აჭარის სოფლებიდან რძის გასატანად სამინისტრო სპეცტექნიკას შეისყიდის

აჭარის სოფლის მეურნეობის სამინისტრო სოფლებიდან ნედლი რძის მიმღებ პუნქტებამდე ტრანსპორტირებისთვის სპეციალურ ავტომობილს შეისყიდის. ერთი სპეცავტომობილისა და ბიდონების შესასყიდად სამინისტროს 143 500 ლარი აქვს გამოყოფილი.

სამინისტროს აგროპროექტების მართვის ცენტრის დირექტორის, ჯამბულ აბულაძის ინფორმაციით, ფერმერებს შესაძლებლობა ექნებათ, ნებისმიერი ოდენობის რძე ამ ავტომობილით გადაიტანონ. მისივე თქმით, სპეცტექნიკის შესაძენად სამინისტრო სახელმწიფო შესყიდვას უახლოეს დღეებში განახორციელებს.

„ის ფერმერები, რომლებიც რძეს დიდი ოდენობით არ აწარმოებენ, არ უღირთ 5-10 ლიტრი რძის გადამამუშავებელ საწარმოებამდე მიტანა, ხოლო რძის დიდი მწარმოებლები ტრანსპორტირებისას ტექნიკური რეგლამენტით გათვალისწინებულ მოთხოვნებს ვერ იცავენ. ნედლი რძე მიღებიდან ორი საათის შემდეგ უნდა გადამუშავდეს. ჩვენი მიზანია, ერთი მხრივ, ხელი შევუწყოთ მცირე წარმოებას, ამავდროულად, ნელ-ნელა დავნერგოთ სტანდარტები და შევაჩვიოთ მოსახლეობა სანიტარულ-ჰიგიენური ნორმების დაცვას,“ – ამბობს ჯემალ აბულაძე.

ავტომობილი, რომლის შეძენაც დაგეგმილია ბიდონებთან ერთად, მცირე ლაბორატორიული ხელსაწყოთი იქნება აღჭურვილი და რძის ვარგისიანობას ადგილზე შეამოწმებენ, იქნება 20 და 40- ლიტრიანი ჭურჭლები, მთლიანობაში, 3-4 ტონა რძის გადატანა შეეძლება ავტომობილს.

„პირველ ეტაპზე ერთ ავტომობილს შევისყიდით, გვინდა ასეთი ექვსი ავტომობილი გვქონდეს. ამ ეტაპზე მოლაპარაკებებს  ვახორციელებთ დონორ ორგანიზაციებთან, რომ მსგავსი ტექნიკა-დანადგარები მათი ფინანსური მხარდაჭერით შევიძინოთ. რაც შეეხება ფერმერს, რომელიც რძეს ამ ტრანსპორტით გადაიტანს, ის მხოლოდ ტრანსპორტირების ხარჯს გადაიხდის,“ – ამბობს ჯამბულ აბულაძე.

ნეტგაზეთის მასალების სხვა გამოცემებში გადაბეჭდვის წესი


ავტორი