ორდღიანი ვიზიტი თურქეთის რესპუბლიკაში ტრაპიზონის გუბერნიაში სტუმრობით დასრულდა

აჭარის მთავრობის თავმჯდომარე ზურაბ პატარაძემ ქალაქ ბათუმის მერთან, ლაშა კომახიძესთან და დელეგაციის სხვა წევრებთან ერთად, თურქეთის რესპუბლიკაში ორდღიანი ვიზიტი სტრაპიზონის გუბერნიაში სტუმრობით დაასრულა.

აჭარის დელეგაციის წევრებმა  შეხვედრები გამართეს ართვინისა და რიზეს რეგიონების გუბერნატორებთან და მერებთან, ასევე სავაჭრო-სამრეწველო პალატების და ბიზნეს-სექტორის წარმომადგენლებთან. ზურაბ პატარაძე ტრაპიზონის გუბერნატორს იუჯელ იავუზს და ტრაპიზონის მერს ორჰან ფევზი გუმრუქჩუოღლუს შეხვდა. ბათუმსა და ტრაპიზონს შორის დამეგობრებას ხელი 2000 წელს მოეწერა. მას შემდეგ ორ რეგიონსა და ორ ქალაქს შორის მრავალმხრივი თანამშრომლობა  მიმდინარეობს. შეხვედრებზე საუბარი შეეხო აჭარისა რეგიონსა და ტრაპიზონის გუბერნიას შორის ერთობლივი პროექტების განხორციელებას ტურიზმისა და ეკონომიკის, ასევე კულტურულ-ჰუმანიტარულ და საგანმამათლებლო სფეროებში.

ზურაბ პატარაძემ მადლობა გადაუხადა ტრაპიზონის გუბერნატორს იუჯელ იავუზის  და მის მოადგილეს 16 ივლისს ქ. გირესუნთან მომხდარი ავტოსაგზაო შემთხვევის შედეგად დაშავებული ქართული ცეკვის საბავშვო ანსამბლის წევრებისთვის  გაწეული დახმარებისათვის.

შეხვედრა ტრაპიზონის მერთან

აჭარის მთავრობის თავმჯდომარემ განსაკუთრებული ყურადღება გაამახვილა შავი ზღვის საკრუიზო პოტენციალზე და აღნიშნა, რომ შეთანხმების მიღწევის შემთხვევაში, შესაძლებელი იქნება შავი ზღვისპირა ქალაქებზე ერთიანი საკრუიზო მარშრუტის შემოღება, რაც კიდევ უფრო შეუწყობს ხელს ორი რეგიონისა და ორ ქვეყნის ტურიზმის განვითარებას.

აჭარის დელეგაციის თურქეთის რესპუბლიკაში ვიზიტის მიზანს საქართველოსა და თურქეთის მეზობელ რეგიონებს შორის არსებული მეგობრული ურთიერთობების კიდევ უფრო გაღრმავება და ეკონომიკური თანამშრომლობის განვითარება წარმოადგენს.

შეხვედრა ტრაპიზონის მერთან

შეხვედრები ართვინის და ტრაპიზონის სავაჭრო-სამრეწველო პალატებში

თურქეთის რესპუბლიკაში ვიზიტის ფარგლებში, აჭარის ავტონომიური რესპუბლიკის დელეგაცია ხოფის და ტრაპიზონის სავაჭრო-სამრეწველო პალატებს სტუმრობდა. მეზობელი გუბერნიების ბიზნეს-სექტორის წარმომადგენლებთან გამართულ შეხვედრებზე სიტყვით გამოვიდა დელეგაციის ხელმძღვანელი, აჭარის მთავრობის თავმჯდომარე ზურაბ პატარაძე. თურქეთის რესპუბლიკის ბიზნეს-სექტორის წარმომადგენლებს ზურაბ პატარაძემ საქართველოში შექმნილი საინვესტიციო კლიმატისა და აჭარის რეგიონში მიმდინარე წარმატებული პროექტების შესახებ მიაწოდა ინფორმაცია.

შეხვედრები სავაჭრო-სამრეწველო პალატებში

“საინვესტიციო მიმზიდველობის კუთხით, აჭარის რეგიონი მართლაც ერთ-ერთი ყველაზე საინტერესოა. აქ ყველა ის პირობაა შექმნილი,რომელიც საჭიროა ბიზნესის წარმოებისთვის: სწრაფად განვითარებადი ეკონომიკა, უსაფრთხოების მაღალი დონე, ბიზნესის კეთების სიმარტივე (მსოფლიოში მე-9 ადგილი), ეფექტური საჯარო სამსახურები, ლიბერალური კანონმდებლობა. ევროპასთან, დსთ-ს ქვეყნებთან, ჩინეთთან და სხვა გაფორმებული თავისუფალი ვაჭრობის ხელშეკრულებები საშუალებას იძლევა, რომ საქართველოში წარმოებული პროდუქცია საბაჟო მოსაკრებლების გარეშე გავიდეს 900 მილიონიან მომხმარებლიან ბაზარზე. ეს თავის მხრივ დიდ პოტენციალს უჩენს საქართველოს, როგორც სავაჭრო ჰაბს” – აღნიშნა ზურაბ პატარაძემ და იმედი გამოთქვა, რომ მეზობელ რეგიონებს შორის სავაჭრო-ეკონომიკური მიმართულებით თანამშრომლობა მომავალში კიდევ უფრო ეფექტური და ნაყოფიერი იქნება.

აჭარის ავტონომიური რესპუბლიკის დელეგაციის შემადგენლობაში იმყოფებოდა აჭარის სავაჭრო-სამრეწველო პალატის თავმჯდომარე თამაზ შავაძე, რომელმაც მეზობელ რეგიონებში სტუმრობა დადებითად შეაფასა.  მისი თქმით, ხოფის და ტრაპიზონის სავაჭრო-სამრეწველო პალატები საზღვართან სიახლოვის გამო საქართველოსთვის მნიშვნელოვან სავაჭრო ცენტრებს წარმოადგენენ, მაღალი მაჩვენებელი გვაქვს ასევე ამ რეგიონებიდან ბიზნეს-წრეების დაინტერესებისა და ინვესტიციების განხორციელების.

ორდღიანი ვიზიტის დასასრულს, აჭარის მთავრობის თავმჯდომარემ მეზობელი რეგიონების ხელმძღვანელ პირებთან შეხვედრები დადებითად შეაფასა. მისი თქმით, ვიზიტის ფარგლებში ჩვენი რეგიონისათვის ბევრი მნიშვნელოვანი საკითხი იქნა განხილული.

„ორი დღის განმავლობაში არაერთი შეხვედრა გავმართეთ სავაწრო-ეკონომიკური, ასევე, კულტურულ-საგანმანათლებლო მიმართულებებით. პირველ რიგში ვისაუბრეთ სარფის საბაჟო გამშვებ პუნქტზე. ართვინის გუბერნატორთან ერთად მივიღეთ გადაწყვეტილება გაიმართოს  პერმანენტული ორმხრივი შეხვედრები, სადაც საბაჟოზე არსებული მდგომარეობა იქნება განხილული. ერთ-ერთი მთავარი თემა, ეს არის საკრუიზო ტურიზმი. ჩვენ შევთახმდით პორტის ხელმძღვანელობასთან, რომ გავმართავთ საქმიან შეხვედრას, სადაც განვიხილავთ ახალ საკრუიზო მარშუტის შექმნის საკითხს. ჩვენი სურვილია შავ ზღვაში შემოსულ ლაინერებს შევთავაზოთ ტრაპიზონი, შევთავაზოთ ბათუმი. ამ საკითხზე ჩვენ გვექნება მსჯელობა სხვადასხვა ქვეყნის წარმომადგენლებთან,  საუბარია ბულგარეთზე, უკრაინასა და რუმინეთზე, რომლებიც ასევე ჩაერთვებიან ამ ტურისტულ მარშრუტში“- აცხადებს ზურაბ პატარაძე.

აჭარის მთავრობის პრესსამსახური
ნეტგაზეთის მასალების სხვა გამოცემებში გადაბეჭდვის წესი
ავტორი