აჭარის საზოგადოებრივი მაუწყებელი ახალ შენობას ითხოვს

აჭარის საზოგადოებრივმა მაუწყებელმა (აჭარის ტელევიზია) საქართველოს პრემიერ-მინისტრს, აჭარის მთავრობასა და უმაღლეს საბჭოს მიმართა ახალი შენობის თხოვნით. ინფორმაციას აჭარის საზოგადოებრივი მაუწყებელი ავრცელებს. 

„აჭარის ტელევიზია განთავსებულია კულტურული მემკვიდრეობის უძრავი ძეგლის სტატუსის მქონე ორსართულიან შენობაში. თანამშრომელთა უმეტესობას სამუშაო ადგილი არ გააჩნია. ოთახების დიდი ნაწილი ფანჯრების და სათანადო ვენტილაციის გარეშეა,“ – ასე ხნის აჭარის საზოგადოებრივი მაუწყებელი ახალი შენობის საჭიროებას.

როგორც მაუწყებლის ვებგვერდზე გამოქვეყნებულ ინფორმაციაშია აღნიშნული, ოფიციალურ წერილში საუბარია უსაფრთხო სამუშაო გარემოს შექმნის აუცილებლობაზე და ასევე იმაზე, რომ „სტატუსის ცვლილების პროცესში მაუწყებელს ქონება არ გადაეცა. ორგანიზაციას არ გააჩნია საქმიანობასთან შესაბამისი ინფრასტრუქტურა. თითქმის შეუძლებელია სტუდიური გადაწყობა და მაყურებლისათვის საინტერესო გადაცემების ახალი ფორმატების შექმნა.“

შენობა მემედ აბაშიძის ქუჩაზე, რომელშიც აჭარის საზოგადოებრივი მაუწყებელია განთავსებული, აჭარის ფინანსთა და ეკონომიკის სამინისტროს ეკუთვნის.

აჭარის საზოგადოებრივ მაუწყებელში ამჟამად 313 ადამიანი მუშაობს.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com