მთავარი,სიახლეები

ლაშა კომახიძის ხედვა მერიის ბიუჯეტიდან ვახშმების დაფინანსებაზე

20.11.2017 • 2056
ლაშა კომახიძის ხედვა მერიის ბიუჯეტიდან ვახშმების დაფინანსებაზე

რა დამოკიდებულება აქვს ბათუმის ახალარჩეულ მერს ისეთი ღონისძიებების დაფინანსებაზე, როცა ღონისძიების მთავარი ნაწილი ვახშამია, როგორიც იყო, მაგალითად, „პაემანი ბათუმთან“. ან ისეთი კომერციული ღონისძიებების დაფინანსებაზე, როგორიც იყო „აჭარა ფეშენ ვიკი“ და „მისტერ პლანეტა“.  ამ თემებზე ლაშა კომახიძემ „ბათუმელების“ კითხვებს უპასუხა. ამ ღონისძიებების ბიუჯეტიდან დაფინანსების გადაწყვეტილებას წინა წლებში არასამთავრობო ორგანიზაციები აკრიტიკებდნენ და არამიზნობრივ ხარჯად აფასებდნენ.

ბატონო ლაშა, იყო შემთხვევები, როცა ვახშმები დაფინანსდა ბათუმის ბიუჯეტიდან. ალბათ თქვენთანაც შემოვა მსგავსი ინიციატივები. როგორია თქვენი დამოკიდებულება და რა გადაწყვეტილებას მიიღებთ?

მიჭირს კონკრეტულ ღონისძიებებზე საუბარი. მოგეხსენებათ სულ ოთხი დღე გავიდა, რაც მერის კაბინეტში ვარ შემოსული, ჯერ მაგ ღონისძიებებამდე ნამდვილად ვერ მივედი. ძირითადად დაკავებული ვარ ინფრასტრუქტურული და კეთილმოწყობითი საქმით. ბიუჯეტიდან ვახშმების დაფინანსება ასე ცალკე აღებული, რა თქმა უნდა, არ ჟღერს კარგად, არ არის კარგი პრაქტიკა. თუმცა შესაძლებელია ზოგჯერ ვახშამი იყოს რაღაც ღონისძიების განუყოფელი ნაწილი.

ამ შემთხვევაში გეკითხებით ღონისძიებებზე, რომლის ძირითადი ნაწილი იყო ვახშამი და არა შემადგენელი ნაწილი ან როცა ხშირად ვახშამი უფრო გრანდიოზულია, ვიდრე ღონისძიება.

ჩემთვის ამოსავალი წერტილი იქნება, პირველ რიგში, ღონისძიება. არაერთხელ გამიკეთებია განმარტება, რომ კულტურის მიმართულებით ქალაქს უნდა ჰქონდეს კულტურული ცხოვრების განვითარების პოლიტიკა. თითოეული ღონისძიება, რომელსაც ქალაქი დააფინანსებს, უნდა პასუხობდეს იმ კრიტერიუმებს, რომლებიც ამ პოლიტიკაში იქნება ჩადებული. ეს არის დროში გაწერილი იმ მიზნების მიღწევის გზა, რომელსაც გვინდა გარკვეულ დროში მივაღწიოთ, მაგალითად, 2021 ან 2025 წლისთვის. თითოეული ღონისძიება უნდა ემსახურებოდეს ამ მიზნების მიღწევას, თითოეული თეთრი, რომელსაც ის გაიღებს, უნდა იყოს კონკრეტულად ამ მიზნების მიღწევისთვის. ეს არის ჩემი ხედვა არამარტო კულტურის განვითარების თვალსაზრისით, არამედ განათლების კუთხით, იგივე ჯანდაცვის, სოციალური მიმართულებებით.

ჩემს თანამშრომლებთან მერიაში უკვე მქონდა საუბარი ამაზე. ეს არ არის ადვილი, თუმცა რამდენიმე თვეში მოგვარებადი პროცესია.

შესაბამის დოკუმენტებზე მუშაობა სამსახურებმა უკვე დაიწყეს. იმისათვის, რომ მივიღოთ კარგი, გამჭვირვალე დოკუმენტები, ისინი უნდა შევათანხმოთ საზოგადოებას, აუცილებლად პროფესიულ და არასამთავრობო წრეებს. დოკუმენტი უნდა იყოს საჯარო, ყველამ რომ იცოდეს რა არის ჩვენი ხედვა, საითკენ ვაპირებთ წასვლას უახლოესი პერიოდის განმავლობაში. ეს პოლიტიკური დოკუმენტი იქნება, როგორც მოსახლეობისთვის ძალიან კარგი შესაფასებელი, დაგვიდებენ წინ ჩვენივე დოკუმენტს და გვეტყვიან ესა თუ ის ღონისძიება, მათი აზრით, პასუხობს თუ არა ამ მიზნების მიღწევას. ასევე ეს იქნება ჩემი სახელმძღვანელო დოკუმენტი. ეს არის ჩემი მიდგომა.

რა თქმა უნდა, ცალკე აღებული ვახშმები, რომელსაც არავითარი სხვა დატვირთვა არ გააჩნია, არ შეიძლება და ვერ დაფინანსდება. მაგრამ, თუ ვახშამი არის რაღაც პროგრამის ნაწილი და პროგრამაზე უნდა იყოს ძირითადი აქცენტი და არა ვახშამზე, ამ შემთხვევაში შეიძლება განვიხილოთ.

თქვენ ამბობთ, რომ მნიშვნელოვანია საზოგადოებამ შეითანხმოს ღონისძიებები. არასამთავრობო ორგანიზაციები და სხვებიც, ამომრჩეველი ამბობდა, რომ ამ ტიპის ღონისძიებები ბიუჯეტიდან არ უნდა დაფინანსდეს  – მერია კი ამბობდა, რომ ეს ტურიზმს უწყობს ხელს, მაგრამ  არასოდეს წარუდგენია საზოგადოებისთვის ანალიზი, ციფრები, თუ როგორ აისახა ეს ტურიზმის განვითარებაზე ბათუმში. ამ საკითხს თქვენ როგორ მიუდგებით?

ზუსტად ეს არის, პირველ რიგში უნდა იყოს მიზნები და კრიტერიუმები – საითკენ მივდივართ და რისი მიღწევა გვინდა და შემდეგ თითოეულ ღონისძიებას აუცილებლად უნდა ახლდეს განმარტება, თუ რამდენად აკმაყოფილებს ეს ღონისძიება მიზნების მიღწევას. ეს არის მუშაობის ადვილი და ძალიან ეფექტური ფორმატი, რომელიც უზრუნველყოფს იმას, რომ თითოეული თეთრი დაიხარჯება მიზნობრივად. არის ასევე ცალკეული ღონისძიებები, რომელებიც დღე დღეზე იწყება, რომლებიც მე მემკვიდრეობით დამხვდა, სადაც უკვე გადაწყვეტილება მიღებულია და დაფინანსებულია. ეს ღონისძიებები ჩატარდება ასე თუ ისე, მაგრამ 2018 წლიდან ვიღებ  ძირითად ათვლას, ჩემი მონაწილეობით შემუშავებული პროგრამების და ჩემი უშუალოდ შემუშავებული ღონისძიებების. პირველი იანვრიდან ჩვენ ძალიან გულისყურით, ზედმიწევნით მივადევნებთ თვალს, რომ ყველაფერი იყოს აი ამ ფერხულში ჩართული.

 

გადაბეჭდვის წესი


ასევე: