საკრებულოს წევრი: გახმა სამინისტროს მიერ მოცემული ნერგები

„ნერგები სოფლის მეურნეობის სამინისტრომ სხვადასხვა საკრებულოს წევრს, პარტიულ აქტივისტებსა და ქალაქის მოსახლეობას მისცა. ახლა აქ, რუსთაველის ქუჩაზე მოცვის ბაღი უნდა იყოს გაშენებული,“ – აცხადებს უმაღლესი საბჭოს წევრი „ერთიანი ნაციონალური მოძრაობიდან“ ელგუჯა ბაგრატიონი. მან დღეს აჭარის სოფლის მეურნეობის სამინისტროს მიერ წარმოდგენილი მიღება-ჩაბარების აქტები გაასაჯაროვა.

ერთ-ერთი საჯარო მოხელე, რომელიც აჭარის სოფლის მეურნეობის სამინისტროსგან ნერგები მიიღო, გელა გოგიტიძეა. იგი ამჟამად ქობულეთის საკრებულოს წევრია „ქართული ოცნებიდან“. ნერგების მიღების დროს, 2015 წლის ბოლო, გელა გოგიტიძე ქობულეთის გამგეობის ადმინისტრაციის უფროსი იყო, ასევე „ქართული ოცნების“ ქობულეთის ორგანიზაციის აღმასრულებელი მდივანი. გელა გოგიტიძემ სახელმწიფოსგან 70-პროცენტიანი თანადაფინანსებით 100 ძირი სუბტროპიკული ხურმა მიიღო.

„არ გაამართლა, უმეტესობა აღარ არსებობს, გახმა,“ – გვითხრა ქობულეთის საკრებულოს წევრმა. გელა გოგიტიძემ გვითხრა, რომ სამინისტროსგან მოცვის ნერგებიც მიიღო და „იმანაც არ გაამართლა“.

„არ იყო მოთხოვნადი ეს ხურმა და ავიღე. ვინმე თუ ამით დაზარალდა, შემიძლია ავანაზღაურო. მე მაქვს სასოფლო-სამეურნეო მიწა და ვარ ფერმერების სიაში. მივიღე ნერგები და ამაში პრობლემას ვერ ვხედავ… სამინისტროს მივმართე კონსულტაციისთვის, რომ გამერკვია, რის გამო ვერ იხარა ამ ნერგებმა, მაგრამ ვერ გაირკვა,“ – აღნიშნა გელა გოგიტიძემ „ბათუმელებთან“.

„ერთიანი ნაციონალური მოძრაობის“ ინფორმაციით, ნერგები მიიღეს ქობულეთის, ბათუმისა და ხულოს საკრებულოს სხვა წევრებმაც.

 

ნეტგაზეთის მასალების სხვა გამოცემებში გადაბეჭდვის წესი
ავტორი