კონცერტი ბათუმის ბულვარში

დღეს, 29 დეკემბერს,  18:00 საათზე, ბათუმის ბულვარში, კოლონადებთან, საახალწლო კონცერტი გაიმართება. ბულვარის ადმინისტრაციის ინფორმაციით, შესრულდება ბავშვთა სამეჯლისო ცეკვები, ქორეოგრაფიული და ვოკალური ნომრები.

კონცერტში, ასევე, მონაწილეობას მიიღებენ ბათუმელი შემსრულებლები: გიორგი ბერიძე,  ირაკლი გოგიტიძე და  ადგილობრივი ბენდები. კონცერტის პარალელურად, კოლონადებთან ინდივიდუალური ავტორების მიერ შესრულებული საახალწლო თემატიკის ხელნაკეთი ნივთების გამოფენა-გაყიდვა გაიმართება.

წარმოდგენილი იქნება მრავალფეროვანი კომპოზიციები, ფოტოკუთხეები: „ზღვისპირა ბულვარში მოსულ სტუმრებს საშუალება ექნებათ სხვადასხვა საკონდიტრო კომპანიისა და პროფესიული კოლეჯების მიერ წარმოდგენილი მრავალფეროვანი სადღესასწაულო პროდუქცია დააგემოვნონ.

თოვლის ბაბუა ამ საოცარ ზღაპრულ გარემოში მარხილით შემობრძანდება და პატარებს საახალწლო ტკბილეულს გადასცემს საჩუქრად. საახალწლო ღონისძიება ბათუმის ბულვარის ადმინისტრაციის ორგანიზებით ჩატარდება,“- ნათქვამია ბულვარის ადმინისტრაციის განცხადებაში.

ბათუმის ბულვარი წელს ახალ წელს განსხვავებული სტილის ნაძვის ხითა და ახალი საახალწლო ილუმინაციებით ხვდება.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com