ბათუმის მერი, ლაშა კომახიძე, არ ასახელებს ორგანიზაციას, რომელთანაც, მისივე თქმით, მოლაპარაკებები აქვს რამდენიმე მილიონის გამოყოფასთან დაკავშირებით, ბათუმში კულტურული მემკვიდრეობის ძეგლებისა და ძეგლის დაცვის ზონაში მდებარე ისტორიული სახლების გადასარჩენად. ამ ორგანიზაციაზე მან სოციალურ ქსელში გამოქვეყნებულ პოსტში დაწერა, სადაც პასუხი გასცა „ბათომს “ ღია წერილზე. „ბათუმელებმა“ ლაშა კომახიძეს კიდევ რამდენიმე საკითხის დაზუსტება სთხოვა.
ბატონო ლაშა, მინდა გთხოვოთ რამდენიმე საკითხის დაზუსტება თქვენი წერილიდან, „ბათომის“ საპასუხოდ რომ გამოაქვეყნეთ სოციალურ ქსელში.
დიახ, მე უკვე გავეცი „ბათომს“ პასუხი. მე ნამდვილად მაქვს პრეტენზია იმაზე, რომ ახალი თვითმმართველობა, ახალი მერია ზრუნავს ქალაქის განაშენიანებაზე, მისი ისტორიული და კულტურული ნაწილის შენარჩუნებასა და განვითარებაზე. სამწუხაროდ, გარკვეული მემკვიდრეობითი ნაწილი ნებართვებისა, რომელიც ჩვენც არ მოგვწონს, ძველი გაცემულია და ვცდილობთ სამართლებრივ ჩარჩოში მოვაქციოთ, კანონის მიხედვით გავაკეთოთ მათზე რეაგირება. ჩვენ არა გვაქვს უფლება, რომ ხელაღებით გავაჩეროთ [გაცემული ნებართვები]. ამას აქვს თავისი პროცედურები, თავისი სამართლებრივი ნაწილი და გვინდა, რომ ეს ყველაფერი დაცული იყოს. ის, რომ არ გამოვდივართ საჯარო სივრცეში და ყოველ ასეთ შემთხვევაზე ისტერიკას არ ვმართავთ, თუ რამდენად არ მოგვწონს ჩვენც და რა ნაბიჯებს ვდგამთ, ეს იმას არ ნიშნავს, რომ ერთ ადგილზე ვართ და არაფერს არ ვაკეთებთ.
ძალიან მნიშვნელოვანი გადაწყვეტილებები გვაქვს მიღებული, გეგმები გვაქვს შემუშავებული და ამ ყველაფრის პრეზენტაციას შემდეგ კვირაში გავაკეთებთ, სადაც დავპატიჟებთ არასამთავრობოებს, „ბათომსაც“ და მედიას. რეალურად გაჩვენებთ, რომ ამ ორი თვის განმავლობაში, ჩემი უფლებამოსილების დაწყებიდან, მნიშვნელოვანი გადაწყვეტილებები შევიმუშავეთ, რაც არ მიღებულა მუნიციპალიტეტის ისტორიაში. შესაბამისად, იმედი მაქვს, რომ აი ამ შეხვედრის შემდეგ, საბოლოოდ, ბათუმის მერიისგან მტრის ხატის შექმნას წერტილი დაესმება და ბევრი ადამიანისათვის გასაგები გახდება, რომ ჩემი ხელმძღვანელობის დროს სხვაგვარი მიზნები და მოწოდებები გვაქვს, რომ გვიყვარს ეს ქალაქი და ვცდილობთ ამ ქალაქისათვის სასიკეთო საქმეების კეთებას. ჩვენ გვაქვს ძალიან ბევრი ინიციატივა და ასევე დარწმუნებული ვარ, რომ ძალიან ბევრს შერცხვება ამის გაცხადების შემდეგ.
ამ დრომდე არსებული პრაქტიკით ბათუმში ნებართვის გამცემი ორგანოები არასოდეს ამბობენ უარს ისტორიული სახლების ნგრევაზე.
პრაქტიკა არსებობს ჩემს უფლებამოსილებამდე, მე მაგ ნაწილზე არ ვსაუბრობ, არის შენობები, რომლებზეც ჩემი უფლებამოსილების დაწყებამდეა გაცემული [ნებართვა]. ვმოქმედებთ კანონის ფარგლებში, ამაზე მეტს ჩვენ ვერ გავაკეთებთ და თუ რას ვმოქმედებთ, როგორ ვაკეთებთ, რა ნაბიჯებს ვდგამთ ქალაქის სასიკეთოდ, ამაზე ვისაუბრებთ შემდეგ კვირაში, შეხვედრაზე.
მინდა გკითხოთ დონორ ორგანიზაციაზე, რაზეც თქვენს სტატუსში საუბრობდით.
არაფერს ამაზე მეტს არ გეტყვით იმიტომ, რომ…
მაშინ მხოლოდ ის გვითხარით, გაქვთ თუ არა თანხმობა ამ ორგანიზაციიდან?
ეს არის სამუშაო პროცესი, ეს არის რეალურად ბათუმისთვის გამოყოფილი გრანტი, დადასტურებული გრანტი, რომელსაც მე ვცდილობ, რომ სხვა მიმართულებიდან მივმართო ამ მიმართულებაზე იმიტომ, რომ ეს ჩემთვის არის პრიორიტეტი. მართალია, ზოგიერთს ეჭვი აქვს, მაგრამ სწორედ იმის გამო, რომ ჩემთვის კულტურული და ისტორიული განაშენიანება, ბათუმზე ზრუნვა არის ნომერ პირველი პრიორიტეტი, მაქსიმალურს ვაკეთებ იმისათვის, რომ ეს თანხა მივმართო სწორედ ამ კუთხით და მოვახმარო ამ საქმეს.
ამბობთ, რომ ამაზე თანხმობა გაქვთ?
ვამბობ, რომ ეს არის სამუშაო პროცესი დონორებთან, თანხმობა მაქვს თანხის გამოყოფაზე, მაგრამ მოხმარდება თუ არა ეს კულტურულ და ისტორიულ განაშენიანებას, ეს არის მუშა პროცესი. ამ ეტაპზე ეს გათვლილია საკმაოდ კარგ ვარიანტად, მე სტატუსში მიწერია, რომ ეს ადვილი არ არის და ამას სჭირდება დრო, მაგრამ ამ ეტაპზე ეს ჩათვლილია, როგორც კარგი ვარიანტი თანხის განკარგვის. შესაბამისად, ეს გაგრძელდება არა ერთი თუ ორი თვე, უფრო მეტიც. როდესაც ამხელა თანხებზე, ამხელა გრანტზეა საუბარი, შესაბამისად, პროცედურები საკმაოდ ხანგრძლივია. თუმცა, ეს არ არის ერთადერთი საშუალება გრანტების მოპოვების. შემიძლია გითხრათ, რომ ჩემი გამოცდილებიდან გამომდინარე მაქსიმუმს გავაკეთებ და დარწმუნებით შემიძლია გითხრათ, რომ ამ კუთხით სახელმწიფო ბიუჯეტით და გრანტითაც შევძლებთ ქალაქს მოვახმაროთ ეს.
რამდენ მილიონზეა საუბარი ის მაინც რომ თქვათ?
არ მინდა ზედმეტ დეტალებზე საუბარი. ის ინფორმაცია აბსოლუტურად საკმარისია, რომ ეს არის რამდენიმე მილიონი.
საუბრობთ იმ შენობებზე, რომლებიც სახელმწიფოს საკუთრებაშია, თუ კერძო საკუთრებაზეც?
მე ვლაპარაკობ ძველი ბათუმის ტერიტორიაზე, სადაც ყველაზე დიდი სიმრავლე გვაქვს კულტურული ძეგლების, კონკრეტულად, კულტურული ძეგლის სტატუსის მქონე ობიექტების რეაბილიტაციაზე.
რაც შეეხება ძეგლებთან მიმდებარედ არსებულ ისტორიულ შენობებს?
ამასთან მიმართებაში ჩვენს გადაწყვეტილებას გავაჟღერებთ კონკრეტულად იმ შეხვედრაზე, რომელსაც შემდეგ კვირაში ჩავატარებთ.
