მთავარი,სიახლეები

სტატისტიკის მიხედვით თვითმკვლელობების რაოდენობა გაიზარდა

20.11.2017 • 1792
სტატისტიკის მიხედვით თვითმკვლელობების რაოდენობა გაიზარდა

გასულ წელს ქვეყნის მასშტაბით 161-მა ადამიანმა მოიკლა თავი, მათ შორის, 11 არასრულწლოვანი იყო. სტატისტიკის ეროვნული სამსახურის მონაცემებით, 2016 წელს თვითმკვლელობათა რაოდენობა 2006 წელთან შედარებით ქალებში 2.8, ხოლო კაცებში 2.3 პროცენტით გაიზარდა.

სტატისტიკის ეროვნული სამსახურის ინფორმაციით, გასულ წელს 15 წლამდე ასაკის ერთმა გოგომ მოიკლა თავი, 15-დან 19 წლამდე – 3 ქალმა და 7 კაცმა. 20 წლის ზემოთ – 27-მა ქალმა და 123-მა კაცმა.

ფსიქოლოგი ირმა ფეიქრიშვილი სუიციდის შემთხვევების მატებას ცხოვრების აჩქარებულ რიტმს უკავშირებს და სტრესების მატებას. იგი მიიჩნევს, რომ ადამიანებმა განსაკუთრებული ყურადღება უნდა დავუთმოთ ერთმანეთს, რადგან „შესაძლებელია მხოლოდ მოსმენამ თუნდაც შეფასების გარეშე ბევრი რამ შეცვალოს“.

ფსიქოლოგი განსაკუთრებულ აქცენტს მოზარდებზე აკეთებს და თვლის, რომ მშობლებმა, ასევე პედაგოგებმა დროულად უნდა მიმართონ ფსიქოლოგს, თუკი მოზარდს განმარტოებისკენ ილტვის და დეპრესიული მდგომარეობა აღენიშნებათ.

„ძირითადად ამ დროს ადამიანი მიდრეკილია განმარტოებიკენ, ჩაკეტილობისკენ და არაფერის მოსმენა არ უნდა. მოზარდობის ხანაში ზოგჯერ რთულია ამ ნიშნებს ამოცნობა,“ – გვიყვება ირმა ფეიქრიშვილი. – „მე მქონდა პრაქტიკაში შემთხვევა, როცა სკოლის ფსიქოლოგად მუშაობის დროს, ვესაუბრე ერთ მოსწავლეს სასწავლო მასალის ათვისების მეთოდებზე, არაფერი აღენიშნებოდა, პირიქით, ძალიან მოტივირებული ჩანდა. ამ საუბრიდან რამდენიმე დღეში მან თავი მოიკლა. ცოტა უფრო დიდხნიანი ურთიერთობა რომ მქონოდა, შესაძლებელია რაღაც დაფიქსირებულიყო. მოზარდებმა ასევე შეიძლება თქვან, რომ თავს მოიკლავენ, მაგრამ ამას ყურადღების მიქცევის გამო აკეთებენ. არც ისაა მართებული ამ დროს, რომ მთლიანად დავაიგნოროთ მისი ეს სიტყვები. განსაკუთრებით მოზარდის ფსიქიკას სჭირდება დასვენება და განტვირთვა. ხშირად ისე ხდება, რომ მოსწავლე კომპიუტერით ერთობა და თავზე ათენდება. ეს იწვევს ტვინის გადაღლილობას, როცა ადამიანს საღად გადაწყვეტილების მიღება უჭირს“.

 

 

გადაბეჭდვის წესი


ასევე: