ბულვარში ახალი ველობილიკის მოსაწყობად 1 მილიონ 763 ათასი ლარი დაიხარჯება

ბათუმის ბულვარში ახალი ველობილიკის მოწყობის შესახებ გადაწყვეტილება ბულვარის ადმინისტრაციამ მიიღო. საუბარია არსებული ველობილიკების შეცვლაზე პანორამული ბორბლიდან ახალ ბულვარში მდებარე ხიდამდე. ველობილიკზე ფილების ნაცვლად ბეტონის ნარევის სხმული დაიგება [ახალი ბულვარის ტერიტორიაზე ველობილიკი ბეტონის ნარევის სხმულითაა მოწყობილი].

ბათუმის ბულვარის ადმინისტრაციის პრესსამსახურში განმარტავენ, რომ ბილიკი ამორტიზებულია და მის ხელახლა მოწყობაზე ტენდერი უახლოეს ორ კვირაში გამოცხადდება. ჯამში 19 424 კვადრატული მეტრის ველობილიკის მოსაწყობად, სავარაუდოდ, 1 მილიონ 763 ათას 113 ლარი დაიხარჯება.

უახლოეს დღეებში ბულვარის ადმინისტრაცია კიდევ ერთ ტენდერს გამოაცხადებს ახალი ბულვარის ტერიტორიაზე. ტენდერში გამარჯვებულმა კომპანიამ აქ დაზიანებული ფილები უნდა გამოცვალოს და ბორდიურები მოაწყოს. შესყიდვის სავარაუდო ღირებულება 2 მილიონ 83 ათას 556 ლარია. სამუშაოები სულ 30 143 კვადრატულ მეტრზე უნდა ჩატარდეს.

დაზიანებული ფილები ახალი ბულვარის ტერიტორიაზე/ 21.01.2018

ნეტგაზეთის მასალების სხვა გამოცემებში გადაბეჭდვის წესი

ავტორი