„ყოფილი პოლიგონის განვითარება და საინვესტიციოდ მისი ეფექტური ათვისება ერთ-ერთი პრიორიტეტული მიმართულებაა“, – აცხადებენ აჭარის ფინანსთა და ეკონომიკის სამინისტროში, თუმცა „საკურორტო-სარეკრეაციო ადგილების ურბანული განვითარების პროგრამაში“ გონიო და ყოფილი პოლიგონის ტერიტორიის განვითარება არ შედის.
ამ პროგრამისთვის 3 270 000 ლარია ბიუჯეტში, გონიოსთან მიმართებაში კი, მხოლოდ გონიო-კვარიათის მთიანი ზონის დაგეგმარებაა გათვალისწინებული, რისთვისაც 270 ათასი ლარი დაიხარჯება. ბიუჯეტიდან არც მდინარე ჭოროხზე ახალი ხიდის მშენებლობაა დაფინანსებული.
„გონიოს განვითარების კონცეფციის დოკუმენტის შემუშავებაში, საქართველოს მთავრობის დაკვეთით, ჩართულია საერთაშორისო ორგანიზაცია „ქოლიერსი“. დაგეგმილია ასევე მნიშვნელოვანი ინფრასტრუქტურული პროექტი, კერძოდ, გონიოს ხიდის მშენებლობა. ტერიტორიისადმი ინტერესი საკმაოდ მაღალია და ამ ეტაპზე მიმდინარეობს მუშაობა, თუ რა ფორმით მოხდება აღნიშნული ტერიტორიის განვითარება“, – მოგვწერეს სამინისტროდან.
აჭარის მთავრობას მიმდინარე წლის ბიუჯეტის პროექტზე მუშაობისას უმაღლესი საბჭოს ოპოზიციურმა ფრაქციამაც შეახსენა, რომ „მიზანშეწონილია 2018 წელს მომზადდეს აღნიშნული ტერიტორიების დაგეგმარება. გვაინტერესებს გაგრძელდება თუ არა ახალი ბულვარის მშენებლობა და განვითარება, გონიოს სასეირნო ბილიკის კეთილმოწყობა, მათ შორის ველოგზისა და ველოსიპედების ტერმინალის მოწყობა, დასასვენებელი, სარეკრიაციო ზონების მოწყობა და სხვა“.
მთავრობის ოფიციალური პასუხი ოპოზიციის შენიშვნაზე მაშინაც ზოგადი იყო: „ქალაქ ბათუმში ადლიის დასახლებაში თავისუფალი ტერიტორიების შემდგომი განვითარება წარმოადგენს კომპლექსურ საკითხს, რაც უკავშირდება ჭოროხის შესართავთან, ორივე მხარეს არსებული ტერიტორიების შემდგომი გამოყენების ქალაქმშენებლობით, გარემოს დაცვით საკითხებს და ეკოლოგიური ბალანსის შენარჩუნებას. აღნიშნულიდან გამომდინარე მითითებულ ტერიტორიებზე ნაჩქარევი დაგეგმარებითი პროექტების განხორციელება მიზანშეწონილად არ მიგვაჩნია. საკითხზე მსჯელობა მიმდინარეობს, გადაწყვეტილება მიღებული იქნება საჯარო მსჯელობის საფუძველზე. ამავე საკითხის შემადგენელ ნაწილს წარმოადგენს ქალაქ ბათუმის ახალი ბულვარისა და გონიოს სანაპირო ზოლის მდინარე ჭოროხზე დამაკავშირებელი ხიდის მშენებლობა“.
საჯარო მსჯელობა, როგორც აჭარის ფინანსთა და ეკონომიკის სამინისტროში გვითხრეს, არ დაწყებულა. შესაბამისად, სამინისტროს არ აქვს პასუხი, თუ როდის და როგორ განხორციელდება ადლია-გონიოს სანაპირო ზოლის დაგეგმარება და მისი განვითარება.
რაც შეეხება გონიოს განვითარების გეგმას – მასზე მუშაობა 2014 წელს დაიწყო. ეს გეგმა აჭარის ფინანსთა და ეკონომიკის და საქართველოს ეკონომიკისა და მდგრადი განვითარების სამინისტროების საინვესტიციო პროექტების ჩამონათვალშია. გეგმა 2016 წელსაც მზად იყო, თუმცა სამინისტროები მას არ ასაჯაროებდნენ.
ამ გეგმით, რომელიც, სამინისტროების ინფორმაციით, შემუშავდა Colliers International-სა და HOK-თან ურთიერთთანამშრომლობის საფუძველზე, გონიოში მრავალფუნქციური კურორტის განვითარება 315 ჰექტარ მიწის ნაკვეთზეა შესაძლებელი.
[checklist]
- 25.6 ჰექტარი ფართობის ტბა ტერიტორიის შუაგულში. ტბა განაპირობებს საცხოვრებელ ზონაში არსებულ ფართობზე ფასების ზრდას
- რეკრიაციული და გადამფრენ ფრინველებზე დაკვირვების ზონები მდინარე ჭოროხსა და ტბის მიმდებარე ტერიტორიაზე [მოიცავს მთლიანი ტერიტორიის 30%-ს] რჩება ხელუხლებელი და გარშემორტყმულია პარკით და სასეირნო ბილიკებით
- ღია და დახურული საცურაო აუზები.
- 5.6 ჰექტარი პლაჟი
- საზღვაო სასტუმროები და აპარტ-ოტელები
- სამორინე
- ტერიტორია დასვენებისა და სპორტული აქტივობებისთვის
- ზღვისპირა ბულვარი
- გონიოს ციხე
- საცხოვრებელი ტერიტორია
[/checklist]
გონიოს ყოფილი პოლიგონისა და აეროპორტის ასაფრენი ზოლის მიმდებარედ არსებული ტერიტორიები ქალაქ ბათუმის საზღვრებში შედის. თუმცა ეს ტერიტორიები აჭარის ავტონომიური რესპუბლიკის საკუთრებაშია და მას აჭარის მთავრობა/ფინანსთა და ეკონომიკის სამინისტრო განკარგავს.
ყოფილი პოლიგონის 315 ჰექტარი ტერიტორია, რომლის გადაცემა იგეგმება ინვესტორებზე
გონიოს განვითარების გეგმა / ხიდი მდინარე ჭოროხზე /
ამავე თემაზე:
https://batumelebi.netgazeti.ge/news/99034/
