გუშინ „ჩვენი აჭარას“ მიერ გამართული პრესკონფერენციის მთავარი თემა რამდენიმე დღის წინ დაკავებული მოძრაობის აქტივისტებისათვის წართმეული ორგანიზაციის წევრთა სიები იყო. პოლიციის მიერ დაკავებულ ძმებ ჩხეტიებსა და „ჩვენი აჭარას“ ბათუმის ორგანიზაციის გამგეობის წევრს დავით ბაციკაძეს მხარდამჭერთა 3 500 ხელმოწერა წაართვეს.
„ჩვენი აჭარას“ ერთ-ერთი ლიდერის, თამაზ დიასამიძის განცხადებით, პოლიციელები ამ სიების მიხედვით აქტივისტებს სახლში აკითხავენ და აშანტაჟებენ. დიასამიძე გაოცებას ვერ მალავს იმის თაობაზე, რომ შსს სიებს არ უბრუნებს. „იმავე ღამეს შევხვდით ჯემალ გოგიტიძესა და ჯუმბერ ტაკიძეს, რომლებიც შეგვპირდნენ, რომ სიებს უკან დაგვიბრუნებდნენ. დღეს კი ისინი აცხადებენ, რომ სიებს ვერ მიაკვლიეს. მინისტრმა განაცხადა – არ ვიცი სად არის სიები, სხდომაც მოვიწვიე, მაგრამ თავი და ბოლო ვერ გავიგეო“.
„ჩვენი აჭარას“ ლიდერები აცხადებენ, რომ სიებში აღნიშნულია წევრების რეკვიზიტები. „აშკარად ნადირობდნენ ამ სიებზე. კუდი ეტყობა ადგილიდან გაგვყვა. არ არის გამორიცხული ჩვენს რიგებშიც ჰყავდეთ აგენტი. სიები შსს თანამშრომელს ვაჟა თაბაგიძეს აქვს“, – აცხადებს დავით ბაციკაძე.
„ჩვენი აჭარა“ შსს-ს ულტიმატუმს უყენებს და აცხადებს: „თუ ერთი დღე-ღამის განმავლობაში მხარდამჭერთა სია არ დაგვიბრუნდება, მაშინ იძულებული გავხდებით შსს-ს წინ აქცია მოვაწყოთ. ჩვენ მათ არა მარტო სიებს, არამედ ადამიანთა დაცვის უზრუნველყოფას მოვთხოვთ. თუ ეს არ გაჭრის, მივმართავთ ჩვენს მრავალათასიან მხარდამჭერებს და გავაკეთებთ მანიფესტაციას, ბევრად უფრო მრავალრიცხოვანს, ვიდრე აბაშიძე 5 დღის განმავლობაში ამზადებს“.
თამაზ დიასამიძემ განცხადება აჭარაში იარაღის უკანონო დარიგების შესახებაც გააკეთა; „იარაღი ადრეც რიგდებოდა, მაგრამ მხოლოდ ხელვაჩაურისა და ქობულეთის რაიონებში. ახლა მაღალმთიან რაიონებშიც დაიწყეს. პიროვნება, რომელიც იარაღს იტოვებს, როგორც არაოფიციალურ სამხედრო მოსამსახურეს, 85 ლარს აძლევენ ხელფასის სახით. ქმნიან სტაციონარულ ჯგუფებს“.
„ჩვენი აჭარას“ წარმომადგენლების თქმით, ამ ყველაფერზე აჭარის შს მინისტრმა მათთან საუბარში შემდეგი განაცხადა: „ასლან აბაშიძე არ არის შევარდნაძე, მე არა ვარ ნარჩემაშვილი, ვინც შეეცდება ჩვენს ჩამოგდებას, ვინც ჩვენთან რევოლუციას გეგმავს და ჩვენს წინააღმდეგ შეეცდება გამოსვლას, ჩვენ იარაღით ვართ, ჩვენ გავისვრით“.
