შს სამინისტროს განმარტება პატრულის მიერ შშმ პირისთვის „ინვალიდის“ ჩაწერასა და დაჯარიმებაზე

 

მოქალაქე ჯემალ ჭელიძემ აჭარის მთავრობის სახლის მიმდებარე ტერიტორია ახლახან დატოვა. მან რამდენიმე საათის წინ „ბათუმელებს“ განუცხადა, რომ შიმშილობას იწყებდა, რადგან საპატრულო პოლიციამ დღეს ის უსამართლოდ დააჯარიმა, ხოლო  ადმინისტრაციული სამართალდარღვევის ოქმში მოიხსენია, როგორც „ინვალიდი“, რადგან ის ეტლით მოსარგებლეა.

ჯემალ ჭელიძე ამბობდა, რომ დღეს, მას შემდეგ, რაც თავისი ავტომანქანით ავარიაში მოყვა ბათუმი-ახალციხის მაგისტრალზე, გამოიძახა საპატრულო პოლიცია, რომელიც ადგილზე დაგვიანებით მივიდა. იმ მოტივით, რომ საავტომობილო მოძრაობა არ შეეფერხებინა, პატრულის მოსვლამდე ის იძულებული გახდა თავისი ავტომანქანისთვის ადგილი 5 მეტრით მოენაცვლებინა. ჯემალ ჭელიძის თქმით, საპატრულო პოლიციამ ის 250 ლარით სწორედ ამის გამო დააჯარიმა, ხოლო ოქმში მას ჩაუწერეს „ინვალიდი“.

ფაქტთან დაკავშირებით „ბათუმელები“ დაუკავშირდა შს სამინისტროს პრესცენტრს, სადაც შემდეგი განმარტეს: „ადმინისტრაციული შეჯახება იყო, პოლიცია ძალიან სწრაფად მივიდა შემთხვევის ადგილზე, ორივე მძღოლს ჰქონდა შემთხვევის ადგილი დატოვებული. ჩატარდა რიგი საგამოძიებო მოქმედებები და ორივე მანქანის მძღოლი დაჯარიმდა ადმინისტრაციულად. რაც შეეხება ამ კაცს [ჯემალ ჭელიძეს] თვითონ საჭესთან არ იჯდა და ადმინისტრაციულ სამართალდარღვევათა ოქმში თვითონ საერთოდ არ ფიგურირებს. სხვა ადამიანი იჯდა საჭესთან და დაჯარიმებულიც ის სხვა არის“.

„ბათუმელების ინფორმაციით, მას შემდეგ, რაც აჭარის მთავრობის ადმინისტრაციასთან აჭარის პოლიციის დეპარტამენტიდან მივიდნენ, ჯემალ ჭელიძემ მთავრობის ადმინისტრაციული შენობის მიმდებარე ტერიტორია დატოვა.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან