მთავარი,მთიანი აჭარა,სიახლეები

„ქართულმა ოცნებამ“ ქედის საკრებულოში კიდევ ორი ფრაქცია შექმნა

22.01.2018 • 2206
„ქართულმა ოცნებამ“ ქედის საკრებულოში კიდევ ორი ფრაქცია შექმნა

„ქართულმა ოცნებამ“ ქედის მუნიციპალიტეტის საკრებულოში ორი ახალი ფრაქცია: „ქართული ოცნება – მრეწველები“ და „ქართული ოცნება – კონსერვატორები“ შექმნა. ახალი ფრაქციები სამ-სამი წევრით არის წარმოდგენილი.

„ქართული ოცნება – მრეწველების“ ფრაქციის წევრები არიან: ტარიელ მანველიძე, მზია ბოლქვაძე და ოთარ ბოლქვაძე, ხოლო ფრაქცია  „ქართული ოცნება – კონსერვატორებს“ წარმოადგენენ: როსტომ შერვაშიძე, უშანგი დუმბაძე და ბადრი შავლიძე.

„ქართული ოცნება – მრეწველების“ ფრაქციის თავმჯდომარე ტარიელ მანველიძეა, მისი მოადგილე კი – მზია ბოლქვაძე. „ქართული ოცნება – კონსერვატორებს“  როსტომ შერვაშიძე უხელძღვანელებს, მისი მოადგილე კი უშანგი დუმბაძე იქნება. ქედის საკრებულოს თავმჯდომარის, შუქრი თურმანიძის ინფორმაციით, ახალი ფრაქციები 12 იანვარს დარეგისტრირდა.

ქედის საკრებულომ ქედის მერიასა და საკრებულოს თანამშრომელთა საშტატო ნუსხა და თანამდებობრივი სარგო  გასულ კვირას დაამტკიცა. ანაზღაურება გაეზარდა საკრებულოს როგორც თანამდებობის პირებს, ასევე რიგით წევრებსაც. სახელფასო სარგოში შესული ცვლილებების მიხედვით, ქედის საკრებულოს ფრაქციებისა და კომისიების თავმჯდომარეები 1 700 ლარს აიღებენ, მოადგილეები – 1 200 ლარს.

კითხვაზე – რატომ იქმნება ახალი ფრაქციები საკრებულოში მაშინ, როდესაც ფრაქციას ერთი და იმავე პარტიის წევრები ქმნიან და ფრაქციის შექმნა მეტი ანაზღაურების მიღებით ხომ არ არის განპირობებული? საკრებულოს თავმჯდომარემ, შუქრი თურმანიძემ, უპასუხა:

„საკრებულოს წევრებმა გამოხატეს თავიანთი პოლიტიკური ნება და უფლება, შეექმნათ ფრაქცია. დატოვეს „ქართული ოცნების“ ფრაქცია და ახალი ფრაქცია შექმნეს, რითაც უფრო მეტი განსხვავებული აზრი იქნება და უფრო მეტად ნაყოფიერი იქნება ფრაქციებისა და მთლიანად საკრებულოს მუშაობა. ჩვენ არც კანონით და არც მორალურად უფლება არ გვქონდა უარი გვეთქვა.“

მმართველი პარტიის ფრაქცია ქედაში ამ დროისთვის  12 დეპუტატითაა წარმოდგენილი.

ქედის საკრებულოში, რომელიც 24 წევრისგან შედგება, სულ ოთხი ფრაქციაა: „ქართული ოცნება“ , „ერთიანი ნაციონალური მოძრაობა“, „ქართული ოცნება – კონსერვატორები“ და „ქართული ოცნება – მრეწველები“.

გადაბეჭდვის წესი


ასევე: