სოფელი ფეხბურთის მოედნის გადაცემას ითხოვს

ქობულეთში საჩინოს თემის მოსახლეობა სოფლის ტერიტორიაზე მდებარე ფეხბურთის სტადიონის სოფლისთვის გადაცემას ითხოვს. მოსახლეობა აპირებს შესაბამისი თხოვნით მიმართოს აჭარის მთავრობის თავმჯდომარეს.

საჩინოს თემში შედის სამი სოფელი  – საჩინო, ზედა აჭყვა და ქვედა აჭყვა. მოედანზე, რომელიც სამივე სოფლის საკუთრებაა, საჩინოს სკოლასთან არსებული ჭაბუკ ფეხბურთელთა გუნდი კვირაში სამჯერ ვარჯიშობს. გუნდის მწვრთნელი, ემზარ ხალვაში ამბობს, რომ მისთვის მნიშვნელოვანია ბავშვებმა თავისუფლად შეძლონ მოედანზე შესვლა და ვარჯიში. ემზარ ხალვაში შიშობს, რომ თუ მოედანი სოფელს არ გადაეცემა, შესაძლოა ისევ განმეორდეს სცენარი და მოედანი კერძო მესაკუთრის ხელში გადავიდეს.

2008 წელს საფეხბურთო მოედანი ქობულეთის მუნიციპალიტეტის საკრებულოს საკუთრების უფლების აღიარების კომისიამ მოქალაქე ირმა ჩელებაძეს გადასცა. 9060 კვ.მ მიწის ფართობს ჩელებაძე რამდენიმე წელი ფლობდა.  მას შემდეგ, რაც ეს ამბავი მოსახლეობისთვის გახდა ცნობილი, საჩინოს მოსახლეობამ საკუთრების უფლების აღიარების კომისიას მიმართა.  2013 წელს მოქალაქე ჩელებაძეს საჩინოს საფეხბურთო მოედანზე საკუთრების უფლება გაუუქმდა.

„ეს მოედანი 1970 წელს დაარსდა. 105 მეტრის სიგრძის და 75 მეტრი სიგანისაა. მოედნის საფარი სილანარევია, ბუნებრივი დრენაჟი აქვს. საუკეთესო მონაცემები აქვს,  შეიძლება ითქვას. თუ სოფელს გადმოეცემა, ვიცი, რომ მერე სპონსორის მოძებნაც იქნება შესაძლებელი, ვინც ინფრასტრუქტურის მოწყობაში დაგვეხმარება. ახლა ჩვენთვის მთავარია ბავშვებს სათამაშო ადგილი არ წაართვან.  ვაპირებ აჭარის მთავრობას მივმართო ოფიციალური წერილით, რომ მოედანი საჩინოს თემს გადმოსცეს,” – ამბობს „ბათუმელებთან” საუბარში ემზარ ხალვაში.

„ბათუმელები” დაუკავშირდა აჭარის ფინანსთა და ეკონომიკის სამინისტროს. სამინისტროში განმარტეს, რომ საჩინოში მდებარე ფეხბურთის მოედანი სახელმწიფო ქონებაა და მას საქართველოს ეკონომიკის სამინისტრო განკარგავს. შესაბამისად, მოქალაქეებმა არა აჭარის მთავრობას, არამედ საქართველოს ეკონომიკის სამინისტროს უნდა მიმართონ წერილით.

საფეხბურთო მოედანი სოფელ საჩინოში.

ნეტგაზეთის მასალების სხვა გამოცემებში გადაბეჭდვის წესი


ავტორი