აჭარის ფინანსთა და ეკონომიკის სამინისტრო ქობულეთში მდებარე მიწის სამ ნაკვეთს პირობებიან აუქციონზე ყიდის. მიწის ნაკვეთები ქობულეთში ზღვასთან ახლოს, აღმაშენებლის გამზირსა და მეგობრობის ქუჩაზე მდებარეობს. ნაკვეთების საერთო ფართობი 71 197 კვ/მ-ია. გასაყიდად გამოტანილ ნაკვეთებზე 10 278 კვ/მ ფართობის შენობა-ნაგებობებიცაა განთავსებული.
თითოეულ ნაკვეთზე ცალკე აუქციონია გამოცხადებული, შესაბამისად, განსხვავებულია პირობები, რაც ქონების მომავალმა მესაკუთრემ/მესაკუთრეებმა უნდა შეასრულონ. სამივე ნაკვეთის საწყისი ფასი ჯამში 4 მილიონ 330 ათასი ლარია და მათზე 30 მილიონი აშშ დოლარისა და 28 მილიონი ლარის ინვესტიცია უნდა განხორციელდეს.
ქობულეთში, დ. აღმაშენებლის გამზირი N313-ში მდებარე 9 212,9 კვ.მ შენობა-ნაგებობები და მასზე დამაგრებული 37 502 კვ.მ არასასოფლო-სამეურნეო დანიშნულების მიწის ნაკვეთი აუქციონზე 2 500 000 ლარად იყიდება.
აუქციონის პირობებია:
[checklist]
- საპრივატიზებო საფასურის გადახდა შემდეგნაირად: 2018 წლის 25 დეკემბრამდე – არანაკლებ 20%; 2019 წლის 1 ივლისამდე – არანაკლებ 40%; 2019 წლის 25 დეკემბრამდე – არანაკლებ 40%;
- ხელშეკრულების გაფორმებიდან 5 თვის ვადაში, არქიტექტურული პროექტის მომზადებამდე, შესაბამისი უწყების მიერ დამტკიცებული განაშენიანების რეგულირების გეგმისა (გრგ) და საპროექტო ობიექტის ვიზუალური ესკიზის სამინისტროში შესათანხმებლად წარმოდგენა;
- ხელშეკრულების გაფორმებიდან 8 თვის ვადაში შენობა-ნაგებობის რეკონსტრუქცია-სარემონტო სამუშაოების ჩატარების ან/და განსათავსებელი შენობა-ნაგებობის საპროექტო დოკუმენტაციის დამუშავება და მშენებლობის ნებართვის მიღება;
- ხელშეკრულების გაფორმებიდან 9 თვის ვადაში მრავალფუნქციური შენობა-ნაგებობის [რომელიც მოიცავს რეაბილიტაციის და გამაჯანსაღებელ ცენტრს, ასევე რეკრიაციულ ზონას] მშენებლობის დაწყება;
- ხელშეკრულების გაფორმებიდან 24 თვის ვადაში მრავალფუნქციური შენობა-ნაგებობის დასრულება, ექსპლუატაციაში მიღება და ამოქმედება; აღნიშნულ პროექტში არანაკლებ 30 000 000 აშშ დოლარის ექვივალენტი ლარის ინვესტიციის განხორციელება; 20წლის განმავლობაში პროფილის შენარჩუნება;
- მრავალფუნქციური შენობა-ნაგებობის ექსპლუატაციაში მიღებიდან 1 თვის ვადაში არანაკლებ 50 მოქალაქის დასაქმება სადაც დასაქმებულთა არანაკლებ 90%-ს უნდა შეადგენდნენ საქართველოს მოქალაქეები.
[/checklist]
ქობულეთში, მეგობრობის ქუჩა N42-ში მდებარე 7 482 კვ.მ არასასოფლო-სამეურნეო დანიშნულების მიწის ნაკვეთის და მასზე განლაგებული 1065,90 კვ.მ შენობა-ნაგებობების საწყისი საპრივატიზაციო ფასი 406 500 ლარია.
აუქციონის პირობები:
[checklist]
- საპრივატიზებო საფასურის გადახდა შემდეგნაირად: 2018 წლის 25 დეკემბრამდე – არანაკლებ 20%; 2019 წლის 1 ივლისამდე – არანაკლებ 40%; 2019 წლის 25 დეკემბრამდე – არანაკლებ 40%;
- ხელშეკრულების გაფორმებიდან 3 თვის ვადაში, არქიტექტურული პროექტის მომზადებამდე საპროექტო ობიექტის ვიზუალური ესკიზის სამინისტროში შესათანხმებლად წარმოდგენა;
- ხელშეკრულების გაფორმებიდან 4 თვის ვადაში საკუთრებაში გადაცემულ მიწის ნაკვეთზე განსათავსებელი შენობა-ნაგებობის საპროექტო დოკუმენტაციის დამუშავება და მშენებლობის ნებართვის მიღება;
- ხელშეკრულების გაფორმებიდან 7 თვის ვადაში მრავალფუნქციური შენობა-ნაგებობის [ბალნეოლოგიური, გამაჯანსაღებელი ცენტრის, კვლევითი ლაბორატორიის, კარდიოლოგიის, ნევროლოგიის, დერმატოლოგიის, ორთოპედ-ტრავმატოლოგიის ოთახების] რეკონსტრუქცია-რემონტის/მშენებლობის დაწყება, ხელშეკრულების გაფორმებიდან 48 თვის ვადაში დასრულება, ექსპლუატაციაში გაშვება, ამოქმედება და 20 წლის განმავლობაში პროფილის შენარჩუნება; აღნიშნულ პროექტში არანაკლებ 3 000 000 ლარის ინვესტიციის განხორციელება;
- მრავალფუნქციური შენობა-ნაგებობის ექსპლუატაციაში მიღებიდან 1 თვის ვადაში არანაკლებ 15 საქართველოს მოქალაქის დასაქმება.
[/checklist]
ქობულეთში, დ. აღმაშენებლის გამზირი N291-ში მდებარე 26 213 კვ.მ არასასოფლო-სამეურნეო დანიშნულების მიწის ნაკვეთის საწყისი გასაყიდი ფასია 1 423 500 ლარი.
აუქციონის პირობებია:
[checklist]
- საპრივატიზებო საფასურის გადახდა აუქციონის დასრულებიდან 3 თვის განმავლობაში;
- ხელშეკრულების გაფორმებიდან 6 თვის ვადაში არქიტექტურული პროექტის მომზადებამდე შესაბამისი უწყების მიერ დამტკიცებული განაშენიანების რეგულირების გეგმისა და საპროექტო ობიექტის ვიზუალური ესკიზის სამინისტროში შესათანხმებლად წარდგენა;
- ხელშეკრულების გაფორმებიდან 12 თვის ვადაში საკუთრებაში გადაცემული მიწის ნაკვეთზე განსათავსებელი შენობა-ნაგებობის საპროექტო დოკუმენტაციის დამუშავება და მრავალფუნქციური შენობა-ნაგებობის მშენებლობის ნებართვის მიღება [მრავალფუნქციური შენობა-ნაგებობა უნდა შეიცავდეს სასტუმროს – არანაკლებ 200 ნომერი, სპა ცენტრს, ბავშვთა გასართობ სივრცეს, ღია სპორტულ მოედანს, კვების ობიექტებს და ა.შ];
- ხელშეკრულების გაფორმებიდან 14 თვის ვადაში მრავალფუნქციური შენობა-ნაგებობის მშენებლობის დაწყება, 48 თვის ვადაში დასრულება და ექსპლუატაციაში გაშვება. შენობა-ნაგებობის ექსპლუატაციაში მიღებიდან 6 თვის ვადაში არანაკლებ 200 ნომრიანი სასტუმროს ამოქმედება და ამოქმედებიდან არანაკლებ 20 წლის განმავლობაში პროფილის შენარჩუნება. აღნიშნულ პროექტში არანაკლებ 25 000 000 ლარის ინვესტიციის განხორციელება;
- მრავალფუნქციური შენობა-ნაგებობის მშენებლობის პროცესში არანაკლებ 200 მოქალაქის დასაქმება, ხოლო სასტუმროს ამოქმედებიდან 1 თვის ვადაში, არანაკლებ 200 მოქალაქის დასაქმება პროფილის შენარჩუნების ვადით [20 წელი], სადაც დასაქმებულთა არანაკლებ 90%-ს უნდა შეადგენდეს საქართველოს მოქალაქეები.
[/checklist]