ზურაბ ჟვანიას მიერ გაკეთებული განცხადებით ის, ვინც მის შესახებ „ამ ბოლო პერიოდში გესლიან განცხადებებს აკეთებდა, საარჩევნო სიაში ვერ მოხვდება“. იგი მათგან ბოდიშის მოხდასაც კი ითხოვს. ჟვანიამ პირველ რიგში მინიშნება დავით ბერძენიშვილზე გააკეთა. არსებობს თუ არა დავით ბერძენიშვილის სიიდან ამოვღების შესაძლებლობა? – „გაზეთი ბათუმელები“ დავით ბერძენიშვილს ესაუბრება:
ეს არა მხოლოდ მინიშნება იყო, არამედ პირდაპირ დამასახელა კიდეც. მე არ ვაპირებ სიტუაციის გამწვავებას, დარწმუნებული ვარ, რომ დღეს არის პოლიტიკური ძალების ერთიანობის საჭიროება, რომელთაც აიღეს პასუხისმგებლობა რევოლუციაზე. ამიტომ ელემენტარული წესია პოლიტიკის, უნდა ვცნოთ ერთმანეთის უფლება. განსხვავებულ პოლიტიკურ წარსულზე, მითუმეტეს რევოლუციის შემდგომ პერიოდში, რაიმე განსაკუთრებული პრეტენზიები მე მისთვის არ წამიყენებია. მე ვვარაუდობ, რომ ეს პრობლემები მოგვარდება და ამ გაერთიანებაში იქნებიან, როგორც ჟვანიას გუნდის წარმომადგენლები, ისე „რესპუბლიკელები“. ასლან აბაშიძის რეჟიმის წინააღმდეგ, ყველაზე რთულ და გადამწყვეტ სტადიაში, გაუგებარი იქნებოდა აჭარაში მცხოვრები საქართველოს მოქალაქეებისთვის ჩემი არ ყოფნა ამ სახელისუფლო გაერთიანებაში. მოლოდინი ბათუმში დიდია იმისა, რომ ასლან აბაშიძე აღარ იქნება უახლოეს ხანებში და, რა თქმა უნდა, ბათუმელებისათვის ჩემი ყოფნა ამ გაერთიანებაში მნიშვნელოვანი დამაიმედებელი ფაქტორი იქნება. ის მბჟუტავი იმედი, რაც ასლან აბაშიძეს და მის გარემოცვას გაუჩნდა ჟვანიას ამ განცხადების შემდეგ, ვფიქრობ ხვალვე ჩაქრება.
თქვენ აჭარის ხელისუფლებასთან ყველაზე შეურიგებელი პოლიტიკური პერსონა ხართ, ამის გამო ხომ არ დაუპირისპირდით თქვენი და ჟვანიას ერთმანეთს?
მე იმედი მაქვს, რომ ყველაფერი მოგვარდება, რადგან ძალიან უხერხულ მდგომარეობაში აღმოჩნდება ჟვანია ბათუმელების წინაშე. სრულიად გაუგებარი იქნება წარსულში რაღაც გაუგებრობაზე საუბარი, როცა წინ არის ბრძოლა აბაშიძის რეჟიმის წინააღმდეგ. ვფიქრობ, ჟვანიას მხრიდან აბაშიძესთან გარიგება არ არის შესაძლებელი, შესაძლოა ზურაბ ჟვანიას მისი პოლიტიკური წრის წარმომადგენლების უზრუნველსაყოფად, [რამდენიმე მათგანზე არის პრეტენზიები „ნაციონალური მოძრაობიდან“], დასჭირდა კენჭი ესროლა ჩვენს ბანაკში. მაგრამ ვფიქრობ, ჩვენ მაინც გაცილებით მეტი რამ გვაერთიანებს, ვიდრე გვაშორებს. უპირველეს ყოვლისა ეს არის ასლან აბაშიძის რეჟიმი. ჩემს ინტერესებში შედის ჩემი ქვეყნის პრემიერ-მინისტრთან მქონდეს პარტნიორული ურთიერთობები აბაშიძის რეჟიმის წინააღმდეგ ბრძოლაში.
რამდენად სტაბილურია „ნაცმოძრაობა“ დღეს და კობა დავითაშვილის შემდეგ, ხომ არა არის მოსალოდნელი მისი გახლეჩა?
