28 დეკემბერს ბათუმის ხელოვნების ცენტრში „ყრუთა კავშირმა“ საახალწლო ღონისძიება გამართა. აჭარაში მცხოვრებმა სმენის უნარის დარღვევის მქონე პირებმა ცეკვა „დაისი“, „აჭარული“, „რაჭული“ რამდენიმე სკეტჩი და სიმღერა წარმოადგინეს.
თითქოს უცნაური და დაუჯერებელია, როგორ უნდა აყვე ზუსტად ცეკვის რიტმს, როცა მუსიკა არ გესმის, მაგრამ საკონცერტო ნომრები დაგარწმუნებდათ, რომ ყველაფერი შესაძლებელია და მათ თვლითაც შეუძლიათ ზუსტად აყვნენ მელოდიას, სინადვილეში რომ არასდროს მოუსმენიათ.
„აჭარის ყრუთა კავშირი” ცალკე ორგანიზაციად არ არის დარეგისტრირებული და „საქართველოს ყრუთა კავშირში” შედის. აჭარიდან ორგანიზაციაში სულ სმენის უნარის დარღვევის მქონე 83 პირია რეგისტრირებული, მათმა უმრავლესობამ სპეციალური საგანმანათლებლო პროგრამების არახელმისაწვდომობის გამო წერა-კითხვა არ იცის.
„ბავშვობიდან მინდოდა დავხმარებოდი ვინმეს, ვისაც ვჭირდებოდი. ამიტომ აღმოვჩნდი აქ. ძალიან ემოციური ნომრები იყო,უდიდესი პასუხისმგებლობით ეკიდებოდნენ რეპეტიციებს. სიტყვების გარეშე გადმოცემული ემოციები ხანდახან ბევრად მეტია, ვიდრე სიტყვები. ბევრი პრობლემა აქვთ ამ ადამიანებს, ბევრ რამეში იზღუდებიან, საჭიროა მეტი თარჯიმანი, ჟესტური ენის მცოდნე და თან მოსაუბრე ადამიანები. მაგალითად როცა სმენის უნარის დარრვევის მქონეს სასწრაფო დახმარება სჭირდება პრობლემაა გამოძახებაც კი, უჭირთ აუხსნან ექიმებს რა სტკივათ და ასე შემდეგ.
ეს არის სცენაზე დგომის დებიუტი ამ ახალგაზრდებისთვის. ძალიან ფრთხილობდნენ და შიშობდნენ, რამე რომ არ გამოსვლოდათ, მაგრამ ყველაფერმა კარგად ჩაიარა. „ბათუმის ყრუთა კავშირში” ყველა ასაკის 83 ადამიანია გაერთიანებული“-ამბობს „ბათუმელებთან“ საუბრისას „ყრუთა კავშირის“ დირექტორი, ირაკლი სირაძე.
ირაკლი სირაძე „ყრუთა კავშირის” დირექტორი
სულხან კახიძე კი „ყრუთა კავშირის“ თავმჯდომარეა, ჩვენ მას თარჯიმნის საშუალებით გავესაუბრეთ.
„აქამდე არ ტარდებოდა მსგავსი ღონისძიებები. „ყრუთა კავშირში” პრობლემები გვაქვს, მოლაპარაკე ადამიანებმა არ იციან ჩვენს შესახებ და ჩვენ მათ შესახებ არ ვიცით. მინდა თანაბარი უფლებები გვქონდეს მოლაპარაკეებსა და სმენის უნარის დარღვევის მქონეებს. მე თვითონაც ეს პრობლემა მაქვს, მაგრამ შემიძლია დავგეგმო ჩემი ცხოვრება, მინდა ყველას ჰქონდეს განათლების მიღების უფლება და თვითონ გეგმავდეს ყველაფერს, რა თქმა უნდა ჩვენ გვჭირდება მოლაპარაკე ადამიანების დახმარება, მაგრამ არა ისე, რომ ისინი გვიგეგმავდნენ ცხოვრებას. ახლა ასე ხდება. მინდა იყოს მეტი ურთიერთობა, საგანმანათლებლო პროგრამები ყველასთვის, რომ ჩვენი ბენეფიციარებიც იყვნენ განათლებულები. ყველას უნდა შეეძლოს დამოუკიდებლად საკუთარი პრობლემების მოგვარება და ცხოვრების მართვა.
ახლაც, კონცერტზე არ გვყავდა ქორეოგრაფი, შიშველი ხელებით გავაკეთეთ ყველაფერი, საჭიროა ჟესტური ენის მეტად განვითარება, მეტი თარჯიმანი. არ გვაქვს ადგილობრივი ორგანიზაცია, „აჭარის ყრუთა კავშირი” ოფიციალურად დარეგისტრირებული ცალკე ორგანიზაციად არ არის, „საქართველოს ყრუთა კავშირს” ვეკუთვნით. ხშირად ხდება, რომ ზოგჯერ სმენის უნარის დარღვევის მქონეებით მანიპულირებენ და ეს ძალიან სამწუხაროა”.
სულხან კახაძე, „ყრუთა კავშირის თავმჯდომარე”
საახალწლო საღამოს ორგანიზატორები ამბობენ, რომ მომავალში კავშირის მიერ დაგეგმილი ღონისძიებების ფართოდ გაშუქებაზე იზრუნებენ, რომ სხვა დროს დარბაზი იყოს უფრო სავსე და მოლაპარაკე ადამიანებმა მეტი შეიტყონ სმენის უნარის დარღვევის მქონე პირთა შესახებ.
