შვიდ ეკომიგრანტ ოჯახს აჭარაში დღეს საცხოვრებელ ფართობს გადასცემენ

შვიდ ეკომიგრანტ ოჯახს აჭარაში საცხოვრებელი ფართობები დაურეგისტრირდება „ეკომიგრანტი ოჯახების საცხოვრებლით უზრუნველყოფის“ 2018 წლის პროგრამის ფარგლებში.

აჭარის ჯანდაცვის სამინისტროს ინფორმაციით, საცხოვრებელი ფართობების რეგისტრაციის პროცედურა იუსტიციის სახლში დღეს, 23 იანვარს, გაიმართება. საცხოვრებელი ფართობების დაკანონების პროცესს აჭარის ჯანდაცვის მინისტრი, ზაალ მიქელაძე დაესწრება.

„ეკომიგრანტი ოჯახების საცხოვრებლით უზრუნველყოფის“ პროგრამის ბიჯეტი 3 000 000 ლარს შეადგენს. პროგრამით გათვალისწინებულია 115-მდე სახლის ან ბინის შეძენა. პროგრამა თანადაფინანსებით ხორციელდება და თითოეულ ოჯახზე გათვალისწინებულია 25 000 ლარი.

პროგრამა 2016 წელს ამოქმედდა. სამინისტროს ინფორმაციით, მას შემდეგ უსაფრთხო საცხოვრისი 207-მა ოჯახმა შეიძინა.

________________________________

მთავარ ფოტოზე: ეკომიგრანტებისთვის საცხოვრებელი ფართობის რეგისტრაცია. ფოტო აჭარის ჯანდაცვის სამინისტროს არქივიდან.

ნეტგაზეთის მასალების სხვა გამოცემებში გადაბეჭდვის წესი


ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com