მთავარი,სიახლეები

მოქალაქის და მერის რწმუნებულის უერთიერთგამომრიცხავი ინფორმაცია

20.11.2017 • 2011
მოქალაქის და მერის რწმუნებულის უერთიერთგამომრიცხავი ინფორმაცია

სოფელ ჭარნალში მცხოვრებმა ბაგრატ ცეცხლაძემ „ბათუმელებს“ მიმართა. მოქალაქე ამბობს, რომ საქართველოს „ენერგო პრო ჯორჯიას“ მის საკუთრებაში, სახლთან ახლოს ხეების მოჭრა სურს. მოქალაქე ვარაუდობს, რომ ხეები ახალ ელექტროგაყვანილობას უშლის ხელს. თუმცა არ უარყოფს იმასაც, რომ ხეებზე დენი გადადის და, შესაბამისად, ის შეიძლება საშიშიც იყოს. ბაგრატ ცეცხლაძის ინფორმაციით, მის ეზოში ხეები იგივე მიზეზით ადრეც მოუჭრიათ:

„რამდენიმე წლის წინ, სახლში არ ვიყავით, შემოვიდნენ და უნებართვოდ მოჭრეს ხეები. ახლა ისევ მოვიდნენ და ბლის ორი ხის, ხურმის ორი და ორი თხმელის ხის მოჭრა უნდათ. თხმელები პირდაპირ მეწყერსაშიშ ზონაშია. ამ ხეების მოჭრამ მეწყერი რომ გააქტიუროს, ვინ აიღებს პასუხიმგებლობას?“ – სვამს კითხვას ბაგრატ ცეცხლაძე.

მოქალაქის თქმით, შესაბამისი დოკუმენტით დადასტურებულია, რომ მისი სახლი მეწყერსაშიშ ზონაშია.

„ბათუმელები“ „ენერგო პრო ჯორჯიას“ დაუკავშირდა, სადაც განგვიმარტეს, რომ სამუშაოებს ადგილზე საქართველოს ენერგოსისტემა აწარმოებს და თავად „არაფერ შუაში არიან“, ეს უკავშირდება ახალი სისტემის მონტაჟს, რომელმაც ელექტროენერგიის თურქეთში ექსპორტირებისთვის გამოიყენებენ.

სახვა ინფორმაცია აქვს ხელვაჩაურის მერის წარმომადგენელს ჭარნალში. ის ამბობს, რომ ხეების მოჭრა არ იგეგმება და საუბარია მხოლოდ ერთი ხის გადაბელვაზე, რაც მოქალაქეების უსაფრთხოებისთვის არის  საჭირო:

„ … წლებია იქ დგას ანძა. შემდეგ გაიზარდა რამდენიმე ხე, საუბარია ერთი ხის გადაბელვაზე – სპეციალისტები მიიჩნევენ, რომ ხეზე დენი გადადის და უსაფრთხოების მიზნით უნდა ჩატარდეს ეს სამუშაო. მე თვითონ ვახლდი ელექტროსისტემის წარმომადგენლებს ბაგრატ ცეცხლაძესთან. მსგავსი პრობლემა იყო კიდევ რამდენიმე ოჯახში და ყველა დათანხმდა ხეების გადაბელვაზე“, – ამბობს ხელვაჩაურის მერის რწმუნებული ნუგზარ აბაშიძე.

 

გადაბეჭდვის წესი


ასევე: