ბათუმის მერია: ანგისის ბაზა სტანდარტებს აკმაყოფილებს

ბათუმის მერია „ერთიანი ნაციონალური მოძრაობის“ ბრალდებებს პასუხობს.  ბათუმის საკრებულოს წევრის „ერთიანი ნაციონალური მოძრაობიდან“, ნოდარ დუმბაძის განცხადებით  მერიამ ანგისის სპორტული ბაზა მშენებლობის დასრულებამდე ჩაიბარა. ბათუმის მერიაში კი ამბობენ, რომ ანგისის ბაზაზე სამუშაოები დასრულებულია.

„ანგისის ბაზა ჩაბარდა ხელშეკრულებით გათვალისწინებულ ვადაში, 2017 წლის 25 დეკემბერს. აკმაყოფილებს სტანდარტებს და ხელშეკრულებით გათვალისწინებულ მოთხოვნებს, ამას ადასტურებს სამხარაულის ექსპერტიზის დასკვნაც,“ – განაცხადა ჯემალ დევაძემ,  ბათუმის  მერიის კეთილმოწყობის სამსახურის უფროსმა სპეციალისტმა.

მისივე განმარტებით, სპორტული ბაზის პირველ სართულზე სამუშაოები იმის გამო არ არის დასრულებული, რომ იქ კომერციული ფართობისთვისაა ადგილი გამოყოფილი და მშენებელ კომპანიასთან გაფორმებული ხელშეკრულება არ ითვალისწინებდა ამ ადგილას სამუშაოების ჩატარებას.

„მას შემდეგ, რაც  ანგისის ბაზა საკუთრებაში  გადაეცემა ბათუმის დინამოს, ის თავად განაგებს მის [კომერციული ფართობის] ბედს და გამოიყენებს დანიშნულებისამებრ. რაც შეეხება შენობაში შიდა სამუშაოებს, კი, ნამდვილად მიმდინარეობს. ჩვენ მოვლა-პატრონობისთვის გადავეცით საფეხბურთო კლუბ ბათუმის „დინამოს“. ჰოდა, რატომ დაიწყეს შიდა სამუშაოები, ამაზე ბათუმის „დინამოს“ხელმძღვანელობა გაგცემთ პასუხს,“ – განაცხადა ჯემალ დევაძემ.

ანგისის სპორტული ბაზის მშენებლობა შპს „ენერგოსექტორმშენმა“ დაიწყო, რომელთანაც ბათუმის მერიამ ხელშეკრულება, აღებული ვალდებულების შეუსრულებლობის გამო, შეწყვიტა. ხელშეკრულების შეწყვეტის დროს ქალაქის მერიას 2 მილიონი ლარი ავანსად ჰქონდა ჩარიცხული კომპანიისთვის. ამ ხელშეკრულების მიხედვით, სპორტული ბაზა 2016 წლის 17 ნოემბრამდე უნდა დასრულებულიყო.  ახალი ხელშეკრულება 4 116 170 ლარზე „მონოლითი 2005“-თან ბათუმის მერიამ 2017 წლის 29 მარტს გააფორმა.

ამავე თემაზე:

„ნაციონალური მოძრაობა“: მერიამ სპორტული ბაზა მშენებლობის დასრულებამდე ჩაიბარა

ტენდერი ოთხჯერ – ანგისის სპორტული ბაზის ასაშენებლად

ნეტგაზეთის მასალების სხვა გამოცემებში გადაბეჭდვის წესი


ავტორი