7127 ლარსა და 20 თეთრს აჭარის ფინანსთა და ეკონომიკის სამინისტრო შპს „სოკარ ჯორჯია პეტროლიმს“ სთხოვს. დავის საგანი ბათუმში, ხიმშიაშვილის ქუჩაზე, „მაკდონალდსის“ მიმდებარე ტერიტორიაა, რაშიც „სოკარი“ 2014 წლის 8 ივლისიდან 2015 წლის 24 მარტამდე ფულს არ იხდიდა. საქმეს ბათუმის საქალაქო სასამართლოში მოსამართლე გოჩა ფუტკარაძე განიხილავს.
საუბარია „მაკდონალდსის“ გარე ტერიტორიის ნაწილსა და გზაზე [აქ „სოკარს“ ბენზინგასამართი სადგურიც აქვს]. „სოკარ ჯორჯია პეტროლიუმის“ იურისტი, მარინე ხაჩიძე ამბობს, რომ თანხის გადახდას გზაში სთხოვენ და ადგილში, რომელიც კომპანიამ კეთილმოაწყო. იჯარის ხელშეკრულება სადავო მიწის ნაკვეთზე 15 წლის ვადით 2015 წლის აპრილში გაფორმდა.
„გზა მოაწყო კი, მაგრამ ეს გზაც ამ კომპანიას სჭირდებოდა თავისი სამეწარმეო საქმიანობიდან გამომდინარე,“ – გვითხრა გელა ცინცაძემ, აჭარის ფინანსთა და ეკონომიკის სამინისტროს იურიდიული სამსახურის უფროსმა.
სასამართლო სხდომის დაწყებისთანავე მოსამართლე დაინტერესდა, ხომ არ შედგა მხარეებს შორის შეთანხმება.
„არ შემოსულა განცხადება, თუმცა ჩვენ გამოვხატავთ მზაობას შეთანხმებასთან დაკავშირებით“, – მიმართა მოსამართლეს ზვიად მაკარაძემ, აჭარის ფინანსთა და ეკონომიკის სამინისტროს იურისტმა.
სამინისტრომ დღევანდელ პროცესზე სარჩელის სამართლებრივი საფუძვლები დააზუსტა – კანონით გათვალისწინებული პირგასამტეხლო დეტალურად დაითვალა, ძირ თანხას დაუმატა და დაჯამებული ციფრი წარმოადგინა. თავდაპირველად სამინისტრო „სოკარისთვის“ 4718 ლარის და 80 თეთრის დაკისრებას ითხოვდა, ასევე პირგასამტეხლოს თითოეული ვადაგადაცილებული დღისთვის. 7127 ლარსა და 20 თეთრში კი პირგასამტეხლოთი გათვალისწინებული თანხაც შედის.
„ეს არ არის იმ სტანდარტით შედგენილი დოკუმენტაცია, რაც უნდა იყოს წარმოდგენილი… ამ ფორმით სასამართლოსთვის მიმართვა გათვალისწინებული არ არის სამოქალაქო კანონმდებლობით. გაუგებარია ბატონი ზვიადის განმარტება, რომ მან მხოლოდ სამართლებრივი საფუძველი შეცვალა და არ შეუცვლია სარჩელის მოთხოვნა…“ – აღნიშნა „სოკარის“ იურისტმა, მარინე ხაჩიძემ. მან ვრცლად ისაუბრა იმასთან დაკავშირებით, თუ რატომ არ უნდა დააკმაყოფილოს სასამართლომ ეკონომიკის სამინისტროს შუამდგომლობა.
მოსამართლემ „სოკარ ჯორჯიას“ პოზიცია არ გაითვალისწინა. გოჩა ფუტკარაძემ თქვა, რომ დოკუმენტაცია, რაც ეკონომიკის სამინისტრომ წარმოადგინა, პირდაპირ თუ არა ირიბად უკავშირდება სარჩელს.
ეკონომიკის სამინისტროს შუამდგომლობის დაკმაყოფილების შემდეგ შუამდგომლობა „სოკარმა“ დააყენა: „ჩვენ გვექნება ახალი მტკიცებულებები, გვჭირდება დრო, მოვითხოვ საქმის გადადებას,“ – თქვა მარინე ხაჩიძემ.
„მტკიცებულებების წარმოდგენა თუ გსურდათ, ამისთვის საკმარისი დრო იყო…“ – რეპლიკით უპასუხა „სოკარის“ წარმომადგენელს ეკონომიკის სამინისტროს იურისტმა.
მოსამართლემ „სოკარის“ შუამდგომლობა დააკმაყოფილა და პროცესი გადადო, თუმცა დავა გაგრძელდა შემდეგი სხდომის თარიღზე.
„ნოემბერში ჩვენ არ გვცალია, ძალიან ბევრი საქმე გვაქვს, ნოემბერში ვერ მოვახერხებთ,“ – თქვა „სოკარის“ წარმომადგენელმა, მარინე ხაჩიძემ.
„ოქტომბერში რომ იყოს, არ გაწყობთ?“ – იკითხა სამინისტროს იურისტმა.
„ხუმრობთ ხომ?“ – კითხვითვე დააბრუნა პასუხი მარინე ხაჩიძემ.
„მარტში ხომ არ ჩავნიშნოთ, მარტში?“ – იკითხა მოსამართლემ.
პაუზის შემდეგ მოსამართლემ განმარტა, რომ ორივე მხარემ უნდა მოიცალოს, რათა დროულად მოხდეს საქმის განხილვა. საბოლოოდ მორიგი სხდომა 11 დეკემბერს ჩაინიშნა.
