ძეგლის დაცვის ზონაში ორი რვასართულიანი სახლის აშენებას გეგმავენ

ბათუმში, ვაჟა-ფშაველას ქუჩაზე, კულტურული მემკვიდრეობის დაცვის ზონაში ორი რვასართულიანი სახლის მშენებლობის საკითხი განიხილება. აჭარის კულტურული მემკვიდრეობის დაცვის ზონაში განაცხადები უკვე შესულია. მათგან ერთს ბათუმის მერიის თანხმობა 2016 წელს აქვს მიღებული. ორივე პროექტს ეწინააღმდეგება სააგენტოს ხელოვნებათმცოდნე სოფიო ჭანიშვილი. გაითვალისწინებენ თუ არა მის რეკომენდაციას ზონალური საბჭოს წევრები, ეს საბჭოს მომავალ სხდომაზე გამოჩნდება.

ბათუმში, ვაჟა-ფშაველას #27-ში სამშენებლო კომპანია „ლს ჯგუფი“  რვასართულიანი, ორმოცბინიანი სახლის მშენებლობას გეგმავს.

კულტურული მემკვიდრეობის ძეგლი სახურავის გარეშე. ბათუმი. ვაჟა-ფშაველას 27.

პროექტის რენდერი

საკითხის განხილვას აჭარის კულტურული მემკვიდრეობის სააგენტოს ზონალური საბჭო მომავალ სხდომაზე გეგმავს.

ვაჟა-ფშაველას #27-ში ერთსართულიან სახლს კულტურული მემკვიდრეობის ძეგლის სტატუსი აქვს. ძეგლის სტატუსის მატარებელ სახლს ორ წელზე მეტია სახურავი გადახადეს და მას წვიმა აზიანებს. ძეგლის სავალალო მდგომარეობაზე არასამთავრობო ორგანიზაცია „ბათომმა“ რამდეჯერმე გააკეთა განცხადება და ბათუმის მერიას, ასევე აჭარის მთავრობას, მისი გადარჩენისთვის შესაბამისი ზომების მიღება არაერთხელ მოსთხოვა, თუმცა უშედეგოდ.

კულტურული მემკვიდრეობის ძეგლში ისევე წვიმს, როგორც გარეთ. უკვე მოიშალა სახლის ინტერიერი და ძველი ბუხარი.

ვაჟა-ფშაველას #27-ში ახალი მრავალბინიანი სახლის მშენებლობას კომპანია „აკმე ჯორჯია“ გეგმავდა. თავდაპირველად კულტურული მემკვიდრეობის სააგენტოს ზონალურ საბჭოს ამ კომპანიამ მიმართა. სააგენტოს ზონალურ საბჭოში იგივე პროექტი ახლა უკვე სხვა კომპანიას – „ლს ჯგუფს“ აქვს შეტანილი. პროექტის რენდერზე მითითებულია, რომ ვაჟა-ფშაველას #27-ში მიწის ნაკვეთის სამშენებლოდ გამოყენების პირობები „აკმე ჯორჯიას“ ბათუმის მერიამ 2016 წლის სექტემბერში დაუმტკიცა. ამ კომპანიამ კი მშენებლობასთან დაკავშირებული ყველა უფლება „ლს ჯგუფს“ გადასცა.

განმარტებით ბარათში მითითებულია ასევე, რომ კომპანია კულტურული მემკვიდრეობის სტატუსის მქონე შენობის შენარჩუნების და მისი რესტავრირების ვალდებულებას იღებს.

კულტურული მემკვიდრეობის შესახებ საქართველოს კანონი, არათუ ძეგლის ეზოში თუ ძეგლთან ახლოს, არამედ ძეგლიდან 150 მეტრის რადიუსშიც კი კრძალავს ისეთი გაბარიტების მქონე მშენებლობას, რომელიც გამოიწვევს ძეგლის დაჩრდილვას და გაართულებს მის აღქმას. რას შეცვლის აღნიშნული პროექტი ძეგლთან მიმართებაში იმ შემთხვევაში, თუ ის განხორციელდება, ამაზე ზონალური საბჭოს წევრები იმსჯელებენ.

ერთსართულიანი, ძეგლის სტატუსის მატარებელი სახლის გვერდით ვაჟა-ფშაველას #31-ში რვასართულიანი სახლის მშენებლობას კი კომპანია „მს ჯგუფი“ გეგმავს. ამ კომპანიამ, თანხმობის მიღების მიზნით, კულტურული მემკვიდრეობის სააგენტოს ზონალურ საბჭოს რამდენიმეჯერ მიმართა, თუმცა ჯერ თანხმობა არ მიუღია. თანხმობის მიღების შემთხვევაში კომპანიას განზრახული აქვს იმ ისტორიული ერთსართულიანი სახლის დემონტაჟი, რომელიც ვაჟა-ფშაველას #31-ში დგას.

ვაჟა-ფშაველას 31. ფოტო: ცაგო კახაბერიძე

 

პროექტებს იწუნებს სააგენტოს ხელოვნებათმცოდენე სოფიო ჭანიშვილი.

„პირველ რიგში, რა თქმა უნდა, შესანარჩუნებელია ის ერთსართულიანი, ე.წ. ბელეტაჟის ტიპის სახლები, რომლებითაც ბათუმი გამოირჩევა, ამიტომ ჩვენთვის ამ პროექტების განხორციელება მიუღებელია. ასეთი მასშტაბური მშენებლობები ისტორიულ ბათუმში ჩემი მხრიდან მოწონებული არ იქნება არავითარ შემთხვევაში. ვაჟა-ფშაველას 27-ში კულტურული მემკვიდრეობის ძეგლია და რვასართულიანი შენობა იქ იერსახეს დააზიანებს. პრობლემაა ის, რომ ამ პროექტს პირველი ეტაპი გადალახული აქვს და ახლა მსჯელობა მიდის არქიტექტურულ გადაწყვეტაზე, თუმცა ჩვენ მას მაინც ვეწინააღმდეგებით.

#31-ში მდებარე შენობას და მის შემოგარენს კი არ აქვს ძეგლის სტატუსი. ამ არეალში მშენებლობებზე ჩემი პოზიცია არის ცალსახად უარი. არგუმენტად არ გამოდგება ასევე მოსაზრება, რომ იქ უკვე არსებობს მაღალსართულიანი სახლები. ამ პრინციპით მთლიანად დავკარგავთ ქალაქში ისტორიულ შენობებს“.

კულტურული მემკვიდრეობის ზონალური საბჭოს თავმჯდომარე საბჭოს სხდომებზე ხშირად საუბრობს იმაზე, რომ საჭიროა მერიამ მოამზადოს ისტორიული უბნების განაშენიანების კვარტალური გეგმა, რომელიც იქნება დოკუმენტი ნებართვის გამცემი ორგანოებისთვის. ამ მოსაზრებას სოფიო ჭანიშვილიც ეთანხმება.

რატომ სჭირდება დამატებითი დოკუმენტი სააგენტოს მაშინ, როცა ძეგლის დაცვის ზონაში ისეთ მშენებლობას, რომელიც ძეგლს დაჩრდილავს, კულტურული მემკვიდრეობის დაცვის შესახებ კანონი კრძალავს? – კითხვაზე სოფიო ჭანიშვილმა უპასუხა, რომ „ნებისმიერ ცივილიზებულ ქალაქს აქვს კვარტალური გეგმები, ეს ეხმარება ქალაქს ტიპობრივად დაყოფაში – სად უნდა შენარჩუნდეს ურბანული გარემო, განსაზღვრავს სართულიანობას. აი, მაგალითად, ბარათაშვილის იქით, სადაც ძველი ბათუმია, მკვეთრად უნდა იყოს განსაზღვრული, რომ სამ-ოთხ სართულზე მეტი დაუშვებელია. ევროპულ ქალაქებში ეს პრინციპი დაცულია.“

 

ნეტგაზეთის მასალების სხვა გამოცემებში გადაბეჭდვის წესი


ავტორი