„თემურ კახიძე არის ერთადერთი მაღალი თანამდებობის პირი ოპოზიციური პარტიებიდან უმაღლეს საბჭოში, რომელიც პირდაპირ არის ნიღაბჩამოხსნილი და შეთანხმებულ-გარიგებული ხელისუფლებასთან. ეს ადამიანი არის „ქართული ოცნების“ ინტერესების გამტარებელი უმაღლეს საბჭოში და ამას აკეთებს მუდმივად, როგორც პირადი ინტერესების, ასევე, სავარაუდოდ, მომავალი გარანტიების მისაღებად,“ – აცხადებს პეტრე ზამბახიძე.
პეტრე ზამბახიძის განცხადებით, იურიდიული კომისიის თავმჯდომარე ხელისუფლებას ადრეც გაურიგდა:
„თემურ კახიძე გაურიგდა ხელისუფლებას მაშინაც, როცა საარჩევნო კომისიის წევრებს ამტკიცებდნენ. მაგრამ გუშინ რაც გააკეთა, ეს იყო „ქართული ოცნების“ ინტერესების დასაცავად გადადგმული კიდევ ერთი ნაბიჯი. თემურ კახიძე გუშინ საბოლოოდ გახდა „ქართული ოცნების“ დანამატი და მათი პარტიული ინტერესების გამტარებელი, რადგან მან კორუფციულ ბიუჯეტს დაუჭირა მხარი, საიდანაც დაახლოებით ას მილიონ ლარზე მეტი გადაეცემა შპს „ხაბაძის ნათესავს“. „ქართულ ოცნებას“ უმაღლეს საბჭოში უმრავლესობა არ აქვს და სწორედ „თავისუფალი დემოკრატების“ მხარდაჭერით მოხდა ამ ცვლილების განხორციელება.
ეს იყო ბინძური გადაწყვეტილება, რადგან დეკემბერში სწორედ თემურ კახიძე იყო ამ თანხის გამოყოფის წინააღმდეგი. დეკემბრიდან დღემდე ხელისუფლებას დასჭირდა, რომ ეს ადამიანები (თავისუფალი დემოკრატები) მოექრთამა, მოეთაფლა მათთვის შეპირებების, თანამდებობებზე ხალხის დატოვების სანაცვლოდ, რაც ეწინააღმდეგება ზოგადად „თავისუფალი დემოკრატების“ პრინციპებს, ისინი ასე არ მუშაობენ საქართველოს პარლამენტში. თავისუფალი დემოკრატები ყველგან გადადგნენ თანამდებობიდან, თემურ კახიძე კი თანამდებობის შენარჩუნების გამო გაურიგდა „ქართულ ოცნებას“.
იურიდიული და საპროცედურო საკითხთა კომისია მიხეილ მჟავანაძემაც დატოვა.
„კომისიის დატოვების მიზეზი კომისიის თავმჯდომარის მიერ კენჭისყრაში მონაწილეობა იყო. ის ოპოზიციას წარმოადგენს უმაღლეს საბჭოში, მაგრამ მთავრობას დაუჭირა მხარი კორუფციული ელემენტების შემცველ გადაწყვეტილებაში“, – აცხადებს მიხეილ მჟავანაძე.
პეტრე ზამბახიძისა და მიხეილ მჟავანაძის ბრალდებებს იურიდიული კომისიის თავმჯდომარე თემურ კახიძე პასუხობს:
„სამწუხაროა, რომ კომისია დატოვეს. მე ვურჩევდი მათ, რომ პროტესტის უფრო ძლიერი ფორმა აერჩიათ და უმაღლესი საბჭოს მანდატები დაეტოვებინათ. ეს უფრო კარგი იქნებოდა.“
თემურ კახიძე აცხადებს, რომ ის ქართული ოცნების სასარგებლოდ პოლიტიკურ თამაშს არ ეწევა:
„მე პოლიტიკურ თამაშს არ ვეწევი, მე ვეწევი პოლიტიკას. არც დემაგოგი ვარ და არც დესტრუქციული პირი. ჩვენი მთავარი მიზანია, რომ მოსახლეობამ მიიღოს ხეირი ამ პროცესებიდან. მე არ ვარ საზოგადოების ოპოზიცია, მე ვარ „ქართული ოცნების“ და „ნაციონალური მოძრაობის“ ოპოზიცია. ჩვენ ბათუმს არ დავტოვებთ სტადიონის გარეშე, ეს იყო ამოსავალი წერტილი და სამწუხაროა, რომ გუშინ არ მომხდარა ბიუჯეტის სხვა კომპონენტების განხილვა, მხოლოდ სტადიონის ნაწილზე გაკეთდა აქცენტი“- განაცხადა თემურ კახიძემ.
იურიდიული კომისიის თავმჯდომარე აცხადებს, რომ თუკი ერთ თვეში შპს „სტადიონი“ სტადიონის პროექტს არ შეისყიდის, ის თავად მიმართავს პროტესტის ფორმას:
„ჩვენ იმის გარანტი ვიქნებით, რომ სტადიონი აშენდება. თუ არ აშენდება, იმის გარანტიასაც ვიძლევით, რომ ყველა იმ პირის პასუხისმგებლობის საკითხი დავაყენოთ, ვინც წარმოადგინა ეს ბიუჯეტი. ყველაზე რადიკალური ფორმით, რასაც ჰქვია მთავრობის გადაყენების საკითხი. საზოგადოების დიდი ნაწილის მხადაჭერაც გვექნება ამაში და საპროტესტო აქციებიც დაიწყება“.
