ბათუმის საკრებულოს თავმჯდომარედ სულიკო თებიძე აირჩიეს

დღეს 20 ნოემბერს, ბათუმის ახალარჩეული საკრებულოს პირველი სხდომა გაიმართა. სხდომაზე, სხდომა საკრებულოს უხუცესმა წევრმა ანზორ დევაძემ გახსნა. საკრებულოს თავმჯდომარის პოსტზე მხოლოდ ერთი კანდიდატურა იყო დასახელებული. „ქართულმა ოცნებამ“ სულიკო თებიძის კანდიდატურა დაასახელა.

საკრებულოს თავმჯდომარის არჩევაში მონაწილეობა არ მიიღო საკრებულოს ოპოზიციამ. სულიკო თებიძე „ქართულმა ოცნებამ“ თავმჯდომარედ  19 ხმით აირჩია.  მან თავმჯდომარის მოადგილეების პოსტზე, საკრებულოს ყოფილი თავმჯდომარე ლაშა სირაბიძე და თამაზ სალუქვაძე დაასახელა. თავმჯდომარის მოადგილეებიც, „ქართულმა ოცნებამ“ 19 ხმით აირჩია.

ახალი მოწვევის საკრებულოში სულ 25 წევრია. აქედამ 19 „ქართული ოცნების“ წარმომადგენელია, ოთხი „ნაციონალური მოძრაობის“, ერთი „ევროპული საქართველოს“ და ერთი „პატრიოტთა ალიანსის. პირველ სხდომას არ ესწრებოდა  გიორგი კუნჭულია, ნაციონალური მოძრაობის მეოთხე წარმომადგენელი საკრებულოში.

საკრებულოს თავმჯდომარე სულიკო თებიძემ მადლობა გადაუხადა საკრებულოს წევრებს და განაცხადა, რომ „ასეთი დემოკრატიული არჩევნები ჩვენს ისტორიაში არ ჩატარებულა. ჩვენი გუნდი მზადაა ითანამშრომლოს  კონსტრუქციულ ოპოზიციასთან, არასამთავრობო სექტორთან და მედიასთან. ჩვენ საკრებულოს გუნდთან, მერთან ერთად ბევრ  სასიკეთო საქმეს გავაკეთებთ ქალაქისთვის“-განაცხადა მან.

საკრებულოს პირველ სხდომას ბათუმის არჩეული მერი ლაშა კომახიძეც ესწრებოდა.

დღევანდელ სხდომაზე საკრებულოს კომისიის თავმჯდომარეებიც უნდა აირჩიონ.

ბათუმის 2017 წლის ახლადარჩეული საკრებულო
ფოტო: მანანა ქველიაშვილი

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com