სამი მერიის მიერ დახარჯული საწვავი ერთ თვეში

აჭარის მთიან მუნიციპალიტეტებში ყველაზე მეტი ავტომობილი შუახევის მერიას ემსახურება, შესაბამისად, ყველაზე მეტი ოდენობის საწვავსაც შუახევის მერია ხარჯავს.

შუახევის მერიის საფინანსო სამსახურის უფროსის, ანზორ ცეცხლაძის ინფორმაციით, მერიის ბალანსზე არსებული 14 ავტომობილიდან გამართულ მდგომარეობაში ათი ავტომობილია, სახელმწიფო ავტომობილები აქ მერს, მერის ორ მოადგილეს და ყველა სამსახურს ემსახურება. რაც შეეხება საწვავის ლიმიტს, თვის განმავლობაში შუახევის მერიის თანამშრომლებისთვის 1950 ლიტრი საწვავია გაწერილი.

შუახევის მერი, ფრიდონ ფუტკარაძე, თვეში 550 ლიტრ საწვავს მოიხმარს, მერის ორი მოადგილე – 300, შიდა აუდიტის სამსახური – 100, განათლებისა და შესყიდვის სამსახური – 50, სხვა სამსახურები კი – 150 ლიტრ საწვავს ხარჯავენ ყოველთვიურად.

შუახევის მერიისგან განსხვავებით, ქედის მერია 150 ლიტრით ნაკლებ საწვავს ხარჯავს.

ქედის მერიას რვა ავტომობილი ემსახურება – მერს, ლევან გორგილაძეს, მერის ორ მოადგილეს, ჯანდაცვის, ეკონომიკის, ზედამხედველობის, არქიტექტურისა და სამხედრო სამსახურებს. შუახევის მერისგან განსხვავებით, ქედის მერი, ლევან გორგილაძე, თვეში 50 ლიტრით მეტ საწვავს ხარჯავს. რაც შეეხება მოადგილეებს, ქედის მერის პირველი მოადგილისთვის – 300, მოადგილესთვის – 250 ლიტრი საწვავია გაწერილი, ჯანდაცვისა და ზედამხედველობის სამსახურისთვის თვეში – 150, არქიტექტურის სამსახურისთვის – 250 და სამხედრო სამსახურისთვის 100 ლიტრი.

რაც შეეხება ხულოს მერიას, ხულოს მერიის ბალანსზე ათი ავტომობილია. მერიის საზოგადოებასთან ურთიერთობის სამსახურის უფროსის, თორნიკე მიქელაძის ინფორმაციით, ათი ავტომობილიდან ცხრა ავტომობილია გამართულ მდგომარეობაში. რაც შეეხება საწვავს, მისივე ინფორმაციით, გასულ თვეში საწვავის ლიმიტი მხოლოდ ხუთ ავტომობილზე გაიცა.

ამ დროისთვის ხულოს მერიაში ავტომობილი მერს, გოჩა მელაძეს, მერის მოადგილეს, მერიის ზედამხედველობის, ინფრასტრუქტურისა და სამხედრო სამსახურს ემსახურება. მერი ერთ თვეში 750 ლიტრ საწვავის ლიმიტს იღებს, მოადგილე – 350-ს, ზედამხედველობისა და ინფრასტრუქტურის სამსახურებზე 100 ლიტრი საწვავია გაწერილი, სამხედრო სამსახურისთვის კი, 180 ლიტრია გათვალისწინებული.

მთავარი ფოტო: ქედიის მერიის ავტომანქანა

ნეტგაზეთის მასალების სხვა გამოცემებში გადაბეჭდვის წესი
ავტორი