"ბათუმელების“ არქივიდან

„აფსაროსი“ ახალგაზრდული ფორუმის შექმნის იდეით გამოდის

11.02.2004 • 1577
„აფსაროსი“ ახალგაზრდული ფორუმის შექმნის იდეით გამოდის

აჭარაში პოლიტიკურ სპექტრში ახალი სახეები და ორგანიზაციები ჩნდებიან. ერთ-ერთი ასეთია ახალგაზრდული ორგანიზაციაა „აფსაროსი“. ორგანიზაციის ხელმძღვანელის, მირდატ ქამადაძის განცხადებით „აფსაროსი“ იატაკქვეშეთში ჯერ კიდევ 2 ნოემბრამდე შეიქმნა. „ჩვენ არჩევნებში კომისიის წევრების სტატუსით სხვადასხვა პარტიის მეშვეობით ვღებულობდით მონაწილეობას. როდესაც ქვეყანაში მშვიდობიანი რევოლუცია მოხდა გამოვაჩინეთ ჩვენი სახე. არასდროს გვქონია თვითმიზნად სახალხოდ გამოსვლა, მთავარი იყო საქმე გვეკეთებინა. ახლახანს ჩამოყალიბდა ორგანიზაციები „ჩვენი აჭარა“, „დემოკრატიული აჭარა“ და სხვები. რადგან ჩვენ გვაქვს ერთიანი მიზანი, აჭარაში მშვიდობიანი მეთოდებით შეიცვალოს დიქტატორული რეჟიმი, ყველა ამ ორგანიზაციასთან ვთანამშრომლობთ“. „აფსაროსი“ ამჟამად „ჩვენ აჭარაშია“ გაწევრიანებული.

ამ ეტაპზე ორგანიზაცია 150 წევრს ითვლის. მიზანი კი მშვიდობიანი, კონსტიტუციური გზით არსებულ რეჟიმის რიგგარეშე არჩევნებით შეცვლა და აჭარაში დემოკრატიული ინსტიტუტების დანერგვაა. „ამ რეჟიმმა ყველაფერში შეგვიშალა ხელი. უმთავრესად მორალური და სამართლებრივი თვალსაზრისით. მაშინ როდესაც ქვეყანა თავზე გვენგრეოდა, აფხაზეთსა და სამაჩაბლოს ვკარგავდით, ასლან აბაშიძემ ავტონომიის საზღვრები ჩარაზა. ქვეყანა შიმშილობდა, ბათუმის ძვირადღირებული ოპერის თეატრი კი საზღვარგარეთ გასტროლებზე დადიოდა და აჭარის ბიუჯეტიდან მილიონები იხარჯებოდა. მისასალმებელია, როდესაც ხელოვნებას პატივს სცემს ადამიანი, მაგრამ გააჩნია რა დროს და რა პირობებში. რაც შეეხება სამართლებრივ თვალსაზრისს, როდესაც აფხაზეთში ქართულ ჯარის საუკეთესო ტანკი ტ-65 იყო, ასლან აბაშიძეს გოგებაშვილის ქუჩაზე უახლოესი ტიპის ტ-72 ტანკი იცავდა“, – მირდატ ქამადაძე.

„აფსაროსის“ ლიდერებს პრეტენზიები ეკონომიკურ საკითხებში აქვთ: „აჭარა არის ყველაზე დიდი ეკონომიკური პოტენციალის მქონე მხარე საქართველოში. ქვეყანაში საშუალო ფენის ჩამოყალიბება შესაძლებელი იქნებოდა სწორედ აჭარიდან დაწყებულიყო. როცა აქ ინვესტორი შემოდიოდა, ხელისუფლება მათ გარკვეულ პროცენტებს თხოვდა. ბევრი ბიზმენსმენი, რომელსაც თავისი ჭკუით შეეძლო ბიზნესის გაკეთება, იმის გამო, რომ აბაშიძის ნათესავები ბიზნესის ყველა სფეროში წილში ჯდებიან, იძულებულნი გახდნენ დაეტოვებინათ აჭარა და სხვაგან წარემართათ თავიანთი საქმიანობა“, – ამტკიცებს „აფსაროსის“ აქტივისტი როლანდ ბერიძე. ახალგაზრდები მშვიდობის დაცვის თემას და მხედრიონის არშემოშვებასაც შეეხნენ. „აჭარის ხელისუფლებამ მხედრიონი არ შემოუშვა, მაგრამ აქ შექმნა მხედრიონის მსგავსი დაჯგუფება, რომელიც განუწყვეტლივ არბევს ადგილობრივ მოსახლეობას“, – აცხადებს ქამადაძე.

აჭარაში ხელისუფლების შეცვლის აუცილებლობას „აფსაროსი“ ასე ასაბუთებს: „ასლან აბაშიძის ფსიქოლოგიური პორტრეტი ისეთია, რომ ამ ადამიანს არ შეუძლია იმ სფეროში მოღვაწეობა, სადაც ერთპიროვნულად არ მართავს. მან თავისი ნებასურვილის მიხედვით უნდა განსაზღვროს ყველაფერი. ასლან აბაშიძემ თავისი თავი ამოწურა“.

აჭარაში ბოლო დროს ოპოზიციურ ახალგაზრდულ ორგანიზაციებთან ერთად ხელისუფლების მხარდამჭერი  ორგანიზაციებიც მომრავლდა. საზოგადოება მათი ურთიერთდაპირისპირების მოწმე ბოლო დროს სულ უფრო ხშირად ხდება. „აფსაროსი“ ახალგაზრდული ფორუმის შექმნის იდეით გამოდის. „ჩვენ ახალგაზრდები აუცილებლად გამოვნახავთ საერთო ენას და ვიცხოვრებთ ერთად“, – აცხადებს პაატა აროშიძე.

და ბოლოს, რომელი პოლიტიკური ძალის დროშის ქვეშ დაივანებს „აფსაროსის“ ამბიციები?! როგორც ისინი აცხადებენ, „მიზნები პოლიტიკური აქვთ, მაგრამ ამ ეტაპზე მხოლოდ აჭარაში დიქტატორული ხელისუფლების შეცვლისთვის იბრძვიან“ და რომელიმე პარტიას ღიად მხარს აჭარის პარლამენტის რიგგარეშე არჩევნების დროს დაუჭერენ.

 

გადაბეჭდვის წესი


ასევე: