მერიამ შპს საკუთრების შემოღობვისთვის დააჯარიმა – კომპანიის საჩივარი

კომპანია „ავრასია ბათუმი საერთაშორისო უნივერსიტეტი“ [ყოფილი „სტარ“] ბათუმის მერის, ლაშა კომახიძის იმ წერილის გაუქმებას ითხოვს, რომელიც კომპანიის განცხადებით, „არ არის მართებული“. მერის უარი კომპანიამ ბათუმში, გოგებაშვილის 62-ში, მის საკუთრებაში არსებული ტერიტორიის შემოღობვის ნებართვაზე მიიღო. კომპანიაში  აცხადებენ, რომ მერის უარი დაუსაბუთებელია.

გოგებაშვილის ქუჩაზე, 62-ში მდებარე 6200 კვ/მ ტერიტორია [კათოლიკური ეკლესიის მიმდებარედ, პორტის ადმინისტრაციული შენობის წინ] 2017 წლის ნოემბრიდან, რეესტრის მიხედვით, კომპანია „სტარს“ ეკუთვნის, რომლის 100% წილის მფლობელი არის თურქეთის მოქალაქე ომერ ილდიზი.

ამ დროისთვის ტერიტორია ლითონის კონსტრუქციითაა შემოღობილი, რის გამოც კომპანია მერიის ზედამხედველობის სამსახურმა რამდენჯერმე დააჯარიმა. მერია ღობის დემონტაჟს ითხოვს.

ბათუმის მერის წერილი კომპანიას

„არსებული ტერიტორიის შემოღობვა ქ. ბათუმის მუნიციპალიტეტის მერიისთვის მიუღებელია“, – აღნიშნულია ბათუმის მერის, ლაშა კომახიძის წერილში.

რატომ არის მიუღებელი ბათუმის მერიისთვის ის, რომ კერძო კომპანიამ თავისი საკუთრება შემოღობოს? – ამ კითხვაზე პასუხი მერის წერილში არ არის.

„ბათუმელებმა“ მერიისგან წერილობით გამოითხოვა დოკუმენტაცია, თუ რის საფუძველზე უთხრეს კომპანიას საკუთარი ტერიტორიის შემოღობვაზე უარი? – კითხვაზე პასუხი მერიისგან მიღებულ ამ დოკუმენტებშიც არ არის.

ბათუმის მერიის ზედამხედველობის სამსახურის უფროსის, ზაალ მამუჭაძის თქმით, სამსახურმა კომპანია უკანონო მშენებლობისთვის ჯერ 3 000 ლარით დააჯარიმა, მოგვიანებით კი დამატებით 1 000 ლარით, რადგან სამუშაოები არ შეაჩერა. მისივე თქმით, მესაკუთრეს ღობის მშენებლობაზე ნებართვა მერიის არქიტექტურის სამსახურისგან უნდა ჰქონოდა.

მერიის არქიტექტურის სამსახურის ინფორმაციით, მესაკუთრემ მათ ნებართვისთვის დაახლოებით სამი კვირის წინ მიმართა, თუმცა შემოღობვაზე უარი უთხრეს. რის საფუძველზე უთხრეს უარი მესაკუთრეს საკუთრებაში არსებული ტერიტორიის შემოღობვაზე? – მერიის არქიტექტურისა და ურბანული დაგეგმარების სამსახურის უფროსის მოვალეობის შემსრულებლის, მირიან მეტრეველის თქმით, „ეს არის გამწვანებული ტერიტორია, ფაქტობრივად სკვერი, დამონტაჟებულია ატრაქციონები და არ უნდა შემოიღობოს“.

ტერიტორიას გოგებაშვილის 62-ში 2007 წლიდან ფლობდნენ შპს „რაკიინ დეველოპმენტი“, შემდეგ არაბული კომპანია „რას ალ ხაიმა ინვესტმენტ აუტორიტი ჯორჯია“ , შემდეგ „პრომეტკო ჯორჯია“, შემდეგ კი – „ბლექ სი ფროფერთისი“. შესაბამისად, ბათუმის მერიას ვკითხეთ, რატომ განათავსა თავის დროზე ატრაქციონები მერიამ სხვის საკუთრებაში არსებულ ტერიტორიაზე? – მერიისგან პასუხი ვერც ამ კითხვაზე მივიღეთ.

