სახანძრო უსაფრთხოების საკითხებზე აჭარის მთავრობის თავმჯდომარე ბიზნესმენებს სასტუმრო „რედისონში“, დახურულ კარს მიღმა შეხვდა. შეხვედრას არ დასწრებია სასტუმრო „ლეოგრანდის“ მენეჯმენტი. „ჩვენ მოვუწოდეთ ბიზნესსექტორს, რომ ჩაატარონ ტრენინგები,“ – თქვა ზურაბ პატარაძემ შეხვედრის დასრულების შემდეგ.
„ჩვენ მოვისმინეთ ბიზნესსექტორიდან რა ვითარება არის, მოვუწოდეთ მათ, რომ ჩაატარონ წვრთნები პერმანენტულად და მოხდეს პერსონალის გადამზადება. ძალიან მნიშვნელოვანია, თუ როგორ იმოქმედებს კრიტიკულ სიტუაციებში პერსონალი, წამიერი მოქმედება არის ძალიან მნიშვნელოვანი. ყველა სასტუმრო და კვების ობიექტი უნდა იყოს აღჭურვილი შესაბამისი ინვენტარით,“ – აღნიშნა აჭარის მთავრობის თავმჯდომარემ ჟურნალისტებთან.
რამდენმა მშენებელმა დაადასტურა პრობლემა სახანძრო უსაფრთხოების კუთხით, ან რატომ გაამახვილა ყურადღება ზურაბ პატარაძემ პერსონალის გადამზადებაზე? – აჭარის მთავრობის თავმჯდომარემ „ბათუმელების“ ამ კითხვებს კონკრეტულად არ უპასუხა. თქვა, რომ შეხვედრაზე დამსწრე ყველა ბიზნესმენმა გამოთქვა თანამშრომლობის სურვილი და შესაბამისი უწყება თითოეულ ობიექტში შეამოწმებს ვითარებას სახანძრო უსაფრთხოების კუთხით.
„დღევანდელი შეხვედრა უფრო იყო პრევენციული ხასიათის… შესაბამისი ქვედანაყოფი მოახდენს შემოწმებას, მათ შორის სახელმწიფო დაწესებულებების“, – განმარტა ზურაბ პატარაძემ.
რატომ დაიხურა ბიზნესმენებთან შეხვედრა, თუკი მთავრობის თავმჯდომარე მათ პრევენციაზე ესაუბრა? „ძირითადი მესიჯები ჩვენ გავაჟღერეთ, დანარჩენი საკითხები, რომლებიც აწუხებს ბიზნესს, ჩვენ გვინდოდა სამუშაო ფორმატში გვესაუბრა. მომავალში აუცილებლად გაიმართება მსგავსი შეხვედრები, რომლებსაც დაესწრებიან პრესის და მასმედიის თანამშრომლები“, – გვიპასუხა ზურაბ პატარაძემ. მან არც ის დააკონკრეტა, რა „წუხილზე“ ისაუბრებს ბიზნესმენებმა შეხვედრაზე.
ზურაბ პატარაძე აჭარის მთავრობაში სამუშაო ჯგუფის შექმნაზეც საუბრობს. „ზუსტი სახელწოდება მომავალი კვირის დასაწყისში გადაწყდება. ეს იქნება ეფექტური გუნდი, რომელიც იმუშავებს ოპერატიულად და ეფექტურად შესაბამის ქვედანაყოფებთან – სტიქია იქნება ეს, თუ ხანძარი. ამაში ჩართული იქნებიან მინისტრთა საბჭოს წევრები, მუნიციპალიტეტის წარმომადგენლები და სწრაფ რეაგირებას მოახდენენ ამა თუ იმ მოვლენაზე,“ – დაამატა ზურაბ პატარაძემ.
აჭარის მთავრობის წარმომადგენლები ხვალ უმაღლესი საბჭოს დეპუტატებთან აპირებენ შეხვედრას. ზურაბ პატარაძე ამბობს, რომ შეხვედრის თემა საკანონმდებლო ინიციატივის შემუშავება იქნება სახანძრო უსაფრთხოების საკითხებზე. თუკი ინიციატივა მომზადდება, აჭარის უმაღლესი საბჭო პარლამენტს მიმართავს.
