ცნობილი მწერლების უცნობი ბავშვობა

როგორები იყვნენ მწერლები ბავშვობაში, რა ცხოვრება გაიარეს და ჩანს თუ არა ხშირად წიგნებში ავტორის ბავშვობა, როგორც მნიშვნელოვანი პერიოდი? როგორი ბავშვი იყო მსოფლიოს ყველა ბავშვისთვის საყვარელი ასტრიდ ლინდგრენი, რამ მოახდინა გავლენა მარკესის მაგიურ რეალიზმზე ან რა გაიარა რეი ბრედბერიმ ისეთი, რამაც „ბაბუაწვერას ღვინო“ შთააგონა?

1. რეი ბრედბერი

ფოტო: liberalarts.iupui.edu

ბრედბერის წიგნი „ბაბუაწვერას ღვინო“ ვრცელი ამბავია იმაზე, თუ როგორი ბავშვობა ჰქონდა მწერალს თავად. ბევრი ამბავი, რაც რომანში დაგლას სპოლდინგის გმირს თავს გადახდება, ნამდვილია. ილინოისიც, რომელიც რომანშია აღწერილი, რეი ბრედბერის მშობლიური შტატია.

სხვა მწერლების მსგავსად ბრედბერიმაც ბავშვობის ბევრი ტრავმა და შთაბეჭდილება აღწერა სხვადასხვა რომანში. ჯერ მწერლის ტყუპი ძმებისგან ერთ-ერთი, სემი გარდაიცვალა, შემდეგ კი – და, ელიზაბეტი.

ილინოისის შტატის ქალაქ უოკიგანში მცხოვრები ბრედბერები ღარიბები იყვნენ. მშობლებს არ ჰქონდათ საშუალება, 19 წლის რეის სკოლის დამთავრების შემდეგ კოლეჯში რომ გაეგრძელებინა სწავლა. როგორც მწერალი მოგონებებში წერს, 19-დან 27-წლამდე კვირაში სამ დღეს ბიბლიოთეკაში ატარებდა და უნივერსიტეტში სწავლის სანაცვლოდ 27 წლისას უკვე მთელი ბიბლიოთეკა ჰქონდა ათვისებული. 

1.ერნესტ ჰემინგუეი

ფოტო: librarycamden.org

ერნესტ ჰემინგუეი ჩიკაგოს გარეუბანში დაიბადა 1899 წლის 21 ივლისს. მამა ფსიქიატრი ჰყავდა, დედა – მუსიკოსი, ვისი გავლენითაც მომავალი მწერალი უმცროს დასთან, მარსელინასთან ერთად ორი წელი უკრავდა სკოლის ორკესტრში. პატარა ერნესტი ბავშვობიდანვე გატაცებული იყო სპორტით. დადიოდა წყალბურთზე, ფეხბურთზე, კრივზე და სრიალებდა თხილამურებით. სპორტი მომავალში მნიშვნელოვან ადგილს დაიკავებს ჰემინგუეის რომანებში. წერა მან სკოლის გაზეთისთვის დაიწყო, სკოლის დამთავრებისთანავე კი რეპორტიორად დაიწყო მუშაობა და მალევე გაემგზავრა ევროპაში.

2.მარკ ტვენი 

ფოტო: steamboattimes.com

როგორი იყო ბავშვობაში ტომ სოერის და ჰეკლბერი ფინის ავტორი? ასეთი, როგორსაც ფოტოზე ხედავთ. მარკ ტვენის, იმავე სამუელ კლემენსის ეს ფოტო 1850 წელსაა გადაღებული, მომავალი მწერალი ამ დროს 15 წლისაა. მარკ ტვენი ფლორიდის შტატ მისურიში დაიბადა 1835 წელს. როცა ის 4 წლის იყო, მშობლები საცხოვრებლად იმავე შტატის, მისურის ქალაქ ჰანიბალში გადავიდნენ, ქალაქში, რომლის მცხოვრებლებიც ტვენმა მოგვიანებით „ტომ სოიერის თავგადასავალში აღწერა“.

