ფულადი გზავნილები საქართველოში [ინფოგრაფიკა]

2017 წლის განმავლობაში საქართველოში ფულადი გზავნილების სახით $1.379 მილიარდი შემოვიდა, რაც წინა წელთან შედარებით 20%-ით მეტია. ინფორმაციას ამის შესახებ საქართველოს ეროვნული ბანკი ავრცელებს. ფულადი გზავნილების ძირითად წყაროდ, საქართველოდან ემიგრირებული მოქალაქეების ფულადი გზავნილები მიიჩნევა.

საქსტატის ბოლო მონაცემებით [2014-2016 წწ.], ემიგრანტთა ნაკადი საქართველოდან იზრდება. 2014 წელს მათი რაოდენობა 88, 704 იყო, რომელთა შორის 69 855 საქართველოს მოქალაქე იყო. 2015 წელს კი, 95 965 ემიგრანტი წავიდა საქართველოდან, რომელთა უმრავლესობაც [67 452] საქართველოს მოქალაქე იყო.

2016 წელს ემიგრანტთა რიცხვი ოდნავ გაიზარდა და 98 288-ს მიაღწია, თუმცა მათ შორის საქართველოს მოქალაქეთა რაოდენობა არ გაზრდილა, პირიქით შემცირდა [64,705].

მიგრაციის საკითხთა სამთავრობო კომისიის მიერ მომზადებული საქართველოს 2017 წლის მიგრაციის პროფილის მიხედვით,  საქართველოში ადგილი აქვს ემიგრაციის მზარდ ტენდენციას, თუმცა ეს ხდება არა საქართველოს მოქალაქეების, არამედ სხვა ქვეყნის მოქალაქეების საქართველოდან გასვლის შედეგად.

2016 წელს, მიგრაციის საკითხთა სამთავრობო კომისიის დაკვეთით ჩატარებული გამოკითხვის შედეგებმა აჩვენა, რომ ფულადი გზავნილების მიმღები სხვა ქვეყნების მსგავსად, საქართველოშიც ფულადი გზავნილების დიდი ნაწილი იხარჯება პირველადი მოხმარების საგნებზე, როგორიცაა საკვები, კომუნალური გადასახადები და ტანსაცმელი, რასაც მოჰყვება ჯანმრთელობასთან და განათლებასთან დაკავშირებული ხარჯები. ფულადი გზავნილების მიმღებთაგან, მხოლოდ 7% ახერხებს ფულადი გზავნილებით დანაზოგის გაკეთებას ბინის ან მანქანის შესაძენად ან ბიზნესის დასაწყებად.

გამოკითხვაში 324 ოჯახი მონაწილეობდა, რომლებსაც ჰყავდათ სულ მცირე ერთი დაბრუნებული ან ამჟამინდელი ემიგრანტი ოჯახის წევრი.

 

ნეტგაზეთის მასალების სხვა გამოცემებში გადაბეჭდვის წესი


ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან