ქედაში ავტობუსიდან ბავშვების გადმოცვენაზე გამოძიება დაიწყო

ქედაში, სოფელ წონიარისთან, მოძრავი ავტობუსიდან ბავშვები გადმოცვივდნენ. სამი დაშავებული ბათუმის დედათა და ბავშვთა ჯანმრთელობის დაცვის ცენტრში რჩება. ერთ არასრულწლოვანს ქირურგიული ოპერაცია უკვე ჩაუტარდა და რეანიმაციულ განყოფილებაშია მოთავსებული.

შემთხვევა გუშინ გვიან საღამოს მოხდა. ბავშვები ბათუმის მე-6 საჯარო სკოლის მოსწავლეები არიან და სხალთაში იყვნენ ექსკურსიაზე. ავტობუსის კარი სხალთიდან ბათუმში დაბრუნების დროს გაიხსნა, რა დროსაც 6 ბავშვი დაშავდა.

აჭარის ჯანდაცვის მინისტრის მოადგილის, ლელა სურმანიძის ინფორმაციით, ერთ-ერთ არასრულწლოვანს თავის ქალის ტრავმა ჰქონდა, ოპერაცია ჩაუტარდა და მისი მდგომარეობა სტაბილურია.

„ქირურგიულ განყოფილებაში რჩება ორი არასრულწლოვანი, რომლებსაც თავის ტვინის შერყევა აქვთ, მაგრამ ძალიან მსუბუქი ფორმით. არც ერთ მათგანს არ აღენიშნება რაიმე მძიმე ფორმის დაზიანება, მოტეხილობა და ასე შემდეგ. სამ მოსწავლეს ზედაპირული დაზიანებები ჰქონდა და ისინი გუშინ ღამით გაწერეს კლინიკიდან,“ – ამბობს ლელა სურმანიძე.

შინაგან საქმეთა სამინისტროს ინფორმაციით, დაწყებულია გამოძიება სისხლის სამართლის კოდექსის 276-ე მუხლის პირველი ნაწილით, რაც ტრანსპორტის მოძრაობის უსაფრთხოების, ან ექსპლუატაციის წესების დარღვევას გულისხმობს. დანაშაული ისჯება ჯარიმით, ან თავისუფლების შეზღუდვით ვადით სამ წლამდე, ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

ნეტგაზეთის მასალების სხვა გამოცემებში გადაბეჭდვის წესი


ავტორი