„რატომ უნდა დაჯარიმდეს კომპანია… იმიტომ, რომ უნებართვოდ მოახდინა ღობის მონტაჟი? ამ ნაწილში კომპანიამ შესაბამისი პროექტი წარადგინა მერიაში, თუმცა დასაბუთებული უარი აღნიშნულთან დაკავშირებით არ მიუღია. მერის წერილის თანახმად, მერიას პროექტის მიმართ შენიშვნები არ გააჩნია, უბრალოდ, ხსენებული ტერიტორიის შემოღობვა მერიისთვის მიუღებელია, რაც არასწორია – სამოქალაქო კოდექსის 181-ე მუხლით. შესაბამისად, თუ მერიას წარდგენილი პროექტის მიმართ შენიშვნები არ გააჩნდა, ხოლო ღობის აღმართვის უფლება დადგენილია კანონით, მერიის მოსაზრებით ნიშნავს, რომ ადგილი აქვს ფორმალურ, არაარსებით დარღვევას – ღობის მონტაჟის ნებართვის არარსებობას, რომელიც ვფიქრობთ ისედაც არ ესაჭიროებოდა კომპანიას, რადგან იგი ხსენებულ ტერიტორიაზე რაიმე სახის მშენებლობას არ უკავშირდებოდა“, – აღნიშნულია კომპანიის მიერ მერიაში გაგზავნილ ადმინისტრაციულ საჩივარში.

ამავე საჩივარში წერია: „მიწის ნაკვეთის მესაკუთრეს უფლება აქვს აღმართოს სასაზღვრო მიჯნა, უფრო მეტიც უფლება აქვს მეზობელი მიწის ნაკვეთის მესაკუთრეს მოსთხოვოს მონაწილეობის მიღება სასაზღვრო მიჯნის [ღობის] აღმართვაში – სამოქალაქო კოდექსის 181-ე მუხლი, შესაბამისად, ვთვლით, რომ სასაზღვრო მიჯნის აღმართვაზე უარი [ბათუმის მერის წერილი] არ არის მართებული და იგი უნდა გაუქმდეს.“

კომპანია ამ და სხვა არგუმენტებზე დაყრდნობით, ბათუმის მერიის ზედამხედველობის სამსახურის იმ დადგენილების შეჩერებას და ბათილად ცნობას ითხოვს, რომლითაც კომპანია დააჯარიმეს და ღობის დემონტაჟი მოსთხოვეს.

მიმდინარე წლის 22 იანვარს კომპანიის საფირმო სახელწოდება შეიცვალა. მესაკუთრის გადაწყვეტილებით, კომპანიის ახალი სახელია – „ავრასია ბათუმი საერთაშორისო უნივერსიტეტი“.

„ავრასია ბათუმი საერთაშორისო უნივერსიტეტის“ საკუთრებაშია აღნიშნულ ტერიტორიაზე მდებარე ყოფილი საზღვაო ბანკის შენობა, სადაც, „ბათუმელების“ ინფორმაციით, კომპანია საგანმანათლებლო დაწესებულების [ევრაზიის უნივერსიტეტის] გახსნას გეგმავს. არაერთი მცდელობის მიუხედავად, კომპანიას ვერ დავუკავშირდით.

კომპანიას მის საკუთრებაში არსებული ნაკვეთის შემოღობვის ნებართვას არ აძლევს ბათუმის მერია და ამ უარს, როგორც დოკუმენტებიდან ჩანს, არც ასაბუთებს. „გამწვანებული ადგილია“, აცხადებენ მერიაში, თუმცა უახლოეს წარსულში იყო ფაქტები, როცა ქალაქის მერიამ და აჭარის მთავრობამ ბათუმში სკვერის ნაწილიც გაასხვისა, ტროტუარიც და ქუჩაც კი. მოსახლეობის პროტესტის გამო ლორთქიფანიძის ქუჩის ნაწილი დარჩა ქუჩად, ჯავახიშვილისა და აბუსერიძის ქუჩების კვეთაში არსებული სკვერის ნაწილი განადგურდა და იქ მრავალსართულიანი კორპუსი შენდება. მშენებლობა დაიწყო ფიროსმანის ქუჩაზეც, სადაც ტროტუარი გადაკეტილია.

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com