აჭარის მაღალმთიანეთში რამდენიმე თემს შუქი არ მიეწოდება

აჭარის მაღალმთიანეთში თოვს. თოვლის საფარი ხულოს მუნიციპალიტეტის დაბლობში 15 სმ-ს, ხოლო მაღალი ზონის სოფლებში 30 სმ-ს აჭარბებს, თოვს ქედასა და შუახევშიც.

მუნიციპალიტეტების მერიებში აცხადებენ, რომ მაღალი გამავლობის ავტომობილები ყველა მიმართულებით გადაადგილდება. რაც შეეხება შუქის მიწოდებას, ხულოს მერის მოადგილის, ლაშა ბოლქვაძის ინფორმაციით, ამ დროისთვის შუქი დიოკნისის, რიყეთისა და საციხურის თემებში არც ერთ სოფელს არ მიეწოდება, ხოლო დეკანაშვილების თემში – მხოლოდ რამდენიმე სოფელს. მისივე ინფორმაციით, მიმდინარეობს აღდგენის სამუშაოები.

„ელექტროენერგიის კუთხით გვაქვს შეფერხებები.  როგორც კომპანიის წარმომადგენლებმა მაცნობეს, ელექტროგადამცემი ხაზები დააზიანა ჩამოტეხილმა ხის ტოტებმა. რაც შეეხება გადაადგილებას, ამ კუთხით შეფერხებები არ გვაქვს, გზები ყველა მიმართულებით იწმინდება. 10 ერთეული ტექნიკა მუშაობს,“ – ამბობს ლაშა ბოლქვაძე.

შუქი არ მიეწოდება შუახევის მუნიციპალიტეტში, ჭვანის თემში შემავალ სოფლებს, შუახევის მერის, ფრიდონ ფუტკარაძის ინფორმაციით, უშუქობის გამო არ მუშაობს ამ თემში არსებული ჭალა-წყაროთის საბავშვო ბაღი. რაც შეეხეხება საავტომობილო გადაადგილებას, მერის თქმით: „გადაადგილება ყველა მიმართულებით შესაძლებელია, მაღალი ზონის სოფლებში თოვლის საფარი 30-40 სმ-ს აღწევს. ჭვანის ხეობაში დაზიანდა ელექტროენერგიის გადამცემი ხაზი, უშუქობის გამო კი ჭალა-წყაროთის ბაღი არ მუშაობს, რადგანაც ამ ბაღში გათბობა ელექტროენერგიაზეა.“

რაც შეეხება ქედის მუნიციპალიტეტს, მერიაში აცხადებენ, რომ შუქი ქედის ყველა სოფელს მიეწოდება და პრობლემები არც საავტომობილო გზებზეა.

დაბა ხულო

 

ნეტგაზეთის მასალების სხვა გამოცემებში გადაბეჭდვის წესი
ავტორი