რეკრეაციულ სივრცეს სკვერის სტატუსი პეტიციის საფუძველზე მიენიჭა

2018 წლის 15 თებერვალს გამართულ ბათუმის მუნიციპალიტეტის საკრებულოს სხდომაზე ბათუმში არსებულ ერთ-ერთ რეკრეაცულ სივრცეს ივანე ჯავახიშვილის სახელობის სკვერის სტატუსი მოქალაქეთა საინიციატივო ჯგუფის მიერ საკრებულოსთვის წარდგენილი პეტიციის საფუძველზე მიენიჭა.

ივანე ჯავახიშვილის სახელობის სკვერი

ივანე ჯავახიშვილის სახელობის სკვერი

ბათუმის მუნიციპალიტეტის საკუთრებაში, ი. ჯავახიშვილის ქ. N2-8-ში არსებული არასასოფლო-სამეურნეო დანიშნულების მიწის სამი ნაკვეთისათვის სკვერის სტატუსის მინიჭების საკითხი ბათუმის საკრებულოსთან არსებული მრჩეველთა საბჭოს მიერ გამართული ღია შეხვედრების – „შენი ხმა საბჭოში“ – ფარგლებში გამოვლენილ ინიციატივებს შორის გამოიკვეთა. აღნიშნული ინიციატივის განსახორციელებლად, შეხვედრების მონაწილეებისგან შეიქმნა საინიციატივო ჯგუფი, რომლებმაც საკრებულოში პეტიციის წარსადგენის მიზნით ბათუმის მერიისგან გამოითხოვეს შესაბამისი ფორმა და დაიწყეს ხელმოწერების შეგროვება.

მოქალაქეთა პეტიციას საკრებულოს წევრებმა მხარი ერთხმად დაუჭირეს

მოქალაქეთა პეტიციას საკრებულოს წევრებმა მხარი ერთხმად დაუჭირეს

ჯგუფმა აღნიშნული პეტიციით ბათუმის საკრებულოს  2017 წლის თებერვალში მომართა. ბათუმის საკრებულოს განათლების, კულტურის, ტურიზმისა და სპორტის საკითხთა კომისიამ მოქალაქეთა მიერ წარდგენილ პეტიციას საკომისიო განხილვაზე მხარი დაუჭირა, რის შემდეგაც საკითხი შესათანხმებლად გადაეგზავნა საქართველოს რეგიონული განვითარებისა და ინფრასტრუქტურის სამინისტროსთან არსებულ გეოგრაფიული ობიექტების სახელწოდებათა დადგენის, ნორმალიზების, გამოყენების, აღრიცხვისა და დაცვის მიზნით, გეოგრაფიული ობიექტების სახელწოდებათა სფეროში მოქმედ სამთავრობო კომისიას. სწორედ ამ კომისიიდან მიღებული თანხმობის საფუძველზე, 2018 წლის 15 თებერვლის საკრებულოს სხდომაზე საკრებულოს წევრებმა  მოქალაქეთა მიერ წარდგენილ პეტიციას  უკლებლივ დაუჭირეს მხარი.

პეტიცია  სამოქალაქო საზოგადოების ინსტიტუტის ბათუმის ფილიალის პროექტის – „მართე შენი ქალაქის“ ფარგლებში მომზადდა და იგი  მხარდაჭერილი იყო აღმოსავლეთ-დასავლეთ მართვის ინსტიტუტის მიერ, EWMI Access-ის პროექტის ფარგლებში, აშშ-ის საერთაშორისო განვითარების სააგენტოს (USAID) ფინანსური მხარდაჭერით.

ნეტგაზეთის მასალების სხვა გამოცემებში გადაბეჭდვის წესი


ავტორი