის ხარჯზე ივანიშვილის ხეებისთვის აკეთებენ“ – ენმ პროკურატურას მიმართავს

„საავტომობილო გზების დეპარტამენტი უკანონო და დანაშაულებრივ ხელშეკრულებას აფორმებს და საბიუჯეტო თანხებს არამიზნობრივად ხარჯავს,“ – აცხადებს უმაღლესი საბჭოს წევრი „ერთიანი ნაციონალური მოძრაობიდან“ გია აბულაძე. მან დღეს პროკურატურას წერილობით მიმართა და მახინჯაურის გვირაბთან ახლოს გამავალი ახალი გზის მოწყობით დაინტერესება მოითხოვა. გია აბულაძე ირწმუნება, რომ ახალ გზას ბიძინა ივანიშვილისთვის აკეთებენ, რომელსაც ამ ტერიტორიიდან ხეები გააქვს.

ჩაქვი-მახინჯაურის გვირაბთან ავტოტრანსპორტის მოსაბრუნებელი კვანძის მოსაწყობად საქართველოს საავტომობილო გზების დეპარტამენტმა 2,5 მილიონი ლარი გამოყო და გადაუდებელი აუცილებლობის მიზეზით ხელშეკრულება შპს „გზა“-სთან ტენდერის გარეშე გააფორმა. სამუშაოები 2017 წლის დეკემბრამდე უნდა დასრულებულიყო.

„ამ ტერიტორიიდან, სადაც შენდება გზა, ბიძინა ივანიშვილს გადააქვს ხეები, უკვე გადათხრილია ტერიტორია და გამზადებულია ხეები გადასატანად. საავტომობილო გზების დეპარტამენტი გამარტივებული შესყიდვით უფორმებს ხელშეკრულებას შპს ,,გზას“, რომელიც არის ხეების გადამტანი კომპანია. გამოდის, რომ სახელმწიფო ბიუჯეტიდან დაიხარჯება 2,5 მილიონი ლარი ბიძინა ივანიშვილის ხეების გადატანისთვის. აღნიშნული გზების მშენებლობის საჭიროება არ არსებობს, მითუმეტეს არ არსებობს იმის საჭიროება, რომ დაჩქარებული წესით განხორციელდეს გამარტივებული შესყიდვა. ზემოაღნიშნული სახელმწიფო შესყიდვები აჩენს ეჭვებს, რომ საქართველოს საავტომობილო გზების დეპარტამენტი ახორციელებს უკანონო და დანაშაულებრივი ხელშეკრულების გაფორმებას და საბიუჯეტო თანხას არამიზნობრივ ხარჯვას,“ – აღნიშნავს გია აბულაძე.

ხელშეკრულების გაფორმებამდე, გასული წლის ივლისში, საავტომობილო გზების დეპარტამენტი პირდაპირ შესყიდვას ასე ასაბუთებდა:

„სამუშაოების საპროექტო მომსახურების შესყიდვა, დოკუმენტაციის დამუშავება და გზის მოწყობის სამუშაოების შესყიდვის სატენდერო პროცედურები მოითხოვს დროის საკმაოდ დიდ პერიოდს. მაღალი საზოგადოებრივი ინტერესებიდან გამომდინარე, მოცემულ მონაკვეთზე უსაფრთხოების ზომების გაზრდის უზუნველსაყოფად, დაუყოვნებლივ უნდა დაიწყოს აღნიშნული სამუშაოების განხორციელება პროექტირების პარალელურ რეჟიმში, რათა სამუშაოები დასრულდეს შემჭიდროვებულ ვადებში…“

ამ თემაზე:

მახინჯაურის გვირაბთან ავტოტრანსპორტის მოსაბრუნებელი კვანძის მოწყობის ვადა გადაიწევს

ნეტგაზეთის მასალების სხვა გამოცემებში გადაბეჭდვის წესი


ავტორი