ზურაბ პატარაძე: სამინისტროების რაოდენობა აჭარაში შესაძლოა გაიზარდოს

საკონსტიტუციო ცვლილებებზე აჭარის უმაღლესი საბჭოს წევრები დღეს მთავრობის წარმომადგენლებს შეხვდნენ. აჭარის კონსტიტუციის ახალი რედაქცია, საბოლოო მიღების შემთხვევაში, ახალი სამთავრობო უწყებების შექმნის შესაძლებლობას იძლევა.

უმაღლესი საბჭოს თავმჯდომარე, დავით გაბაიძე ამბობს, რომ სამთავრობო უწყებების შექმნაზე ინიციატივის დაყენების უფლება აჭარის მთავრობის თავმჯდომარეს აქვს, თუმცა ის ადმინისტრაციული ხარჯების გაზრდის მომხრე არ არის.

დეპუტატებთან შეხვედრის შემდეგ აჭარის მთავრობის თავმჯდომარემ, ზურაბ პატარაძემ, ჟურნალისტებს უთხრა, რომ სამინისტროების რაოდენობა აჭარაში შესაძლოა გაიზარდოს. აჭარის მთავრობის თავმჯდომარეს არ დაუკონკრეტებია, რომელ სფეროში აპირებს მთავრობა ახალი უწყებების შექმნას.

„უფლებამოსილებები იზრდება, ხაზგასმით მინდა აღვნიშნო, თუნდაც სამინისტროების ოდენობის თვალსაზრისით, ჩვენვე განვსაზღვრავთ პრიორიტეტებს, თუ რა უნდა ერქვას, სფეროები რა უნდა იყოს, როგორ უნდა მოხდეს გადაჯგუფება უწყებების. როგორც კი საკონსტიტუციო კანონი იქნება მიღებული, ჩვენ მზად ვართ, ვიმსჯელოთ და მივიღოთ სწორი მოდელი. ჩვენ ვართ დაინტერესებული, რომ მაქსიმალური გაძლიერება მოხდეს ჩვენი ინსტიტუტების, როგორც აღმასრულებელი, ასევე საკანონმდებლო ორგანოსი,“ – აღნიშნა ზურაბ პატარაძემ.

 

ნეტგაზეთის მასალების სხვა გამოცემებში გადაბეჭდვის წესი


ავტორი