მთავარი,სიახლეები

პატარაძის განმარტება ასლან აბაშიძის გარემოცვისთვის k2-ის შუამდგომლობაზე

20.02.2018 • 2927
პატარაძის განმარტება ასლან აბაშიძის გარემოცვისთვის k2-ის შუამდგომლობაზე

აჭარის მთავრობის თავმჯდომარემ მანამ, სანამ იმის შესახებ  განაცხადებდა, რომ დღეიდან k2-ზე [მშენებლობის დაგეგმილზე მეტით სიმაღლეში გაზრდა] შუამდგომლობის გაცემას აღარ გეგმავს და ამ ფუნქციას მთლიანად ბათუმის მერიას უბრუნებს,  უკვე გაცემულ შუამდგომლობებზე განმარტა.

ზურაბ პატარაძის თქმით, ეს იყო მხოლოდ სარეკომენდაციო ხასიათის შუამდგომლობები და არ იყო „მითითება, ბრძანება ან კარნახი“, რომ მათი შესრულება სავალდებულო ყოფილიყო. მეორეს მხრივ კი, მან თქვა, რომ ეს იყო ინვესტიციის მოზიდვის სწორი პოლიტიკა.

„ის კოეფიციენტები, რომლებზეც დღემდე გაცემული იქნა შუამდგომლობები, ძირითადად, მოიცავს შემოერთებულ ტერიტორიებს, ასევე მახინჯაურის მიმართულებით ლოკაციებს. „გეოგრაფიკის“ მიერ შემუშავებული დოკუმენტი ჩვენ დაგვიცავს, რომ იქ არ აშენდეს მაღალი შენობები, რომ იყოს ეს ტერიტორია მაქსიმალურად დაცული. ჩვენ საკმაოდ სკურპულოზურად ვიმუშავეთ ამ საკითხზე და სწორი მუშაობის შემდეგ შევიმუშავეთ გეგმა, თუ როგორ და რას ვაპირებთ ამ მიმართულებით“.

„ბათუმელების“ კითხვაზე, შუამდგომლობაზე უარი ხომ არ უკავშირდება ბოლო დროს მის მიერ ასლან აბაშიძის გარემოცვის მფლობელობაში არსებული კომპანიებისთვის  შუამდგომლობის შესახებ ინფორმაციის გასაჯაროებას და ეს ხომ არ უქმნის მას უხერხულობას? – ზურაბ პატარაძემ უპასუხა:

„არავითარ შემთხვევაში. ჩვენ ვუყურებთ არათუ პერსონებს, არამედ ინვესტიციების მოცულობას. რეგიონის განვითარებას და ქვეყნის გაძლიერებას. ჩვენ ვღებულობთ გადაწყვეტილებას კომისიის დასკვნის საფუძველზე. ეს არის სპეციალისტების მიერ დაკომპლექტებული ჯგუფი. ხოლო მას შემდეგ ჩვენ გადავდივართ ინიციატივით ქალაქის მერიაში. და აქ არანაირი გამონაკლისები არ გვაქვს. თუმცა. დღეიდან, ეს პროცესი უფრო გამჭვირვალე იქნება. საზოგადოება დაინახავს თუ რომელი ჯგუფის და თაობის წარმომადგენლები ღებულობენ მონაწილეობას. ჩვენთვის მთავარია სწორი განვითარება“.

გარდა ამისა, დღეს აჭარის მთავრობისა და ბათუმის მერიის სამუშაო შეხვედრაზე იმსჯელეს „გეოგრაფიკის“ დოკუმენტზე, რომლის დამტკიცებამ, მთავრობის თავმჯდომარის განმარტებით, ძველი ბათუმისა და კულტურული მემკვიდრეობის დაცვა უნდა უზრუნველყოს.

შეხვედრაზე მთავრობის თავმჯდომარემ ისაუბრა იმაზეც, რომ „გეოგრაფიკის“ მიერ შემუშავებული დოკუმენტის დამტკიცება არასამთავრობო ორგანიზაციებისა და „ბათომის“, ასევე დარგის სპეციალისტების პირდაპირი მოთხოვნა იყო.

ბათუმის მერის, ლაშა კომახიძის განმარტებით. მერიას დრო დასჭირდება იმისთვის, რომ ჩამოაყალიბოს ხედვა, თუ როგორ უპასუხებს მერი კ2-ის გაზრდაზე სამშენებლო კომპანიების მოთხოვნებს.

 

გადაბეჭდვის წესი


ასევე: