ქედის საკრებულო კომისიის წევრებს საწვავს პირადი ავტომობილებისთვის გამოუყოფს

ქედის მუნიციპალიტეტის საკრებულოს თავმჯდომარის, შუქრი თურმანიძის ინფორმაციით, საკრებულოს კომისიებს  გადაადგილებისთვის ყოველთვიურად საწვავის ხარჯი გამოეყოფა, თითოეულ კომისიას თვეში 80 ლიტრი.

ქედის საკრებულოს ბალანსზე ამ დროისთვის ორი სახელმწიფო ავტომობილი ირიცხება, მათგან ერთი საკრებულოს თავმჯდომარეს, მეორე კი მის მოადგილეს ემსახურება. შესაბამისად, დღემდე ქედის სკარებულოში საწვავის ხარჯი ამ ორი ავტომობილისთვის იყო გაწერილი.

შუქრი თურმანიძე განმარტავს, რომ ადგილობრივი ბიუჯეტის თანხით კომისიებს მთლიანობაში ყოველთვიურად 400 ლიტრამდე საწვავი გამოეყოფა. საწვავს კომისიის წევრები კი პირად საკუთრებაში არსებული ავტომობილებით მოიხმარენ.

„წინა წელთან შედარებით საწვავის ხარჯი მცირედით გაზრდილია, ხუთივე კომისიას საკუთარი საწვავის ხარჯი ექნება, შესაბამისად, ამან გამოიწვია ზრდა. კომისიები საკუთარი საქმით დაკავდებიან და არ იქნება კაბინეტური მუშაობა. საკრებულოს ევალება საბიუჯეტო ხარჯების კონტროლი და მიზნობრივი გამოყენება, საწვავის გამოყენებას პირად საკუთრებაში არსებული ავტომობილებით შეძლებენ, კანონი ამას არ კრძალავს, ყველა ინსტანციაში გარკვევულია ეს საკითხი,“ – აცხადებს შუქრი თურმანიძე.

ქედის მუნიციპალიტეტის საკრებულოს 2018 წლის ბიუჯეტი გასულ წელთან შედარებით 28 620 ლარით არის გაზრდილი. თუ გასულ წელს  საკრებულოს მთლიანი ბიუჯეტი  504 000 ლარი იყო, წელს  532 620 ლარია გაწერილი.

ნეტგაზეთის მასალების სხვა გამოცემებში გადაბეჭდვის წესი
ავტორი