ფერმერებს არასტანდარტულ მანდარინში სახელმწიფო წელსაც 10 თეთრს გადაუხდის

აჭარის სოფლის მეურნეობის სამინისტრო, გასული წლის მსგავსად, წელსაც 1 კილოგრამ არასტანდარტულ მანდარინში, ფერმერებს სუბსიდირების სახით 10 თეთრს გადაუხდის, სუბსიდირება კი მხოლოდ ციტრუსის მიმღებ და გადამამუშავებელ საწარმოებში ჩაბარებულ მანდარინზე გავრცელდება.

სამინისტროში განმარტავენ, რომ ქობულეთის ციტრუსის გადამამუშავებელ საწარმოებში არასტანდარტული [„ენესი“] მანდარინის ჩაბარების ფასი 20 თეთრია, საიდანაც ღირებულების – 10 თეთრს საწარმო გადაიხდის, დარჩენილი 10 თეთრი კი სუბსიდირების სახით ანაზღაურდება.

არასტანდარტული მანდარინის სუბსიდირება ლიმიტირებული არ იქნება და სახელმწიფო იმ ოდენობის მანდარინის მიღებას დააფინანსებს, რა ოდენობის მანდარინსაც ჩააბარებენ ფერმერები.

არასტანდარტული მანდარინის სუბსიდირებისთვის აჭარის სოფლის მეურნეობის სამინისტროს ამ დროისთვის 600 000-მდე ლარი აქვს გამოყოფილი. იმ შემთხვევაში, თუ გამოყოფილი თანხა არასაკმარისი აღმოჩნდება, სამინისტრო თანხის დამატებას  გეგმავს.

ნეტგაზეთის მასალების სხვა გამოცემებში გადაბეჭდვის წესი
ავტორი