სიახლეები

ხუთი ყველაზე ძვირადღირებული სასტუმრო ბათუმში

14.07.2015 • 13044
ხუთი ყველაზე ძვირადღირებული სასტუმრო ბათუმში

 

სასტუმრო „ინტურისტი“:

ამ სასტუმროში ყველაზე იაფი ნომერი ივლისი-აგვისტოს თვეში 165 დოლარი ღირს – ეს ერთადგილიანი ნომრის ფასია. ორადგილიანი სტანდარტული ნომერი კი 195 დოლარი ღირს „ინტურისტში“.

 

„ინტურისტს“ აქვს უმაღლესი სტანდარტის ორი ნომერი – „გაუმჯობესებული დიზაინისა და ლუქსის კატეგორიის ორადგილიანი პრემიერ-მინისტრის ნომერი“, რომელიც 1062 დოლარი ღირს. ასევე აქვს იმავე კომფორტის ორადგილიანი საპრეზიდენტო ნომერი, რომელიც ერთი ღამით 2124 დოლარი ღირს.

 

სასტუმრო „რედისონ ბლუ ბათუმში“:

„რედისონს“ ბათუმში 168 ნომერი აქვს. სასტუმროს ვებგვერდზე განთავსებული პრაისის მიხედვით, მინიმალური თანხა, რაც ამ სასტუმროში ადამიანს ერთი ღამის გათევისთვის სჭირდება – 130 დოლარია, თუმცა ამ ფასში არ შედის საუზმე. ბიზნესკლასის ნომერი აქ 190 დოლარი ღირს, ხოლო სპა ლუქსი, რომელშიც საუზმეც მოიაზრება – 270 დოლარი. სასტუმრო „რედისონს“ ასევე აქვს საპრეზიდენტო აპარტამენტებიც, თუმცა ფასის შესახებ არაფერი აქვს თავის ვებგვერდზე მითითებული.

 

სასტუმრო „ჰილტონი“ ბათუმში:

სასტუმრო „ჰილტონს“ სულ 247 ნომერი აქვს. ჩვეულებრივი მოკვდავებისთვის აქ ფასები 147 დოლარიდან იწყება (კვების გარეშე) და 345 დოლარს აღწევს – ამ ფასში კვებაც მოიაზრება.

 

ყველაზე ძვირადღირებული ნომერი „ჰილტონში“ – საპრეზიდენტო აპარტამენტები, ერთი ღამით 1945 დოლარი ღირს, რომელშიც მხოლოდ საუზმე შედის. იგივე ნომერი ორჯერადი კვებით ღირს 2100 დოლარი.

 

სასტუმრო „შერატონი“ ბათუმში:

„შერატონს“ ბათუმში 202 ნომერი აქვს. სეზონზე ჩვეულებრივი მოკვდავებისთვის ერთი ნომერი 200 დოლარი ღირს, ხოლო ორადგილიანი ნომერი – 240 დოლარი.  არასეზონურად იგივე ნომრები 160 და, შესაბამისად, 200 დოლარი ღირს. ამ სასტუმროში ორადგილიანი ნომრის ფასი სეზონზე, რომელსაც ტერასა აქვს, 500 დოლარი ღირს.

 

შერატონს აქვს საპრეზიდენტო ნომერიც, რომლის არსებობისა და ღირებულების შესახებ ინფორმაცია ონლაინ სივრცეში „ბათუმელებმა ვერ მოიძია. წინა წლების მონაცემებით, ამ სასტუმროში საპრეზიდენტო ნომერი მინიმუმ 2000 დოლარი ღირს.

 

სასტუმრო ლეო გრანდი:

ეს სასტუმრო, ისე როგორც „ჰილტონი“, სულ ახლახანს გაიხსნა, სასტუმროს აქვს 180 ნომერი. ყველაზე იაფი ერთადგილიანი ნომერი „ლეო გრანდში სეზონზე 130 დოლარი ღირს. რიგითი მოკვდავებისთვის ყველაზე იაფი ორადგილიანი ნომერი ამ სასტუმროში 150 დოლარი ღირს.

 

„ლეო გრანდს“ აქვს საპრეზიდენტო აპარტამენტებიც, რომელიც 2000 დოლარი ღირს.

გადაბეჭდვის წესი


ასევე: