უფლებამოსილების სამ თვეში, რაც ის მოვალეობის შესრულებას შეუდგა, ბათუმის მერმა, ლაშა კომახიძემ, აჭარის მთავრობის თავმჯდომარისგან 11 წერილი მიიღო კონკრეტულ ზონაში განაშენიანების ინტენსივობის კოეფიციენტის დასაშვებზე მეტად გაზრდის თხოვნით. k2 -კოეფიციენტის გაზრდა, სამშენებლო ფართობის მაქსიმალურად ათვისების ხარჯზე, მშენებლობის სიმაღლეში ზრდასაც გულისხმობს. ამ მიზეზით ბათუმში ბევრი მრავალბინიანი სახლი აშენდა, ეზოს, პარკინგისა და გამწვანების გარეშე.
აჭარის მთავრობიდან „ბათუმელებისთვის“ მოწოდებული ინფორმაციით, უახლოეს მომავალში სიმაღლეში გასაზრდელი შენობების რიცხვი შესაძლოა კიდევ უფრო გაიზარდოს, რადგან ზურაბ პატარაძის მიერ გაცემული შუამდგომლობების სტატისტიკა ბოლო პერიოდში სწრაფად იზრდება. მთავრობის თავმჯდომარედ დანიშვნიდან 2017 წლის თებერვლამდე, ზურაბ პატარაძემ k2 კოეფიციენტის გაზრდაზე 13 კომპანიას უშუამდგომლა, 2017 წლის თებერვლიდან დღემდე კი, ეს რიცხვი 62-მდე გაიზარდა.
2017 წლის ივლისში ზურაბ პატარაძემ ბადრი და გელა ბერიძეებს ბათუმში, დემეტრე თავდადებულის ქუჩის #109-ში უშუამდგომლა k2 კოეფიციენტის გაზრდაზე.
მერიისთვის მიწერილ წერილში ზურაბ პატარაძე წერს, რომ ამ მისამართზე ერთი და ორსართულიანი უსახური შენობების ნაცვლად თანამედროვე, კეთილმოწყობილი 10-სართულიანი სახლის მშენებლობაა დაგეგმილი, რომელსაც ექნება ღია და დახურული პარკინგის ადგილი. გარდა ამისა, მთავრობის თავმჯდომარის ინფორმაციით, ამ ტერიტორიაზე განთავსდება საბავშვო ატრაქციონი.
ფარნავაზ მეფის ქუჩაზე, იმ მისამართის გასწვრივ, სადაც ზურაბ პატარაძემ ბერიძეებს 10-სართულიანი სახლის მშენებლობაზე მერიასთან უშუამდგომლა, ორსართულიანი სახლებია. აქ ახალი მრავალბინიანი სახლის ხუთი სართულის კარკასი უკვე აშენებულია, მშენებელს სამშენებლო ტერიტორია თითქმის ათვისებული აქვს, ამიტომ გაურკვეველია, სად იგეგმება საბავშვო ატრაქციონის განთავსება.
დემეტრე თავდადებულის #109, აქ არ არის ადგილი საბავშვო ატრაქციონისთვის.
საინფორმაციო ბანერზე მითითებულ ტელეფონის ნომერზე ილია ბერიძემ გვიპასუხა. მან გვითხრა, რომ მშენებლობას მისი შვილები უძღვებიან. მან იცის, რომ სამშენებლო პროექტის ფარგლებში გათვალისწინებულია ერთი ღია პარკინგი, დახურულ პარკინგზე მას არაფერი სმენია, მან არაფერი იცის არც საბავშვო ატრაქციონზეც: „გავარკვევ და ხვალ გადმოგირეკავთ“ .
როგორც გაირკვა, კომპანიას დახურული პარკინგისთვის პატარა ადგილი აქვს გათვალისწინებული, ბესიკის ქუჩის მხრიდან, მაგრამ სულ რამდენი ადგილია პარკინგისთვის 10-სართულიან სახლში, კომპანია „ბათუმელებთან“ არ აზუსტებს. კომპანიაში „ბათუმელებს“ ისიც დაუდასტურეს, რომ საერთოდ არ აქვთ გათვალისწინებული საბავშვო ატრაქციონი.
მთავრობის თავმჯდომარემ ბათუმში, გორგილაძის #71/73-ში k2 კოეფიციენტის გაზრდაზე უშუამდგომლა ჯიმი დავითაძესაც. ამ მისამართზე კომპანია „ოლდ ბათუმმა“ სამშენებლო სამუშაოები უკვე დაიწყო. ზურაბ პატარაძის ინფორმაციით, ჯიმი დავითაძე ამ ადგილზე უსახური შენობების დემონტაჟის ხარჯზე 12-სართულიანი ახალი სახლის მშენებლობას გეგმავს. საჯარო რეესტრის მონაცემებით, ჯიმი დავითაძე „ოლდ ბათუმში“ მხოლოდ 20 პროცენტს ფლობს, დანარჩენი 80 პროცენტი კი ჯემალ პატარიძის საკუთრებაა.
აჭარის მთავრობის თავმჯდომარე მიიჩნევს, რომ ამ პროექტის განხორციელება ხელს შეუწყობს მიმდებარე ტერიტორიის მოწესრიგებას.
ლერმონტოვის ქუჩა #71/73
ზურაბ პატარაძემ კოეფიციენტის გაზრდაზე უშუამდგომლა ასევე სამშენებლო კომპანია „რეალ ბილდინგს“. პატარაძის ინფორმაციით, ეს კომპანია ასლან აბაშიძის ქუჩის #10-ში ერთი და ორსართულიანი უსახური შენობების ათვისების ხარჯზე 15-სართულიანი მრავალფუნქციური კომპლექსის მშენებლობას გეგმავს.
საერთო ჯამში, ზურაბ პატარაძესთან, მისი დანიშვნიდან დღემდე, შენობების სიმაღლეში გაზრდის რეკომენდაციის თხოვნით სულ 275 განცხადება შევიდა. აქედან, კომისიის რეკომენდაციის საფუძველზე, შუამდგომლობა პატარაძემ 62 კომპანიასა და ფიზიკურ პირს გაუწია.
ასლან აბაშიძის ქუჩა #10
2017 წლის თებერვლამდე პატარაძის მიერ გაცემულ შუამდგომლობებზე წაიკითხეთ აქ. .
მათ შორისაა „ოცნების“ შემწირველის კომპანია . ეს კომპანია ბათუმში, რუსთაველის ქუჩაზე, სასტუმრო „ჰილტონის“ მიმდებარედ, მრავალფუნქციური სასტუმრო კომპლექსის მშენებლობას გეგმავს.
