უამინდობის გამო ზოგიერთ სკოლასა და ბაღში სასწავლო პროცესი შეწყდა

აჭარის მაღალმთიანეთში თოვს. თოვლის საფარი ზოგ სოფელში 1 მეტრზე მეტია. უამინდობის, უშუქობისა და ასევე, ბავშვების გამოუცხადებლობის გამო ზოგ ბაღსა და საჯარო სკოლაში სააღმზრდელო-სასწავლო პროცესი არ მიმდინარეობს.

ხულოს ბაღების გაერთიანების დირექტორის, ირაკლი რიჟვაძის ინფორმაციით, უშუქობისა და ბავშვების გამოუცხადებლობის გამო ხულოს მუნიციპალიტეტის 20 საბავშვო ბაღიდან სააღმზრდელო პროცესი მხოლოდ 4  – მეკეიძეების, რიყეთის, საციხურისა და დაბის  – ბაღში განახლდა.

ელექტროენერგიის არ ქონის გამო შუახევის 6 ბაღში – ჭვანის, უჩამბის, ხიჭაურის, ბარათაულის, ჭალისა და წყაროთას ბაღებში სააღმზრდელო პროცესი არ მიმდინარეობს.

რაც შეეხება ქედის მუნიციპალიტეტს, ქედის ბაღების გაერთიანების დირექტორის, აიშე თებიძის ინფორმაციით, უშუქობას აქ პრობლემები არ შეუქმნია: „ყველა ბაღი მომარაგებულია შეშით, თუმცა 14 ბაღიდან ბავშვები მხოლოდ 4 ბაღში გამოცხადდნენ –  ხარაულის, დოლოგნის, მახუნცეთისა და ცხმორისის N2 ბაღში“.

აჭარის მთიანეთში სასწავლო პროცესი სულ 12 სკოლაში არ მიმდინარეობს – ხულოს ცხრა საჯარო სკოლაში, ქედის ერთ და შუახევის ორ სკოლაში. რესურსცენტრების ინფორმაციით,  11 სკოლაში სასწავლო პროცესი ბავშვების გამოუცხადებლობის გამო შეწყდა, ხოლო ხულოს ერთ  – თხილვანის საჯარო სკოლაში –  ელექტროენერგიის გათიშვის გამო.

პრობლემები დიდთოვლობის გამო აჭარის მაღალმთიანეთში

ქედა / 24.11.2017 / ეკა ბარამიძის ფოტოები

 

ნეტგაზეთის მასალების სხვა გამოცემებში გადაბეჭდვის წესი
ავტორი