შოთა გუჯაბიძე: „მერმა გადაწყვიტა, საკონტროლო გასროლით მოვეთავებინეთ“

„რატომ ცდილობთ შექმნათ აგრესიული ფონი?“, „თანამშრომლობისთვის გამოწვდილ ხელს კბენთ და ღრღნით?!“, „მე თქვენზე ჯერ ხელი არ ჩამიქნევია“, – ეს არის ის ციტატები ფეისბუქზე დაწერილი ვრცელი პოსტიდან, რითაც ბათუმის არჩეულმა მერმა საზოგადოება „ბათომის“ წევრების მიმართ. ამის მიუხედავად ლაშა კომახიძე წერს, რომ „ეს იყოს პროლოგი მომავალი შეხვედრისთვის“.

ლაშა კომახიძემ პოსტი კულტურული მემკვიდრეობის დამცველ ორგანიზაციას მას შემდეგ მიუძღვნა, რაც გუშინ, 22 იანვარს, „ბათომმა“ მას ღია წერილით მიმართა.

„ბათომის“ წევრი, შოთა გუჯაბიძე, ლაშა კომახიძის საპასუხო პოსტს არ განიხილავს მერის ოფიციალურ პასუხად. ის მიიჩნევს, რომ ლაშა კომახიძეს ამ წერილით „ბათომის“ გაუვნებელყოფა სურდა და მერი ახლა თავს გამარჯვებულად მიიჩნევს:

„ვერ მივხვდი, იყო თუ არა ეს ჩვენი წერილის პასუხი, უბრალოდ, ეს იყო ადამიანი, რომელიც გაღიზიანდა იმის გამო, რომ შევბედეთ კრიტიკა და გადაწყვიტა დავეტუქსეთ. აქ [პოსტში] არაფერი საქმიანი არ იყო გარდა იმისა, რომ აპირებს გრანტების მოპოვებას, მაგრამ შენობები დანგრეულია და მე ჩემი თვალების უფრო მჯერა, ვიდრე მისი სიტყვების. ვფიქრობ, ეს არის სწორედ არასერიოზული დამოკიდებულება. თუკი, ვთქვათ, ჩვენ სერიოზულად მივაჩნივართ, მე მგონი უნდა დაუშვას, რომ რაღაც ჩვენც ვიცით, მინიმუმ ვიცით კანონი. თვითონ ისტორიულ შენობას არც თუ ისე სერიოზულად უყურებს, გამოდის, რომ არ იცის“.

შოთა გუჯაბიძე მერის მიერ ვრცელი პოსტის გამოქვეყნებას „პოპ-ვარსკვლავის ჟანრში“ ლაპარაკს ადარებს, „როცა სავალდებულო კი არ არის კარგად იმღერო, მთავარია თქვა, რომ კარგად მღერი. ეს ბელეტრისტიკულ ჟანრში გადაიტანა. პრობლემა კი მაინც რჩება პრობლემად და არაფერი არ კეთდება“.

„ის ფიქრობს, რომ ჩვენზე უკვე გაიმარჯვა და გადაწყვიტა, რომ ბოლოს საკონტროლო გასროლით მოვეთავებინეთ და გავეუვნებელვყავით.  როგორც მისი „მრევლი“ უწერს, ხოტბას ასხამს კომენტარებში, ეტყობა ჰგონიათ, რომ ამას მიაღწიეს,“ – ამბობს შოთა გუჯაბიძე.

ბოლო კვირის განმავლობაში ბათუმში რამდენიმე ისტორიული, ფონური ნაგებობის დანგრევა დაიწყო, მათ შორის მე-19 საუკუნეში აგებული ბელეტაჟის დემონტაჟი ფარნავაზ მეფის ქუჩაზე. ამ ადგილას შვიდსართულიანი სახლის აშენება იგეგმება. ასევე, ანგრევენ მე-19 საუკუნეში აგებულ, ერთსართულიან, ფონურ შენობას ზვიად გამსახურდიას ქუჩაზე, სადაც ხუთსართულიანი სახლის აგება იგეგმება.

ორგანიზაცია „ბათომი“, რომლის ერთ-ერთი დამფუძნებელი შოთა გუჯაბიძეა, წლებია ბათუმში კულტურული მემკვიდრეობის დაცვის საკითხებზე მუშაობს.

ნეტგაზეთის მასალების სხვა გამოცემებში გადაბეჭდვის წესი
ავტორი