ბუნებრივია, მტკივნეული პროცესია, როცა „ნაციონალურ მოძრაობაში“ შედის „გაერთიანებული დემოკრატების“ საკმაოდ დიდი ჯგუფი. პრაქტიკულად „გაერთიანებული დემოკრატები“ პარტიულად უერთდებიან „ნაციონალურ მოძრაობას“ და ამ პროცესს ახლავს მისი პრობლემები. მაგრამ ეს პრობლემები „რესპუბლიკელებს“ არ გვეხება. ჩვენ ვიყავით სააკაშვილის „ნაციონალური მოძრაობის“ უახლესი პარტნიორები და ჩვენ ვრჩებით სააკაშვილის გაფართოებული „ნაციონალური მოძრაობის“ პარტნიორებად. მითუმეტეს აბაშიძის რეჟიმთან მიმართებაში სრულიად ნათელია ჩვენი ერთობის საჭიროება.
რამდენად ქმედითუნარიანია ახალი ხელისუფლება?
მე მაქვს სრული ნდობა პრეზიდენტ სააკაშვილის მიმართ აბაშიძის რეჟიმთან დამოკიდებულებაში. ყველა ის საკითხი, რაც პრეზიდენტის პრეროგატივაა, საგარეო პოლიტიკა, ქვეყნის უსაფრთხოება, კორუფციის წინააღმდეგ ბრძოლა, ჯარის გაძლიერება მიდის იმ მიმართულებით, რომელსაც მე ვიზიარებ. სააკაშვილთან ერთად 2 წელი წარმატებით ვთანამშრომლობდით, ჩვენ ერთად მოვიგეთ საკრებულოს არჩევნები, საპარლამენტო არჩევნები, ერთად ჩავატარეთ მიტინგი ბათუმში 23 ოქტომბერს და ერთად ჩავატარეთ საპრეზიდენტო არჩევნები 4 იანვარს.
საარჩევნო სიებზე რას გვეტყვით, რა სიებით ჩატარდება აჭარაში არჩევნები?
არავინ არ ჩაატარებინებს აბაშიძეს არჩევნებს 300 ათასი ამომრჩევლით, რადგან ასეთი სიები არ არსებობს. ეს არის აბაშიძის მორიგი მცდელობა, რომ მიითვისოს ხმები. აბაშიძე იძულებული იქნება ან შეეგუოს იმას, რომ არჩევნები გამჭვირვალე იყოს, ეს მისთვის ძალიან მძიმე იქნება, ან ამუშავდება საქართველოს ხელისუფლების ორგანოები ამ დანაშაულებრივი რეჟიმისა და მისი ხელმძღვანელების წინააღმდეგ.
აჭარაში განვითარებულ მოვლენებზე რას იტყვით და რა შედეგები მოყვება აქ მიმდინარე პროცესებს?
აბაშიძე მოვიდა ნოდარ იმნაძის სისხლით, ჩვენ მას გავისტუმრებთ უსისხლოდ. ასლან აბაშიძე სისხლის ღვრის უზრუნველყოფას ვერ შეძლებს.
რას იტყვით თბილისში დაკავებული „აღორძინების“ მომხრე სტუდენტების თაობაზე?
მე მაქვს მხოლოდ ის ინფორმაცია, რასაც აცხადებენ ბათუმელი „კმარელები“, რომ ეს ხალხი მათ დარბევაში მონაწილეობდნენ და სამართალდამცავი ორგანოების წარმომადგენლები ამბობენ, რომ მათ ჰქონდათ იარაღი. მე არ მაქვს შესაძლებლობა შევამოწმო ეს ინფორმაცია. ისე, ბათუმში ჯერ კიდევ სხედან პოლიტპატიმრები და უპირველეს ყოვლისა მათი ბედით უნდა დაინტერესებულიყო ის ხალხი, ვინც პრეტენზიებს უყენებს ცენტრალურ ხელისუფლებას.
თუკი გაგრძელდება ზურაბ ჟვანიას მხრიდან თქვენი იგნორირება, როგორ გააგრძელებთ ბრძოლას?
მე არ განვიხილავ იმ ვარიანტს, რომ არ ვიქნები საპარლამენტო სიაში, რადგან ეს დააზარალებს აბაშიძის საწინააღმდეგო მოძრაობას, თორემ მე პარლამენტშიც ვყოფილვარ და მის გარეთაც. საზოგადოებრივი აქტიურობა არ არის მაინცდამაინც პარლამენტზე დამოკიდებული. მე მაინც შევინარჩუნე ქართული საზოგადოების კეთილგანწყობა ჩემდამი. მაგრამ დღეს არის სხვა ეტაპი. აბაშიძის რეჟიმის ჩამოშორებას განსაზღვრავს ის, თუ ჩვენი წრე, „რესპუბლიკელების“ ჯგუფი, რამდენად მძლავრად იქნება წარმოდგენილი საქართველოს ხელისუფლებაში. მე ვფიქრობ, რომ ძალიან მალე ბათუმი იქნება აბაშიძის გარეშე.
