ბათუმში ზვიად გამსახურდიას ძეგლის დადგმას გეგმავენ

ბათუმში ზვიად გამსახურდიას ძეგლის დადგმის ინიციატივით ბათუმის საკრებულოს ნუგზარ ჩხაიძემ მიმართა. ბათუმის მოქმედი საკრებულოს განათლების, კულტურისა და სპორტის კომისიის თავმჯდომარის ნინო ბერაძის განმარტებით, კომისიაში ამ საკითხზე იმსჯელეს და შეთანხმდნენ, რომ ბათუმში საქართველოს პირველი პრეზიდენტის ძეგლი უნდა დაიდგას, თუმცა შესაბამისი განკარგულება არ მოუმზადებიათ.

ინიციატორი მიიჩნევს, რომ ძეგლი მემედ აბაშიძის, ზვიად გამსახურდიასა და რუსთაველის ქუჩებს შორის არსებულ სკვერში უნდა დაიდგას.

მდებარეობასთან დაკავშირებით ჩვენ მივმართეთ მერიის არქიტექტურის სამსახურს, რომ წარმოადგინონ მათი ხედვა“ – ამბობს ნინო ბერაძე.

მემედ აბაშიძის, ზვიად გამსახურდიასა და რუსთაველის ქუჩებს შორის არსებულ გამწვანებულ ტერიტორიაზე ბათუმის მერიის საკუთრებაშია 761 კვ/მ – „გმირთა სკვერი“, სადაც დაღუპული იუნკერების  საფლავია და სადაც ეკლესიის მესვეურთა ინიციატივით ჯვარია აღმართული. ამ ადგილს სკვერის სტატუსი მიენიჭა 2011 წლის დეკემბერში. აღნიშნული ტერიტორიის დარჩენილი ნაწილის [„გმირთა სკვერის“ გამოკლებით] მესაკუთრე კი საჯარო რეესტრში მითითებული არ არის.

ნუგზარ ჩხაიძე აჭარის უზენაესი საბჭოს პირველი მოწვევის დეპუტატი იყო ბლოკიდან „მრგვალი მაგიდა თავისუფალი საქართელო“. ის იყო ასევე ბათუმის მერობის კანდიდატი „ლეიბორისტული პარტიიდან“ 2014 წლის არჩევნებში.

20 ნოემბერს ახალარჩეული საკრებულოს პირველი სხდომაა დაგეგმილი, შესაბამისად, ზვიად გამსახურდიას ძეგლის ბათუმში განთავსების საკითხსაც ახალი საკრებულო გადაწყვეტს.

ნეტგაზეთის მასალების სხვა გამოცემებში გადაბეჭდვის წესი


ავტორი