მთავარი,სიახლეები

შს სამინისტრო: ლეოგრანდში მომხდარ ხანძართან დაკავშირებით ცხელი ხაზი ამოქმედდა

24.11.2017 • 2406
შს სამინისტრო: ლეოგრანდში მომხდარ ხანძართან დაკავშირებით ცხელი ხაზი ამოქმედდა
შინაგან საქმეთა სამინისტრომ ბათუმში, სასტუმრო ლეოგრანდში მომხდარ ხანძართან დაკავშირებით ცხელი ხაზი აამოქმედა.  ცხელი ხაზის ნომერია: 595950925.

შს სამინისტროში აცხადებენ, რომ შს მინისტრი ხანძართან დაკავშირებით ბათუმში გაემგზავრა.

შს სამინისტროს განცხადებას გთავაზობთ უცვლელად: „ბათუმში, სასტუმრო „ლეო გრანდში” გაჩენილ ხანძართან დაკავშირებით უკვე ამოქმედდა საინფორმაციო მართვის ცენტრი, რომელსაც საპატრულო პოლიციის დეპარტამენტის აჭარის მთავარი სამმართველოს უფროსი, ლევან მაისურაძე ხელმძღვანელობს.

ვიცე-პრემიერი, შინაგან საქმეთა მინისტრი გიორგი გახარია და ჯანდაცვის მინისტრის მოადგილე ზაზა სოფრომაძე ბათუმში გაემგზავრნენ. შინაგან საქმეთა სამინისტროს გადაუდებელი დახმარების ოპერატიული მართვის ცენტრ „112“-დან საგანგებო სიტუაციების მართვის სააგენტოში 20:01 სთ-ზე შევიდა შეტყობინება ბათუმში, სასტუმრო „ლეო გრანდში” გაჩენილ ხანძართან დაკავშირებით. ადგილზე მობილიზებულია აჭარის საგანგებო სიტუაციების მართვის სამმართველოს 13 სახანძრო-სამაშველო მანქანა და 100-ზე მეტი მეხანძრე-მაშველი. ხანძრის ქრობის პროცესში უკვე ჩაერთნენ მეხანძრე-მაშველები და სახანძრო-სამაშველო ტექნიკა გურიის და სამეგრელოს რეგიონებიდან. ხანძრის შედეგად არის მსხვერპლი. წინასწარი ინფორმაციით, საავადმყოფოში გადაყვანილი არიან სასტუმროში მყოფი მოქალაქეები და სამი მეხანძრე-მაშველი. მომხდარ ფაქტთან დაკავშირებით, გამოძიება საქართველოს სისხლის სამართლის კოდექსის 187-ე მუხლის მეორე ნაწილით დაიწყო.

გადაბეჭდვის წესი


ასევე: