ბათუმში სპორტკომპლექსის მშენებლობა სრულდება – ტერიტორიის კეთილმოწყობაში მილიონი ლარი დაიხარჯება

ბათუმში, ლადო ასათიანისა და ორბელიანის ქუჩებს შორის [ყინულის სასახლის უკან] ახალი სპორტული კომპლექსის მშენებლობა თითქმის დასრულებულია. კომპლექსში ორი დარბაზია განთავსებული; უკვე დამონტაჟებულია ტრიბუნები, დარჩენილია სამღებრო სამუშაოები და იატაკის დაგება. ახალი სპორტული კომპლექსი იმ პროგრამის შემადგენელი ნაწილია, რომლის განხორციელებისთვის საქართველოს მთავრობა 54 მილიონ აშშ დოლარს დახარჯავს.

ახალი სპორტული კომპლექსი 2017 წლის ზაფხულში უნდა ჩაბარებულიყო, თუმცა ვადა რამდენჯერმე გადაიწია. „ბათუმელების“ ინფორმაციით, შენობა მიმდინარე თვის ბოლოს უნდა ჩაბარდეს. რაც შეეხება სპორტკომპლექსის მიმდებარე ტერიტორიას, მის კეთილმოწყობისთვის ბათუმის მერიას 1 144 709 ლარი აქვს გათვალისწინებული.

სპორტული კომპლექსის მიმდებარე ტერიტორიის კეთილმოწყობის სამუშაოები აჭარის ბიუჯეტით გათვალისწინებული მუნიციპალიტეტებში განსახორციელებელი პროექტების ფონდიდან დაფინანსდება. მანამდე კი საკითხი ბათუმის საკრებულომ უნდა მოიწონოს, რის შემდეგაც მერია, თანხის მოთხოვნის მიზნით, პროექტს აჭარის მთავრობას წარუდგენს.

ბათუმის მერიის ინფორმაციით, 2018 წლის სექტემბერში ბათუმში მსოფლიო საჭადრაკო ოლიმპიადა უნდა ჩატარდეს:

სპორტული კომპლექსის მიმდებარე ტერიტორიის კეთილმოწყობა, სავარაუდოდ, 2018 წლის აგვისტოში უნდა დასრულდეს.

ტერიტორიის მოწყობის საკითხი საკრებულოს 2018 წლის 18 იანვრის სხდომის დღის წესრიგშია შეტანილი.

მშენებარე სპორტული კომპლექსი ბათუმში / 17.01.2018 / თედო ჯორბენაძის ფოტოები

2018 წელს ბათუმი საჭადრაკო ოლიმპიადას უმასპინძლებს

40 მილიონამდე ლარი ჭადრაკის განვითარებისთვის

2018 წლის საჭადრაკო ოლიმპიადა ბათუმში ჩატარდება

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com