3. ასტრიდ ლინდგრენი

ფოტო: pinterest.com

ყველასთვის საყვარელი ასტრიდ ლინდგრენი შვედეთის პატარა ქალაქ ვიმერბიუში დაიბადა. უზრუნველმა ბავშვობამ, ბუნებასთან ახლო ურთიერთობამ და მშობლების უზომო სიყვარულმა ლინდგრენს მისცა შესაძლებლობა, ბავშვობის იდილიური პერიოდის შთაბეჭდილებები და ამბები სამომავლოდ მთელი მსოფლიოსთვის გაენაწილებინა. პეპის, კარლსონის, ბიულერბიუელი ბავშვების და სალტკროკელების ისტორიების ავტორს მშობლებსა და მათ დიდ სიყვარულზე შვილების მიმართ წიგნიც აქვს დაწერილი – „სამუელ ავგუსტი სევედსტორპიდან და ჰანა ჰულტიდან“. ასტრიდი ორ დასთან, სტინასთან და ინგეგერდთან ერთად იზრდებოდა. მის ცნობილ წიგნში – ,,ჩვენც სალტკროკელები ვართ“ სტინა ერთ-ერთი ყველაზე საყვარელი პერსონაჟია.

4. უმბერტო ეკო 

ფოტო: pinterest.com

იტალიელი მწერალი, ფილოსოფოსი, კულტუროლოგი და სემიოტიკოსი, უმბერტო ეკო ჩრდილოეთ იტალიის პატარა ქალაქ ალესანდრიაში დაიბადა. მის ოჯახს მატერიალურად არ ულხინდა და მშობლებს სურდათ ეკოს იურისპონდენცია შეესწავლა, რაც სამომავლოდ მატერიალური უზრუნველყოფის გარანტად მიაჩნდათ. თუმცა ეკომ შუასაუკუნეების ლიტერატურისა და ფილოსოფიის სწავლა არჩია. ქართულ ენაზე უმბერტო ეკოს არაერთი წიგნია თარგმნილი.

5. ანტუან დე სენტ ეკზიუპერი 

ფოტო: lesailesdupetitprince.fr

„პატარა უფლისწულის“ ავტორი ასწლეულის დასასრულს, 1900 წელს დაიბადა მრავალშვილიან ოჯახში. ეგზიუპერს ერთი და და ხუთი ძმა ჰყავდა. განსაკუთრებული ურთიერთობა ჰქონდა დედასთან, რომელიც 7 შვილს მეუღლის გარდაცვალების შემდეგ მარტო ზრდიდა. თავიდან განათლება საფრანგეთის იეზუიტურ სკოლასა და შვეიცარიის კათოლიკურ პანსიონში მიიღო, შემდეგ ნატიფი ხელოვნების სკოლაში არქიტექტურის ფაკულტეტი დაამთავრა. მისი, როგორც მწერლის ცხოვრება მას შემდეგ დაიწყო, რაც ჯარში გაიწვიეს და მფრინავი გახდა. ამ დროიდან იწყებს ის აქტიურად წერას. მის რომანებში „ადამიანთა მიწა“ და „სამხედრო მფრინავი“ სწორედ ეს პერიოდი აღწერა მწერალმა.

6. გაბრიელ გარსია მარკესი

ფოტო: gabo.elheraldo.co

გარსია მარკესი კოლუმბიის ქალაქ არაკატაკაში დაიბადა. მაგიური რეალიზმის წარმოსახვითი, ცრურწმენებით სავსე, ზღაპრული სამყარო მარკესმა საკუთარი ოჯახის მაგალითზე შექმნა. მწერალზე დიდი გავლენა მოახდინა პაპა-ბებიამ. პაპამისი კოლუმბიის ათასდღიანი ომის ვეტერანი იყო და დიდი პატივით სარგებლობდა კოლუმბიელ ლიბერალებს შორის. პაპის პროტოტიპია „მარტოობის ას წელიწადში“ დაუსრულებელი რევოლუციების გმირი, ხოსე არკადიო ბუენდია.

ბებია ტრანკილინა იგუარანის სახე კი იმავე რომანში ურსულა ბუენდიაა. ბებიის ცრურწმენები და წარმოსახვითი, ზებუნებრივი ხედვის ნიჭი მარკესის შთაგონების წყაროდ იქცა. მწერლის ბოლო, ავტობიოგრაფიულ რომანში – „იცხოვრო, რომ მოჰყვე“ დაწვრილებითაა აღწერილი არაკატაკაში გატარებული ბავშვობა და კოლუმბიის ეგზოტიკური გარემო რეალური, სახალისო გმირებით.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან