მთავრობის სხდომაზე 2018 წლის აჭარის ბიუჯეტის პროექტს განიხილავენ. 2017 წელთან შედარებით, მომავალი წლის ბიუჯეტი თითქმის 45 მილიონით იზრდება.
ინფრასტრუქტურული პროექტების დაფინანსება მთავრობისთვის ისევ პრიორიტეტია. აჭარის მთავრობა ბათუმი-ქედა-ხიჭაურის დასახლების გაზსადენის, ასევე ბათუმში, საზღვაო ნავსადგურის მიმდებარე ტერიტორიაზე საგზაო ესტაკადის მშენებლობას აანონსებს.
ზურაბ პატარაძემ მთავრობის სხდომაზე თქვა, რომ “ამ მეგა პროექტების განხორციელება საზოგადოების დაკვეთაა”.
მომავალ წელს აჭარის ფინანსთა და ეკონომიკის სამინისტრო შუახევში, ღომას მთის ტურისტული ინფრასტრუქტურის პროექტირების დაფინანსებასაც აპირებს.
ჯამში ამ უწყების ბიუჯეტი 19 მილიონ 455 ათასი ლარით იზრდება.
3 მილიონ 708 ათასით იზრდება აჭარის განათლების სამინისტროს ბიუჯეტი. სამინისტრო 14 სკოლის მშენებლობას, 23 სკოლის რეაბილიტაციას, 27 სკოლის მშენებლობა-რეაბილიტაციის საპროექტო დოკუმენტაციის შესყიდვას გეგმავს.
განათლების სამინისტრო მომავალ წელს მხოლოდ 8 საჯარო სკოლის აღჭურვას მოახერხებს თანამედროვე ინვენტარით და 3 სკოლაში ლაბორატორიის კომპლექტის შეტანას.
რაც შეეხება კულტურულ მემკვიდრეობას, 2018 წლის ბიუჯეტის პროექტის მიხედვით, პრიორიტეტი ისევ ხიხანის, პეტრას და გონიოს ციხეებია.
სამინისტროს ბიუჯეტში ისევ იქნება თანხა გათვალისწინებული “ბათუმის ისტორიის მუზეუმის” მოწყობისთვის. ამ მუზეუმის მოსაწყობად თანხა რამდენიმე წლის წინ იყო გამოყოფილი, მუზეუმი მოეწყო, მაგრამ შენობაში წყალი ჩადის და მისი გახსნა განათლების სამინისტრომ დღემდე ვერ მოახერხა.
მხოლოდ 856 ათასი ლარით იზრდება რეგიონში სოფლის მეურნეობის დაფინანსება. ამ მიმართულებით სამინისტრო ნედლი რძის რეალიზაციის ხელშეწყობას აპირებს, ასევე 20 ჰექტარზე ჩაის ახალი პლანტაციის გაშენებას.
აჭარის მთავრობის სხდომაზე თითოეული მინისტრი ცალ-ცალკე საუბრობს იმ პროგრამებზე, რომელთაც 2018 წლის ბიუჯეტიდან დააფინანსებენ.
ბიუჯეტის პროექტი განხილვის შემდეგ აჭარის უმაღლესმა საბჭომ უნდა დაამტკიცოს.
