7 მილიონი ევრო 50-მდე ახალი ადაპტირებული ავტობუსისთვის ბათუმში

„ბათუმის ავტოტრანსპორტი“ 10 ელექტრო და 40 დიზელზე მომუშავე ახალ ავტობუსს EBRD-ის სესხით შეიძენს. ავტობუსებისთვის დაახლოებით 7 მილიონი ევრო დაიხარჯება. საერთაშორისო ტენდერი ოფიციალურად გამოცხადდა და სატენდერო წინადადებების მიღება წელს 15 მარტს დასრულდება. ახალი ავტობუსები ადაპტირებული უნდა იყოს შეზღუდული შესაძლებლობის მქონე პირებისათვის. ასევე უნდა ჰქონდეს კონდიციონერი.

ტენდერის შესახებ ინფორმაცია მხოლოდ ინგლისურ ენაზეა EBRD-ის გვერდზე ხელმისაწვდომი.

„ტენდერი ტარდება ევროპის რეკონსტრუქციის და განვითარების ბანკთან ერთად. EBRD-ს აქვს თავისი წესები. ოფიციალური სატენდერო ენა არის ინგლისური. ჩვენ  ტენდერში მონაწილე კომპანიებს ვთხოვთ და მონაწილეობისთვის პირდაპირი ვალდებულებაა, რომ ნებისმიერი  ოფიციალური  წერილი თუ შეკითხვა დაიწეროს მეილის სახით და აუცილებლად ინგლისურ ენაზე,“ – უთხრა „ბათუმელებს“ ბათუმის ავტოტრანსპორტის მარკეტინგის მენეჯერმა გიორგი კონცელიძემ.

მისივე თქმით, დაზუსტებულია, რომ „ბათუმის ავტოტრანსპორტი“ 10 ელექტროავტობუსს შეიძენს. რაც შეეხება დიზელზე მომუშავე ავტობუსს, „გათვალისწინებულია 40 ავტობუსის შეძენა. ტენდერი როცა დამთავრდება და გამარჯვებული გამოვლინდება,  იმის მიხედვით ვიტყვით დაზუსტებით, რამდენ ავტობუსს მოგვაწოდებს ტენდერის ფარგლებში გამარჯვებული  კომპანია,“ – ამბობს გიორგი კონცელიძე.

ტენდერში მონაწილეობით დაინტერესებულმა კომპანიებმა 200 ევრო უნდა გადაიხადონ იმისთვის, რომ სატენდერო დოკუმენტაციის გაცნობა შეძლონ, წინადადებები მოამზადონ დოკუმენტების მისაღებად.

„ტექნიკური მახასიათებლების დოკუმენტი 135-გვერდიანია. ტენდერში მონაწილეობისთვის, პირველ რიგში, აუცილებელი ტენდერის დოკუმენტაციების გამოსყიდვა. მსურველი კომპანია იხდის ამ თანხას,  ჩვენს ანგარიშზე თანხის ასახვის  შემდეგ სატენდერო დოკუმენტაციას ვუგზავნით ჩვენ,“ – ამბობს გიორგი კონცელიძე.

სატენდერო კომისიის სხდომა ბათუმში გაიმართება.  კომისიის წევრების ვინაობა ჯერჯერობით ცნობილი არ არის.

გამარჯვებული კომპანია ვალდებულია ტენდერში გამარჯვებიდან ექვს თვეში შეიძინოს ახალი ავტობუსები.

ბათუმის მერია ავტობუსებს ევროპის რეკონსტრუქციისა და განვითარების ბანკის (EBRD) სესხით ყიდულობს. ხელისუფლება ჯერ კიდევ 2015 წელს აცხადებდა, რომ გეგმავდა ავტობუსების შეძენას ბათუმისთვის.

 

ნეტგაზეთის მასალების სხვა გამოცემებში გადაბეჭდვის წესი
ავტორი