მთავარი,მთიანი აჭარა,სიახლეები

ქედის შესასვლელთან გზის საყრდენი კედლის აღსადგენად 1,4 მილიონი ლარი დაიხარჯება

30.10.2017 • 2504
ქედის შესასვლელთან გზის საყრდენი კედლის აღსადგენად 1,4 მილიონი ლარი დაიხარჯება

ბათუმი-ახალციხის საავტომობილო გზაზე, დაბა ქედის შესასვლელთან, დაზიანებული ქვედა საყრდენი კედლის აღდგენის სამუშაოებისთვის 1,4 მილიონი ლარია გათვალისწინებული. მდინარე აჭარისწყლის გასწვრივ საყრდენი კედელი დაახლოებით 204 მეტრზე გაკეთდება, ამასთან გაფართოვდება ავტომაგისტრალის სავალი ნაწილიც.

საპროექტო დოკუმენტაციის მიხედვით, რომელიც შედგენილია „პროექტმშენკომპანის“ მიერ, აღნიშნულია, რომ „საავტომობილო გზის ბათუმი-ახალციხის 38-ე კმ მდებარეობს ქედის მუნიციპალიტეტის ცენტრთან ახლოს, მდინარე აჭარისწყლის მიმდებარედ. საპროექტო მონაკვეთზე მდებარე ქვედა საყრდენი კედელი დაზიანებულია, ბეტონი გამოფიტულია და აღენიშნება ბზარები. გზის სავალი ნაწილის სიგანე შეადგენს 6 მეტრს და არ გააჩნია გვერდილები, რაც იწვევს ტრანსპორტის გადაადგილების შეფერხებას და საფრთხეს უქმნის მგზავრთა უსაფრთხო გადაადგილებას“.

დოკუმენტაციაში ასევე აღნიშნულია, რომ „ვინაიდან საპროექტო მონაკვეთზე არსებული გზა არ შეესაბამებოდა მოქმედი ნორმების სტანდარტებს, პროექტით მოხდა არსებული გზის გაუმჯობსება და სათანადო პარამეტრებში მოყვანა. კერძოდ, გზის გაბარიტი შეირჩა მოქმედი ნორმების შესაბამისად 7.5 მ და გვერდულები 1.5 მეტრი. ასევე მოხდა არსებული მილების დაგრძელება. გზის მარცხენა მხარეს მოეწყო კიუვეტი სიგრძით 170მ“.

ბათუმი-ახალციხის საავტომობილო გზა შიდასახელმწიფოებრივი მნიშვნელობისაა, ამიტომ საყრდენი კედლის აღდგენისა და გზის გაფართოების სამუშაოებს საქართველოს საავტომობილო გზების დეპარტამენტი შეისყიდის. დეპარტამენტმა შესაბამისი ელექტრონული ტენდერი უკვე გამოაცხადა. წინადადებების მიღება 2017 წლის 15 ნოემბერს დაიწყება და 20 ნოემბერს დასრულდება. სამუშაოები გამარჯვებულთან ხელშეკრულების გაფორმებიდან 6 თვეში უნდა დასრულდეს.

 

გზის ქვედა საყრდენი კედლის აღდგენის საპროექტო დოკუმენტაციიდან

ბათუმი-ახალციხის მაგისტრალზე დაბა ქედაში მისვლამდე, სოფელ პირველ მაისთან გზის მონაკვეთი ხშირად იხერგება აქ მეწყრული პროცესების გამო. ამ მონაკვეთში მეწყერი ბოლოს, მიმდინარე თვის დასაწყისში ჩამოწვა. აქ დაზიანებულია ფერდის გასამაგრებელი კედელიც. საავტომობილო გზების დეპარტამენტის აჭარის დირექციაში აცხადებენ, რომ აღნიშნულ მონაკვეთთან დაკავშირებით მუშაობენ საპროექტო დოკუმენტაციაზე, რომლის მომზადებისთანავე გამოცხადდება შესაბამისი ტენდერი.

 

გადაბეჭდვის წესი


ასევე: