სამინისტრო ძველ ბათუმში ძეგლს 1,72 მილიონ ლარად ყიდის

ბათუმში, მემედ აბაშიძის გამზირზე, N40-ში მდებარე საგარეო საქმეთა სამინისტროს ყოფილ შენობასა და მიწის ნაკვეთს აჭარის ფინანსთა და ეკონომიკის სამინისტრო პირობებიან აუქციონზე ყიდის.

1128 კვ/მ მიწის ნაკვეთისა და 664,8 კვ/მ შენობის საწყისი გასაყიდი ფასი 1 მილიონ 720 ათასი ლარია, ბიჯი – 35 ათასი ლარი. ელექტრონული აუქციონი მიმდინარე წლის 21 თებერვალს დაიწყო და 9 მარტს დასრულდება.

შენობა, რომელიც აუქციონზე იყიდება, კულტურული მემკვიდრეობის ძეგლია. აუქციონის პირობების თანახმად, მყიდველს ევალება:

  • საბოლოო საპრივატიზებო საფასურის გადახდა ხელშეკრულების გაფორმებიდან  3 თვის ვადაში;
  • ხელშეკრულების გაფორმებიდან არაუმეტეს 2 თვის ვადაში საკუთრებაში გადაცემულ ქონებაზე [ძეგლის] მოვლა-პატრონობასთან დაკავშირებით შესაბამის ორგანოსთან გაფორმებული ხელშეკრულების წარდგენა სამინისტროში;
  • ხელშეკრულების გაფორმებიდან 3 თვის ვადაში საზოგადოებრივი კვების ობიექტისათვის საჭირო შენობა-ნაგებობის სარემონტო სამუშაოების დაწყება, 24 თვის ვადაში დასრულება, ამოქმედება და ამოქმედებიდან არანაკლებ საქართველოს 25  მოქალაქის დასაქმება [პროფილის ვადით];
  • აღნიშნულ პროექტში 24 თვის ვადაში არანაკლებ 1 500 000 ლარის ინვესტიციის განხორციელება;
  • საზოგადოებრივი კვების ობიექტის ამოქმედებიდან არანაკლებ 20 წლის ვადით პროფილის შენარჩუნება;
  • აკრძალულია საკუთრებაში გადაცემულ ქონებაზე [ძეგლზე] რაიმე სამუშაოების ჩატარება [შენობის ფართობის, მოცულობის და სიმაღლის გაზრდა] „კულტურული მემკვიდრეობის შესახებ“ საქართველოს კანონით დადგენილი შესაბამისი ნებართვისა და აჭარის ავტონომიური რესპუბლიკის ფინანსთა და ეკონომიკის სამინისტროს თანხმობის გარეშე.

შენობის გასაყიდად ადრეც რამდენჯერმე გამოცხადდა აუქციონი, თუმცა არ გაიყიდა. აღნიშნული ქონება ბოლოს აუქციონზე გაცილებით ძვირად – 2 მილიონ 200 ათას აშშ დოლარად იყო გამოტანილი. პირობებს შორის იყო საკუთრებაში გადაცემულ ქონებაზე საზოგადოებრივი დანიშნულების ობიექტის მოწყობა და ამოქმედება; აღნიშნულ პროექტში კი არანაკლებ 1 მილიონი ლარის ინვესტიციის განხორციელება.

„ბათუმელებს“ დაახლოებით ორი წლის წინ აჭარის ფინანსთა და ეკონომიკის სამინისტროში უთხრეს, რომ შენობას, „ვინაიდან სტატუსი აქვს, მყიდველმა უნდა მოახდინოს რეკონსტრუქცია და პირვანდელ მდგომარეობაში აღადგინოს შენობა, გააფორმოს ხელშეკრულება კულტურული მემკვიდრეობის დაცვის სააგენტოსთან – ეს არის აუცილებელი ვალდებულება. თუ სტატუსი მოეხსნა, უფრო დიდი ინტერესი იქნება აქ, ამ მიწის ნაკვეთთან დაკავშირებით. შეისწავლონ უნდა სპეციალისტებმა და თუ დაკარგული აქვს ღირებულება ძეგლის, უნდა მოეხსნას სტატუსი, ინვესტორებიც გამოჩნდება და შედეგიც აუცილებლად დადგება.“

შენობა რამდენიმე წელია უფუნქციოდაა და პირვანდელი სახეც დაკარგული აქვს, თუმცა დღემდე ძეგლის სტატუსი მისთვის არ მოუხსნიათ. დაავალდებულებენ თუ არა მომავალ ინვესტორს შენობისთვის პირვანდელი სახის დაბრუნებას? – ამ კითხვაზე აჭარის ფინანსთა და ეკონომიკის სამინისტროში გვითხრეს, რომ მყიდველს ევალება მხოლოდ იმ პირობების შესრულება, რაც აუქციონითაა მოთხოვნილი. „ამ პირობებით კი ძეგლი მაქსიმალურად არის დაცული, ვინაიდან შენობაზე სამუშაოები კულტურული მემკვიდრეობის დაცვის სააგენტოსთან შეთანხმებით უნდა ჩატარდეს“, – განაცხადეს სამინისტროში.

ბათუმი, მემედ აბაშიძის გამზირი N40 / ყოფილი საგარეო საქმეთა სამინისტროს შენობა, რომელსაც ძეგლის სტატუსი აქვს, აუქციონზე იყიდება / ფოტო არქივიდან

„ბათუმელების“ არქივიდან:

ვინ და რა პრინციპით ყიდის აჭარის ქონებას

 

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com